ପୂର୍ବ ଲଦାଖରୁ ସେନା ପ୍ରତ୍ୟାହାର ପାଇଁ ଚୀନର ପ୍ରସ୍ତାବକୁ ଭାରତର ପ୍ରତ୍ୟାଖ୍ୟାନ
ନୂଆଦିଲ୍ଲୀ : ପୂର୍ବ ଲଦାଖରୁ ସେନା ପ୍ରତ୍ୟାହାର ପାଇଁ ଚୀନର ପ୍ରସ୍ତାବକୁ ଖାରଜ କରିଦେଇଛି ଭାରତୀୟ ସେନା । ଏହା ସମ୍ଭବ ନୁହେଁ ବୋଲି ଭାରତୀୟ ସେନା ସ୍ପଷ୍ଟ ଭାବେ ଜଣାଇଦେଇଛି ।
Sambad is now on WhatsApp
Join and get latest news updates delivered to you via WhatsApp
ଚୀନ ସେନା (ପିଏଲଏ) ପକ୍ଷରୁ ପ୍ରସ୍ତାବ ଦିଆଯାଇଥିଲା ଯେ ଭାରତୀୟ ସେନା ଫିଙ୍ଗର ୮ରୁ ସେନା ପ୍ରତ୍ୟାହାର କରି ଫିଙ୍ଗର ୧ ପର୍ୟ୍ୟନ୍ତ ଚାଲିଯାଉ । ଏହି ମଧ୍ୟବର୍ତ୍ତି ଅଞ୍ଚଳକୁ ବଫର ଜୋନ ବା ନୋ ମ୍ୟାନ୍ସ ଲାଣ୍ଡ ( ମନୁଷ୍ୟ ବିହୀନ ଅଞ୍ଚଳ) କରିବାକୁ ଚୀନ ପ୍ରସ୍ତାବ ଦେଇଥିଲା । କିନ୍ତୁ ଏହା ପଛରେ ଚୀନର ଷଡ଼ଯନ୍ତ୍ର ରହିଥିବା ଆଶଙ୍କା କରାଯାଉଥିବାରୁ ଭାରତ ତାହାକୁ ପ୍ରତ୍ୟାଖ୍ୟାନ କରିଦେଇଛି ।
ଚୀନ ସେନାର ଅନୁପ୍ରବେଶ ପାଇଁ ତାକୁ ପୁରସ୍କୃତ କରିହେବ ନାହିଁ । ଚୀନ ସେନା ଏପ୍ରିଲ ୨୦୨୦ ପୂର୍ବର ସ୍ଥିତିକୁ ଚାଲିଯାଉ ବୋଲି ଭାରତୀୟ ସେନାର ଜଣେ କମାଣ୍ଡର କହିଛନ୍ତି ।
ଏବେ ଉଭୟ ଭାରତ ଓ ଚୀନ ସେନା ଫିଙ୍ଗର ୪ ଅଞ୍ଚଳରେ ମୁହାଁମୁହିଁ ଅବସ୍ଥାରେ ରହିଛନ୍ତି । ଚୀନ ଫିଙ୍ଗର ୮ ଅଞ୍ଚଳରେ ନିଜର ଭିତ୍ତିଭୂମି ନିର୍ମାଣ କାମ ଜାରି ରଖିଛି । ସେହିପରି ଗୋଗ୍ରା-ହଟ ସ୍ପ୍ରିଙ୍ଗ ଅଞ୍ଚଳରେ ମଧ୍ୟ ଦୁଇ ସେନା ମୁହାଁମୁହିଁ ଅବସ୍ଥା ରେ ରହିଛନ୍ତି ।
ଆଜି ଭାରତୀୟ ସେନାମୁଖ୍ୟ ଜେନେରାଲ ମନୋଜ ମୁକୁନ୍ଦ ନାରାଓ୍ବାଣେ ପୂର୍ବ ଲଦାଖର ବିଭିନ୍ନ ଅଞ୍ଚଳକୁ ଗସ୍ତ କରି ସ୍ଥିତିର ସମୀକ୍ଷା କରିଛନ୍ତି ।