ବାପା ଡ଼ାକିଲାନି ବୋଲି କୁନି ଝିଅକୁ ସିଗାରେଟ ଚେଙ୍କ ଦେଲେ କନେଷ୍ଟବଳ
ରାୟପୁର: ବାପା ଡ଼ାକିଲାନି ବୋଲି କୁନି ଝିଅକୁ ସିଗାରେଟ ଚେଙ୍କ ଦେଲେ କନେଷ୍ଟବଳ | ଛତିଶଗଡର ବାଲୋଡ ଜିଲ୍ଲାରେ ଏଭଳି ଏକ ଛାତିଥରା ଘଟଣା ସାମ୍ନାକୁ ଆସିଛି | ଜଣେ କନଷ୍ଟେବଳ ଦେଢ଼ ବର୍ଷର ଝିଅକୁ ସିଗାରେଟ ଚେଙ୍କ ଦେଇଥିବାର ଅଭିଯୋଗ ପରେ ତାଙ୍କୁ ଗିରଫ କରାଯାଇଛି | ମିଳିଥିବା ସୂଚନା ମୁତାବକ ଅଭିଯୁକ୍ତ କନେଷ୍ଟବଳ ଜଣକ କୁନି ଝିଅକୁ ବାପା ଡାକିବା ପାଇଁ ଚାପ ପକାଇଥିଲେ, କିନ୍ତୁ ଝିଅଟି ଏଭଳି କରିନଥିଲା, ଆଉ ଏଥିରେ ଉତ୍ତେଜିତ ହୋଇ ଝିଅର ଶରୀରର ଅନେକ ସ୍ଥାନରେ ସିଗାରେଟ୍ ଚେଙ୍କ ଦେଇଥିଲେ |
Sambad is now on WhatsApp
Join and get latest news updates delivered to you via WhatsApp
ବାଲୋଡ ଜିଲ୍ଲାର ପୁଲିସ ଅଧିକାରୀ ଶନିବାର କହିଛନ୍ତି ଯେ ଏହି ଘଟଣାରେ କନେଷ୍ଟବଳ ଅବିନାଶ ରାୟଙ୍କୁ ଗିରଫ କରାଯାଇଛି । ଅବିନାଶ ଗୁରୁବାର ଦିନ ଦେଢ଼ ବର୍ଷର ଝିଅକୁ ସିଗାରେଟ ଚେଙ୍କ ଦେବା ସହ ତାଙ୍କ ମା’ଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଥିଲା । ଏହି ଘଟଣା ପରଠାରୁ ଅଭିଯୁକ୍ତ ଫେରାର ଥିଲେ। ପୁଲିସ ଅଧିକାରୀ କହିଛନ୍ତି ଯେ ମହିଳାଙ୍କ ଅଭିଯୋଗ ପରେ ଅବିନାଶଙ୍କ ବିରୋଧରେ ମାମଲା ରୁଜୁ କରାଯାଇଥିଲା ଏବଂ ତାଙ୍କୁ ଶନିବାର ଦିନ ଦୁର୍ଗ ଜିଲ୍ଲାର ଭିଲାଇ ସହରରୁ ଗିରଫ କରାଯାଇଥିଲା। ପୁଲିସ ଅଧିକାରୀଙ୍କ କହିବା ମୁତାବକ ଅଭିଯୁକ୍ତ କନେଷ୍ଟବଳଙ୍କୁ ବାଲୋଡ ପୁଲିସ ଷ୍ଟେସନରେ କିଛି ଦିନ ପୂର୍ବରୁ ପୋଷ୍ଟିଙ୍ଗ ଦିଆଯାଇଥିଲା |
ସେହି ସମୟରେ ସେ ସହରର ସେଓନି ଅଞ୍ଚଳରେ ଥିବା ମହିଳାଙ୍କ ଘରେ ରହୁଥିଲେ। ମହିଳାଙ୍କ ସ୍ୱାମୀ ନାଗପୁରରେ ରହୁଥିବାବେଳେ ଗୁରୁବାର ରାତିରେ ଅବିନାଶ ନିଶାସକ୍ତ ଅବସ୍ଥାରେ ଦେଢ଼ ବର୍ଷର ଝିଅକୁ ବାପା ଡାକିବାକୁ କହିଥିଲେ | ଯେତେବେଳେ ଝିଅ ଏହା କରିନଥିଲା ସେତେବେଳେ ଝିଅର ପେଟ ଓ ହାତରେ ସିଗାରେଟ ଚେଙ୍କ ଦେଇଥିଲେ ଓ ମହିଳାଙ୍କୁ ଆକ୍ରମଣ କରିଥିଲେ | ଏହା ପରେ କନେଷ୍ଟବଳ ଜଣକ ଫେରାର ହୋଇଯାଇଥିଲେ | ମହିଳାଜଣକ ଅଭିଯୋଗ କରିବା ପରେ ପୁଲିସ ତାଙ୍କୁ ଶେଷରେ ଗିରଫ କରିଛି |