ମୁଖ୍ୟମନ୍ତ୍ରୀଙ୍କୁ ଥଣ୍ଡା ଚା ଦେବାରୁ ଅଧିକାରୀଙ୍କ ଉପରେ କାର୍ଯ୍ୟାନୁଷ୍ଠାନ ନିର୍ଦ୍ଦେଶ, କଂଗ୍ରେସର କଡା ଟାର୍ଗେଟ ପରେ ନରମିଲେ ସରକାର
ଭୋପାଳ: ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନଙ୍କୁ ଥଣ୍ଡା ଚା ଦେଇଥିବା ଅଧିକାରୀଙ୍କ ଉପରେ କାର୍ଯ୍ୟାନୁଷ୍ଠାନ ପାଇଁ ଦିଆଗଲା ନିର୍ଦ୍ଦେଶ | ତେବେ ଵିରୋଧୀ ଦଳ କଂଗ୍ରେସର କଡା ଆପତ୍ତି ପରେ ଏହି ନିର୍ଦ୍ଦେଶନାମାକୁ ପ୍ରତ୍ୟାହାର କରାଯାଇଛି | ମିଳିଥିବା ସୂଚନା ମୁତାବକ ଜୁଲାଇ ୧୧ରେ ମୁଖ୍ୟମନ୍ତ୍ରୀ ଶିବରାଜ ଅନ୍ୟ ସ୍ଥାନକୁ ଯିବା ପାଇଁ ଖଜୁରାହୋ ବିମାନବନ୍ଦରରେ କିଛି ସମୟ ରହିଥିଲେ। ଏହି ସମୟରେ, ତାଙ୍କୁ ଜଳଖିଆ ଏବଂ ଚା ଯୋଗାଇବାର ଦାୟିତ୍ୱ ଜଣେ ଅଧିକାରୀଙ୍କୁ ନ୍ୟସ୍ତ କରାଯାଇଥିଲା | ଆଉ ଏଥିରେ ସାମାନ୍ୟ ବ୍ୟତିକ୍ରମ ହୋଇଥିଲା | ଏହାକୁ ନେଇ ରାଜନଗର ସବ-ଡିଭିଜନାଲ ମାଜିଷ୍ଟ୍ରେଟଙ୍କ ତରଫରୁ ଜୁନିଅର ଯୋଗାଣ ଅଧିକାରୀ ରାକେଶ କାନହୁଆଙ୍କୁ ଏକ କାରଣ ଦର୍ଶାଅ ନୋଟିସ ଜାରି କରାଯାଇଥିଲା ।
Sambad is now on WhatsApp
Join and get latest news updates delivered to you via WhatsApp
ଏଥିରେ କୁହାଯାଇଥିଲା ଯେ ମୁଖ୍ୟମନ୍ତ୍ରୀ ଜୁଲାଇ ୧୧ରେ ଖଜୁରାହୋ ବିମାନବନ୍ଦରରେ ଥିବାବେଳେ ତାଙ୍କ ଆତିଥେୟତା ବୁଝିବା ଦାୟିତ୍ୱ ଆପଣଙ୍କ ଉପରେ ଥିଲା | କିନ୍ତୁ ଆପଣ ତାଙ୍କୁ ଯେଉଁ ଚା ଦେଇଥିଲେ, ଏହା ଉତ୍ତମ ମାନର ନଥିଲା | ଏହା ସହ ଚା ଥଣ୍ଡା ମଧ୍ୟ ଥିଲା | ତେଣୁ ଏଭଳି କାହିଁକି ହେଲା ସେନେଇ କାରଣ ଦର୍ଶାଇବାକୁ କୁହାଯାଇଥିଲା | ଏହି ବିଜ୍ଞପ୍ତିରେ ଅଧିକାରୀଙ୍କୁ ତିନି ଦିନ ମଧ୍ୟରେ ଉତ୍ତର ଦେବାକୁ କୁହାଯାଇଥିଲା। ଯଦି ସେ ଉତ୍ତର ନ ଦିଅନ୍ତି ତେବେ ତାଙ୍କ ବିରୋଧରେ କଠୋର ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଚିଠିରେ ଉଲ୍ଲେଖ ଥିଲା । ଏହି ଚିଠି ଜାରି କରାଯିବା ପରେ ବିରୋଧୀ ଦଳ କଂଗ୍ରେସ ଏହାକୁ ଟାର୍ଗେଟ କରିଥିଲା |
କଂଗ୍ରେସ ପକ୍ଷରୁ କୁହାଯାଇଥିଲା ଯେ ଲୋକଙ୍କୁ ଠିକ ସମୟରେ ରାସନ ସାମଗ୍ରୀ ନ ମିଳୁ ପଛେ, ରୋଗୀଙ୍କୁ ଆମ୍ବୁଲାନ୍ସ ନ ମିଳୁ ପଛେ, ମୁଖ୍ୟମନ୍ତ୍ରୀ ଥଣ୍ଡା ଚା ପିଇପାରିବେ ନାହିଁ | ତେବେ ବର୍ତ୍ତମାନ ଏହି ନୋଟିସକୁ ପ୍ରତ୍ୟାହାର କରାଯାଇଛି |