କଂଗ୍ରେସ ମୋତେ ନୁହେଁ, ନେତୃତ୍ବ ଆବଶ୍ୟକ କରେ : ପ୍ରଶାନ୍ତ କିଶୋର
ନୂଆଦିଲ୍ଲୀ : କଂଗ୍ରେସରେ ଯୋଗ ଦେବା ଆମନ୍ତ୍ରଣକୁ ପ୍ରତ୍ୟାଖ୍ୟାନ କରିବା ପରେ ମୁହଁ ଖୋଲିଛନ୍ତି । ସେ କହିଛନ୍ତି ଯେ କଂଗ୍ରେସ ତାଙ୍କ ଅପେକ୍ଷା ନେତୃତ୍ବ ଆବଶ୍ୟକ କରେ । ଏହା ସହିତ ଦଳର ସାଂଗଠନିକ ସ୍ତରରେ ଥିବା ସମସ୍ୟାର ସମାଧାନ ପାଇଁ ସାମୁହିକ ଇଚ୍ଛାଶକ୍ତି ଆବଶ୍ୟକ ।
Sambad is now on WhatsApp
Join and get latest news updates delivered to you via WhatsApp
ଏକ ଟୁଇଟ କରି ସେ ଲେଖିଛନ୍ତି, “ମୁଁ ଦଳରେ ଯୋଗ ଦେବା ପାଇଁ କଂଗ୍ରେସ ପକ୍ଷରୁ ଦିଆଯାଇଥିବା ଅଫରକୁ ବିନୟତାର ସହ ପ୍ରତ୍ୟାଖ୍ୟାନ କରୁଛି । ମୋ ମତରେ, ମୋ ଅପେକ୍ଷା କଂଗ୍ରେସ ଦଳ ନେତୃତ୍ବ ଓ ସାଂଗଠନିକ ସ୍ତରରେ ଥିବା ସମସ୍ୟାର ସମାଧାନ ନିମନ୍ତେ ଆବଶ୍ୟକ ସଂସ୍କାର ପାଇଁ ସାମୁହିକ ଇଚ୍ଛାଶକ୍ତି ଆବଶ୍ୟକ କରେ ।
ଏହା ପୂର୍ବରୁ ବରିଷ୍ଠ କଂଗ୍ରେସ ନେତା ରଣଦୀପ ସୂର୍ଯ୍ୟେଓ୍ବାଲା ପ୍ରଶାନ୍ତ କିଶୋରଙ୍କ ପ୍ରତ୍ୟାଖ୍ୟାନ ସଂପର୍କରେ ସୂଚନା ଦେଇଥିଲେ । “ପ୍ରଶାନ୍ତ କିଶୋରଙ୍କ ସହ ଆଲୋଚନା ପରେ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧି ୨୦୨୪ ନିର୍ବାଚନ ପାଇଁ ଏକ କ୍ଷମତାଶାଳୀ କମିଟି ଗଠନ କରିଥିଲେ ଓ କେତେକ ନିର୍ଦ୍ଦିଷ୍ଟ ଦାୟିତ୍ବ ସହ ସେଥିରେ ଯୋଗ ଦେବାକୁ ପ୍ରଶାନ୍ତଙ୍କୁ ଆମନ୍ତ୍ରଣ କରିଥିଲେ । କିନ୍ତୁ ସେ ମନା କରିଦେଇଛନ୍ତି । ଦଳକୁ ସେ ଦେଇଥିବା ପରାମର୍ଶ ପାଇଁ ଦଳ ତାଙ୍କୁ ଧନ୍ୟବାଦ ଦେଉଛି ।“ବୋଲି ସେ ଟୁଇଟ କରି ଲେଖିଥିଲେ ।
ଦୁଇ ସପ୍ତାହ ତଳେ ପ୍ରଶାନ୍ତ କିଶୋର ସୋନିଆଙ୍କୁ ଭେଟିବା ସହ ୨୦୨୪ ନିର୍ବାଚନରେ ବିଜୟ ପାଇଁ କେତେକ ପରାମର୍ଶ ଓ ବ୍ଲୁପ୍ରିଣ୍ଟ ପ୍ରଦାନ କରିଥିଲେ । ଏହା ପରେ ସେ କଂଗ୍ରେସରେ ଯୋଗ ଦେଉଥିବା ନେଇ ଚର୍ଚ୍ଚା ଜୋର ଧରିଥିଲା ।