ଭାରତରେ ଚିନୁକ ହେଲିକପ୍ଟର କାର୍ଯ୍ୟକ୍ଷମ, ଆମେରିକାରେ ଅଚଳ
ନିର୍ମାତା କମ୍ପାନି ବୋଇଂକୁ କାରଣ ପଚାରିଲା ଭାରତ
ନୂଆଦିଳ୍ଲୀ: ବୋଇଂ ଦ୍ବାରା ନିର୍ମିତ ଚିନୁକ ହେଲିକପ୍ଟରଗୁଡ଼ିକ ଭାରତରେ ଅଦ୍ୟାବଧି କାର୍ଯ୍ୟକ୍ଷମ ଥିବା ବେଳେ ଆମେରିକା ସେନା କିନ୍ତୁ ତା’ ପାଖରେ ଥିବା ସମସ୍ତ ବୋଇଂ ଚିନୁକ ହେଲିକପ୍ଟରକୁ ତେଲ ଲିକ୍ ହେଉଥିବା ଓ ଇଂଜିନରେ ନିଆଁ ଲାଗିଯାଉଥିବା ଦର୍ଶାଇ ବ୍ୟବହାର କରିବା ବନ୍ଦ କରିଦେଇଛି। ଏହା ଉପରେ ଆମେରିକୀୟ ନିର୍ମାତା କମ୍ପାନି ବୋଇଂଠାରୁ ସ୍ପଷ୍ଟୀକରଣ ମାଗିଛି ଭାରତ।
ସୂଚନାଯୋଗ୍ୟ, ବୋଇଂ ନିର୍ମିତ ଚିନୁକ ହେଲିକପ୍ଟର ଭାରତ ଓ ବ୍ରିଟେନ ସମେତ ପ୍ରାୟ ୨୦ଟି ଦେଶରେ କାର୍ଯ୍ୟକ୍ଷମ ରହିଛି। ଭାରତରେ ଥିବା ୧୫ଟି ଚିନୁକ ହେଲିକପ୍ଟର ଉତ୍ତରରେ ଚଣ୍ଡୀଗଡ଼ ଓ ଉତ୍ତରପୂର୍ବରେ ଆସାମରେ ନିୟୋଜିତ ଅଛନ୍ତି। କିନ୍ତୁ ଆମେରିକା ସେନା ତା’ର ଏଚ୍-୪୭ ଚିନୁକ ହେଲିକପ୍ଟରଗୁଡ଼ିକୁ ଇଂଜିନରେ ସମସ୍ୟା ଅଛି ବୋଲି ଅଭିଯୋଗ କରି ପକାଇ ରଖିଛି। ଇଂଜିନରେ କ’ଣ ତ୍ରୁଟି ଅଛି ପରୀକ୍ଷା କରି ସମାଧାନ ନ ହେଲେ ପ୍ରାୟ ୪୦୦ ହେଭି-ଡ୍ୟୁଟି ଚିନୁକ ସେବାନିବୃତ୍ତ ହୋଇଯିବ।
Sambad is now on WhatsApp
Join and get latest news updates delivered to you via WhatsApp
ଆମେରିକା ସେନା ମୁଖପାତ୍ର ସିନ୍ଥିଆ ସ୍ମିଥ କହିଛନ୍ତି ଯେ ଇଂଜିନରୁ ତେଲ ଲିକ୍ ହେବାର ମୂଳ କାରଣ ସେମାନେ ଖୋଜି ପାଇଛନ୍ତି। ସେହି ସମସ୍ୟାର ସମାଧାନ କରା ନ ଯିବା ପର୍ଯ୍ୟନ୍ତ ହେଲିକପ୍ଟରଗୁଡ଼ିକ ବ୍ୟବହାର କରାଯାଇପାରିବ ନାହିଁ। ତେବେ ତେଲ ଲିକ୍ ଓ ଇଂଜିନରେ ନିଆଁ ଲାଗିବା ଘଟଣା କେତେଥର ଘଟିଥିଲେ ମଧ୍ୟ ଏଯାବତ୍ କେହି ଆହତ ହୋଇ ନାହାନ୍ତି ବା କାହାର ମୃତ୍ୟୁ ହୋଇ ନାହିଁ ବୋଲି କହିଛନ୍ତି ସ୍ମିଥ। ଏ ପରିସ୍ଥିତିରେ ଚିନୁକ ହେଲିକପ୍ଟରକୁ ନେଇ ଭାରତରେ କୌଣସି ସମସ୍ୟା ଦେଖାଯାଇ ନ ଥିଲେ ମଧ୍ୟ ଭାରତୀୟ ବାୟୁସେନା ପକ୍ଷରୁ ଆମେରିକୀୟ ନିର୍ମାତା କମ୍ପାନି ବୋଇଂଠାରୁ ଏ ସମ୍ପର୍କରେ ବିଶଦ ବିବରଣୀ ମଗାଯାଇଛି। ଆମେରିକାରେ ଚିନୁକ ହେଲିକପ୍ଟରଗୁଡ଼ିକୁ କାହିଁକି ବ୍ୟବହାର ନ କରି ପକାଇ ରଖାଯାଇଛି ସେ ସମ୍ପର୍କରେ ଉତ୍ତର ଦେବା ପାଇଁ ବୋଇଂକୁ କୁହାଯାଇଛି।