ସ୍କୁଲ ହୋମୱାର୍କକୁ ନେଇ ମୋଦୀଙ୍କୁ ବାର୍ତ୍ତା ପଠାଇଲେ କୁନି ଝିଅ, ଆକ୍ସନକୁ ଆସିଗଲେ ଉପରାଜ୍ୟପାଳ

ଶ୍ରୀନଗର: ‘ମୋଦୀ ସାହେବ … ମୁଁ କାଶ୍ମୀରର ଜଣେ ୬ ବର୍ଷର ଝିଅ | ମୁଁ ସ୍କୁଲ ପକ୍ଷରୁ ଦିଆଯାଉଥିବା ହୋମୱାର୍କକୁ ନେଇ ଖୁସି ନାହିଁ | ମୁଁ ସକାଳ ୧୦ଟା ପୂର୍ବରୁ ଉଠେ, ଦୁଇଟା ପର୍ଯ୍ୟନ୍ତ କ୍ଲାସ୍ ଚାଲିଥାଏ | ପ୍ରଥମେ ଇଂରାଜୀ, ତାପରେ ଗଣିତ ଏବଂ ପରେ କମ୍ପ୍ୟୁଟର | ହୋମୱାର୍କ ଏତେ ଦିଆଯାଉଛି, ପଚାରନ୍ତୁ ନାହିଁ | ଛୋଟ ପିଲାମାନଙ୍କୁ କାହିଁକି ଏତେ କାମ ଦିଆଯାଏ? ବୟସ୍କ ପିଲାମାନଙ୍କୁ ଯେତିକି କାମ କରିବାକୁ ଦିଆଯାଏ | ବାୟ ବାୟ’ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭିଡିଓ ବାର୍ତ୍ତା ମାଧ୍ୟମରେ କିଛି ଏଭଳି ମନର କଥା ଶୁଣାଇଛନ୍ତି ଜଣେ କୁନି ଝିଅ | କାଶ୍ମୀରୀ ଝିଅର ଏହି ଅଭିଯୋଗ ଭିଡିଓ ସୋସିଆଲ ମିଡିଆରେ ଚର୍ଚ୍ଚାର ବିଷୟ ପାଲଟିଛି।

ଏହି ଭିଡିଓରେ ଝିଅଟି ଅତି ନିରୀହ ଢଙ୍ଗରେ ତାଙ୍କ ଶିକ୍ଷକଙ୍କ ବିଷୟରେ ପ୍ରଧାନମନ୍ତ୍ରୀଙ୍କ ନିକଟରେ ଅଭିଯୋଗ କରୁଥିବା ଦେଖିବାକୁ ମିଳିଛି। ସେ କହୁଛି ଯେ ମ୍ୟାଡାମ୍ ବହୁତ ହୋମୱାର୍କ ଦିଅନ୍ତି, ଏତେ ଚାପ କେମିତି ସହିବି | ଏହି ଅଭିଯୋଗ ଭିଡିଓକୁ ଉପରାଜ୍ୟପାଳ ମନୋଜ ସିହ୍ନା ଗୁରୁତର ସହ ନେଇଛନ୍ତି। ୪୮ ଘଣ୍ଟା ମଧ୍ୟରେ ଏକ ନୀତି ଆଣିବାକୁ ସେ ଜମ୍ମୁକାଶ୍ମୀର ଶିକ୍ଷା ବିଭାଗକୁ ନିର୍ଦ୍ଦେଶ ଦେଇଛନ୍ତି। ଉପରାଜ୍ୟପାଳ କହିଛନ୍ତି ଯେ ଏହା ଅତ୍ୟନ୍ତ ମଧୁର ଅଭିଯୋଗ। ସେ ଏପରି ଶିକ୍ଷାନୀତି କରିବାକୁ ଶିକ୍ଷା ବିଭାଗକୁ କହିଛନ୍ତି ଯେ ଛୋଟ ପିଲାମାନଙ୍କ ଉପରେ ହୋମୱାର୍କର ଭାର ହ୍ରାସ ହୋଇପାରିବ।


ପିଲାମାନଙ୍କର ଦିନଗୁଡ଼ିକ ଆନନ୍ଦଦାୟକ ହେବା ଉଚିତ୍ | ଉଲ୍ଲେଖନୀୟ କଥା ହେଉଛି, କରୋନା ଯୋଗୁଁ ଜାମ୍ମୁ କାଶ୍ମୀରର ଶିକ୍ଷାନୁଷ୍ଠାନଗୁଡ଼ିକ ବର୍ତ୍ତମାନ ବନ୍ଦ ରହିଛି। ପିଲାମାନଙ୍କର ଅନଲାଇନ୍ କ୍ଲାସ୍ ଏକ ବର୍ଷରୁ ଅଧିକ ସମୟ ଧରି ଚାଲିଆସୁଛି | ଅନଲାଇନ୍ କ୍ଲାସ ପାଇଁ ସରକାର ଅନୁମତି ଦେଇଛନ୍ତି। ପିଲାମାନଙ୍କୁ ସକାଳ ଠାରୁ ଅପରାହ୍ନ ପର୍ଯ୍ୟନ୍ତ ଅନଲାଇନ୍ କ୍ଲାସ୍ କରିବାକୁ ପଡୁଛି |

ସମ୍ବନ୍ଧିତ ଖବର