ବିମାନ ଯାତ୍ରୀମାନେ ସାଙ୍ଗରେ କେବଳ ଗୋଟିଏ ହ୍ୟାଣ୍ଡବ୍ୟାଗ୍‌ ନେଇପାରିବେ; ନିୟମ କଲା ସିଆଇଏସଏଫ

ନୂଆଦିଲ୍ଲୀ: ଏଣିକି ବିମାନ ଯାତ୍ରୀମାନେ ନିଜ ସହ କ୍ୟାବିନ ଭିତରେ କେବଳ ମାତ୍ର ଗୋଟିଏ ହ୍ୟାଣ୍ଡବ୍ୟାଗ୍‌ ନେଇ ପାରିବେ। ଦେଶର ପ୍ରତ୍ୟେକ ଏୟାରଲାଇନ୍‌ସ ଚଳାଚଳ କର୍ତ୍ତୃପକ୍ଷ ପ୍ରତି ଯାତ୍ରୀ ପିଛା ଗୋଟିଏ ହ୍ୟାଣ୍ଡ ବ୍ୟାଗ ନିୟମକୁ କଠୋର ଭାବରେ କାର୍ଯ୍ୟକାରୀ କରିବାକୁ କେନ୍ଦ୍ରୀୟ ଶିଳ୍ପ ସୁରକ୍ଷା ବାହିନୀ (ସିଆଇଏସଏଫ) କହିଛି।

ବେସାମରିକ ବିମାନ ଚଳାଚଳ ସୁରକ୍ଷା ବ୍ୟୁରୋ (ବିସିଏଏସ) ନିୟମ ଅନୁଯାୟୀ କୌଣସି ଯାତ୍ରୀ ସାଙ୍ଗରେ ଏକରୁ ଅଧିକ ହ୍ୟାଣ୍ଡ ବ୍ୟାଗ ନେଇପାରିବେ ନାହିଁ। ତେବେ, ମହିଳାଙ୍କ ହ୍ୟାଣ୍ଡବ୍ୟାଗ ଏବଂ ଲାପଟପ୍‌ ବ୍ୟାଗ୍‌ ପରି କିଛି ବ୍ୟତିକ୍ରମକୁ ବାଦ୍‌ ଦେଇ, ଏହାର ଓଜନ ୭ କିଲୋଗ୍ରାମ ମଧ୍ୟରେ ସୀମିତ ରଖିବାକୁ ସିଆଇଏସଏଫ ଚାହୁଁଛି। ଏବଂ ଏହି ନିୟମ ଟିକେଟ୍‌ ଏବଂ ବୋର୍ଡିଂ ପାସ୍‌ରେ ପ୍ରମୁଖ ଭାବରେ ପ୍ରଦର୍ଶିତ ହେବ।

ଅନେକ କ୍ଷେତ୍ରରେ ଦେଖିବାକୁ ମିଳୁଛି ଯେ ଯାତ୍ରୀମାନେ ସ୍କ୍ରିନିଂ ପଏଣ୍ଟକୁ ୨ରୁ ୩ଟି ହ୍ୟାଣ୍ଡ ବ୍ୟାଗ୍‌ ଧରି ଆସୁଛନ୍ତି। ଏହା ଦ୍ୱାରା କ୍ଲିୟରାନ୍‌ସ ସମୟ ବୃଦ୍ଧି ପାଇବା ସହିତ ବିଳମ୍ବ, ପ୍ରାକ୍‌-ଆରମ୍ଭ ସୁରକ୍ଷା ଯାଞ୍ଚ (ପିଇଏସସି) ପଏଣ୍ଟରେ ଭିଡ଼ ସୃଷ୍ଟି କରିବା ସହିତ ଅନ୍ୟ ଯାତ୍ରୀମାନଙ୍କ ପାଇଁ ଅସୁବିଧାର କାରଣ ହେଉଛି। ତେଣୁ ଏହାକୁ ଦୃଷ୍ଟିରେ ରଖି ଏହି ନୂତନ ନିୟମକୁ କଠୋର ଭାବେ ଅନୁପାଳନକୁ ସୁନିଶ୍ଚିତ କରିବାକୁ ସିଆଇଏସଏଫ ଆଇଜି (ବିମାନବନ୍ଦର କ୍ଷେତ୍ର) ବିଜୟ ପ୍ରକାଶ ଜାନୁଆରି ୧୯ରେ ସମସ୍ତ ଏୟାରଲାଇନ୍‌ସ କର୍ତ୍ତୃପକ୍ଷ ଓ ବିସିଏଏସକୁ ଲିଖିତ ନିର୍ଦ୍ଦେଶନାମା ଜାରି କରିଛନ୍ତି।

ସିଆଇଏସଏଫ ଆଇଜି ତଥା ବରିଷ୍ଠ ଆଇପିଏସ ଅଧିକାରୀ ବିଜୟ ପ୍ରକାଶ ବିସିଏଏସକୁ କହିଛନ୍ତି ଯେ ଭିଡ଼ ଏବଂ ଅନ୍ୟାନ୍ୟ ସୁରକ୍ଷା ଚିନ୍ତାକୁ ହ୍ରାସ କରିବା ପାଇଁ ଗୋଟିଏ ହାତ ବ୍ୟାଗ ନିୟମକୁ କଠୋରତାର ସହିତ କାର୍ଯ୍ୟକାରୀ କରିବାକୁ ଏୟାରଲାଇନ୍‌ସ ଏବଂ ବିମାନବନ୍ଦର ଅପରେଟରମାନଙ୍କୁ ନିର୍ଦ୍ଦେଶ ଦିଅନ୍ତୁ।