ପାଟନା: ଲୋକ ଜନଶକ୍ତି ପାର୍ଟି (ଏଲଜେପି) ର ପ୍ରତିଷ୍ଠା ଦିବସ ଅବସରରେ ଦଳର ଜାତୀୟ ସଭାପତି ଚିରାଗ ପାଶୱାନ ଶନିବାର ଦିନ ବିଜେପିର ନାମ ନ ନେଇ ଟାର୍ଗେଟ କରିଛନ୍ତି। ଚିରାଗ କହିଛନ୍ତି ଯେ ବିହାରରେ ନିକଟରେ ହୋଇଥିବା ବିଧାନସଭା ନିର୍ବାଚନରେ ଆମ ଦଳ ବିନା କୌଣସି ସହଯୋଗୀ ଓ ତାରକା ପ୍ରଚାରକ ବିନା ଗୋଟିଏ ଆସନ ଜିତିଛି। ସେ କହିଛନ୍ତି ଯେ ଦଳ ୨୪ ଲକ୍ଷ ଭୋଟ୍ ପାଇଛି, ଯାହା ଦଳର ବିସ୍ତାରର ପ୍ରତୀକ ଭାବେ ସାବ୍ୟସ୍ତ ହୋଇଛି |
Sambad is now on WhatsApp
Join and get latest news updates delivered to you via WhatsApp
ପ୍ରତିଷ୍ଠା ଦିବସ ଅବସରରେ ଚିରାଗ କହିଛନ୍ତି ଯେ, ‘ବାପା (ରାମବିଳାସ ପାଶୱାନ) ସର୍ବଦା ଚାହୁଁଥିଲେ ଯେ ବିନା କୌଣସି ସହଯୋଗୀ ଦଳ ସାହାଯ୍ୟରେ ଏଲଜେପି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁ, ଯାହାଦ୍ୱାରା ଦଳର ମୂଳଦୁଆ ସୁଦୃଢ଼ ହେବ। ୨୦୨୦ ନିର୍ବାଚନ ପ୍ରମାଣିତ କରିଛି ଯେ ଏଲଜେପି ପ୍ରତି ଏକ ଦୃଢ ସମର୍ଥନ ଅଛି, ଯାହା ଆଗାମୀ ନିର୍ବାଚନରେ ଦଳକୁ ନୂତନ ସ୍ତରକୁ ନେବ। ସେହିପରି ବର୍ତ୍ତମାନ ବିହାରରେ ଥିବା ଏନଡିଏ ଶାସନ ପ୍ରତି ସଂଶୟ ପ୍ରକାଶ କରି ଚିରାଗ କହିଛନ୍ତି ଯେ ବିହାରରେ ଯେକୌଣସି ସମୟରେ ନିର୍ବାଚନ ହୋଇପାରେ |
ବର୍ତ୍ତମାନ ପରିସ୍ଥିତିରେ ଯେଉଁ ପ୍ରକାର ସରକାର ଚାଲିଛି, ମୁଁ ଭାବୁଛି ଯେ ଯେକୌଣସି ସମୟରେ ନିର୍ବାଚନ ଘୋଷଣା କରାଯାଇପାରେ | ସେହିପରି ବିହାରର ପୂର୍ବତନ ଉପ-ମୁଖ୍ୟମନ୍ତ୍ରୀ ସୁଶୀଲ ମୋଦୀଙ୍କୁ ରାଜ୍ୟସଭା ପ୍ରାର୍ଥୀ ଭାବେ ବିଜେପି ଘୋଷଣା କରିବା ପରେ ଚିରାଗ କହିଛନ୍ତି ଯେ ଏହି ଆସନ ଭାରତୀୟ ଜନତା ପାର୍ଟି (ବିଜେପି) ର ଥିଲା । ତେଣୁ ଦଳ କାହାକୁ ମନୋନୀତ କରିବାକୁ ଚାହୁଁଛି, ସେ ବାବଦରେ ଏଲଜେପି ପକ୍ଷରୁ କିଛି କୁହାଯିବ ନାହିଁ |
ସୂଚନା ଥାଉ କି ଚଳିତ ବିହାର ବିଧାନସଭା ନିର୍ବାଚନରେ ଏଲଜେପି ଅଧ୍ୟକ୍ଷ ଚିରାଗ ପାସୱାନ ନୀତିଶ କୁମାର ଓ ଜେଡିୟୁକୁ ବିରୋଧ କରିଥିଲେ ବି ବିଜେପି ବିରୋଧରେ ମୁହଁ ଖୋଲିନଥିଲେ | ଚିରାଗ ନିଜକୁ ମୋଦୀଙ୍କ ହନୁମାନ ବୋଲି ମଧ୍ୟ କହିଥିଲେ | ହେଲେ ଆଜି ଦଳର ପ୍ରତିଷ୍ଠା ଦିବସରେ ବିଜେପି ସହଯୋଗରେ ଗଠନ ହୋଇଥିବା ନୀତିଶଙ୍କ ସରକାର କେବେ ବି ଭାଙ୍ଗିଯାଇପାରେ ବୋଲି ଚିରାଗ କହିଛନ୍ତି |