ବେଜିଂ : ଚୀନ ଦାବି କରୁଥିବା ଜଳସୀମାରେ ଅନୁପ୍ରବେଶ କରିଥିବା ଏକ ଆମେରିକାର ଯୁଦ୍ଧ ଜାହାଜକୁ ଘଉଡ଼ାଇଦେଇଛି ଚୀନ ନୌସେନା । ଏହାକୁ ନେଇ ଦକ୍ଷିଣ ଚୀନ ସାଗରରେ ଉତ୍ତେଜନା ଦେଖାଦେଇଛି ।
Sambad is now on WhatsApp
Join and get latest news updates delivered to you via WhatsApp
ଚୀନ ସାମରିକ ବାହିନୀ ପକ୍ଷରୁ କୁହାଯାଇଛି ଯେ ଦକ୍ଷିଣ ଚୀନ ସାଗରରେ ଥିବା ପାରାସଲ ଦ୍ବୀପ ନିକଟରେ ଥିବା ଜଳରାଶିରେ ଆମେରିକାର ଗାଇ଼ଡେଡ୍ ମିସାଇଲ ଡେଷ୍ଟ୍ରୟର ଜାହାଜ ୟୁଏସଏସ ମିଲିଅସ୍ ଅନୁପ୍ରବେଶ କରିଥିଲା । ଏହି ଅନୁପ୍ରବେଶ ଫଳରେ ଏହି ଅଂଚଳର ଶାନ୍ତି ଓ ସ୍ଥିରତାରେ ବ୍ୟାଘାତ ଘଟିବାର ଆଶଙ୍କା ଥିଲା । ଏଣୁ ପିପୁଲ୍ସ ଲିବରେସନ ଆର୍ମି (ପିଏଲଏ) ଏହାକୁ ଘଉଡ଼ାଇଦେଇଛି ।
ଚୀନ ପକ୍ଷରୁ କୁହାଯାଇଛି ଯେ, ପିଏଲଏର ଦକ୍ଷିଣାଞ୍ଚଳ ଥିଏଟର କମାଣ୍ଡ ଆମେରିକୀୟ ଯୁଦ୍ଧ ଜାହାଜକୁ ଠାବ କରିବା ସହ ତାହାର ଗତିବିଧି ଉପରେ ନଜର ରଖିଥିଲା ଓ ଫେରିଯିବାକୁ ଚେତାବନୀ ଦେଇଥିଲା । ପରେ ଏହି ଜାହାଜ ଫେରିଯାଇଥିଲା । ଚୀନ ପକ୍ଷରୁ ଆହୁରି ମଧ୍ୟ କୁହାଯାଉଛି ଯେ ଦକ୍ଷିଣ ଚୀନ ସାଗର ଅଞ୍ଚଳରେ ଉତ୍ତେଜନା ସୃଷ୍ଟି ପାଇଁ ଆମେରିକା ଉଦ୍ୟମ କରୁଛି । କିନ୍ତୁ ଚୀନ ସେନା ଏହାର ମୁକାବିଲା ପାଇଁ ପ୍ରସ୍ତୁତ ଅଛି ।
ଦକ୍ଷିଣ ଚୀନ ସାଗରକୁ ଚୀନ ନିଜର ଜଳକ୍ଷେତ୍ର ବୋଲି ଦାବି କରୁଥିବାବେଳେ ଆମେରିକା, ଫିଲିପାଇନ୍ସ, ଜାପାନ, ଭାରତ, ଇଣ୍ଡୋନେସିଆ ଆଦି ଦେଶ ଏହାକୁ ଅନ୍ତର୍ଜାତୀୟ ଜଳକ୍ଷେତ୍ର ବୋଲି କହୁଛନ୍ତି । ଏଣୁ ଅନ୍ତର୍ଜାତୀୟ ଆଇନ ଅନୁସାରେ ଏହି ସମୁଦ୍ରରେ ଚଳାଚଳ କରିବା ସମସ୍ତଙ୍କ ଅଧିକାର ବୋଲି ଏସବୁ ଦେଶ କହୁଛନ୍ତି ।