ପରୀକ୍ଷାରେ ଛାତ୍ରୀ ଫେଲ ହେବାରୁ କୋଚିଂ ସେଣ୍ଟର ଫେରାଇବ ସମ୍ପୂର୍ଣ୍ଣ ଫି
ନୂଆଦିଲ୍ଲୀ: ଶିକ୍ଷାକୁ ନେଇ ବ୍ୟବସାୟ ଏବେ ବଢ଼ିବାରେ ଲାଗିଛି | ମାଳମାଳ କୋଚିଂ ସେଣ୍ଟର ଆକର୍ଷଣୀୟ କ୍ୟାରିୟରର ସ୍ୱପ୍ନ ଦେଖାଇ ଛାତ୍ରଛାତ୍ରୀ ଓ ଅଭିଭାବକଙ୍କୁ ନିଜ ପ୍ରତି ଆକୃଷ୍ଟ କରାଇବାରେ ଲାଗିପଡିଛନ୍ତି | ତେବେ ବର୍ତ୍ତମାନ ଏମିତି ଏକ ମାମଲା ସାମ୍ନାକୁ ଆସିଛି ଯେଉଁଥିରେ ମିଛ ପ୍ରତିଶୃତି ଦେଇଥିବା କୋଚିଂ ସେଣ୍ଟର ହରଡ଼ଘଣାରେ ପଡିଯାଇଛି | ମିଳିଥିବା ସୂଚନା ମୁତାବକ ବାଙ୍ଗାଲୋରର ଏକ କୋଚିଂ ସେଣ୍ଟରରେ ପଢ଼ୁଥିବା ଜଣେ ୯ମ ଶ୍ରେଣୀର ଛାତ୍ରୀ ସ୍କୁଲ ପରୀକ୍ଷାରେ ଫେଲ ହୋଇଯାଇଥିଲେ | ଆଉ ଛାତ୍ରୀଙ୍କ ବାପା ତ୍ରିଲୋକ ଚାନ୍ଦ ଗୁପ୍ତା ଏନେଇ ଖାଉଟି ଅଦାଲତରେ ମାମଲା ରୁଜୁ କରିଥିଲେ |
Sambad is now on WhatsApp
Join and get latest news updates delivered to you via WhatsApp
ମାମଲାରେ ଛାତ୍ରୀଙ୍କ ବାପା ଉଲ୍ଲେଖ କରିଥିଲେ ଯେ, କୋଚିଂ ସେଣ୍ଟର ପକ୍ଷରୁ ଯାହା ପ୍ରତିଶୃତି ଦିଆଯାଇଥିଲା ତାହା ପୂରଣ କରାଯାଇନଥିଲା | ଅତିରିକ୍ତ କ୍ଲାସ ସାଙ୍ଗକୁ ନିୟମିତ କ୍ଲାସର କୋଚିଂ ସେଣ୍ଟର ଆଡ଼ମିସନ ପୂର୍ବରୁ ପ୍ରତିଶୃତି ଦେଇଥିଲା | ଆଉ ଝିଅର ଭବିଷ୍ୟତକୁ ଦେଖି ସେ କୋର୍ସ ଫି ବାବଦକୁ ୬୯ ହଜାର ଟଙ୍କା ଦାଖଲ ମଧ୍ୟ କରିଥିଲେ | ତେବେ କୋଚିଂ ସେଣ୍ଟର କର୍ତୃପକ୍ଷ ଅତିରିକ୍ତ କ୍ଲାସ ଛାଡ଼ନ୍ତୁ ନିୟମିତ କ୍ଲାସ କରିନଥିଲେ | ଯେଉଁଥିପାଇଁ ତାଙ୍କ ଝିଅ ଫେଲ ହୋଇଯାଇଥିବାର ବାପା ଅଭିଯୋଗ କରିଥିଲେ |
ଆଉ ଝିଅ ଫେଲ ହେବା ପରେ ବାପା ତ୍ରିଲୋକ ଗୁପ୍ତା ତାଙ୍କ ଟଙ୍କା ଫେରାଇବାକୁ ବାରମ୍ବାର କୋଚିଂ ସେଣ୍ଟରକୁ ଅନୁରୋଧ କରିଥିଲେ | ହେଲେ କେହି ବି ତାଙ୍କ କଥା ଶୁଣିନଥିଲେ | ଏହା ପରେ ସେ ଖାଉଟି ଅଦାଲତରେ ମାମଲା ରୁଜୁ କରିଥିଲେ | ଆଉ ଖାଉଟି ଅଦାଲତ ଏହାର ଶୁଣାଣି କରି କୋର୍ସ ଫି ସହ ମୋକଦ୍ଦମା ଖର୍ଚ୍ଚ ବାବଦକୁ ୫ ହଜାର ଟଙ୍କା ଦେବାକୁ ରାୟ ଶୁଣାଇଛନ୍ତି | ୬ ସପ୍ତାହ ମଧ୍ୟରେ ଏହି ଟଙ୍କା ଫେରାଇବାକୁ ଖାଉଟି ଅଦାଲତ ନିର୍ଦ୍ଦେଶ ଦେଇଛନ୍ତି |