ଇଣ୍ଡିଆ ମେଣ୍ଟରେ କଂଗ୍ରେସ-ଆପ୍ ଛକାପଞ୍ଝା: କେବେ ସମାଲୋଚନା ତ କେବେ ସମର୍ଥନ

ନୂଆଦିଲ୍ଲୀ: ୨୬ଟି ଦଳକୁ ନେଇ ଗଠନ ହୋଇଥିବା ବିରୋଧୀ ଇଣ୍ଡିଆ ମେଣ୍ଟରେ କଂଗ୍ରେସ ଓ ଆପ୍‌ ମଧ୍ୟରେ ଛକାପଞ୍ଝା ଚାଲିଛି। କେତେବେଳେ ଉଭୟ ଦଳ ପରସ୍ପର ବିରୋଧରେ ବାହାରୁଛନ୍ତି ତ ଆଉ କେତେ‌ବେଳେ ସମର୍ଥନ କରୁଛନ୍ତି। ଏଭଳି ସ୍ଥିତିରେ ଚଳିତ ମାସ ଶେଷରେ ବିରୋଧୀ ଇଣ୍ଡିଆ ମେଣ୍ଟର ତୃତୀୟ ବୈଠକ ମୁମ୍ବାଇରେ ହେବ। ଏହି ବୈଠକରେ ଆପ୍‌ ଯୋଗ ଦେବା ନେଇ ପୂର୍ବରୁ ସନ୍ଦେହ ରହିଥିଲା। କିନ୍ତୁ ଆପ୍‌ ଆଜି ଏହି ସନ୍ଦେହକୁ ଦୂର କରିଛି। ମୁମ୍ବାଇ ବୈଠକରେ ଆପ୍‌ (ଆମ୍‌ ଆଦ୍‌ମୀ ପାର୍ଟି) ଯୋଗ ଦେବ ବୋଲି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଆଜି ସ୍ପଷ୍ଟ କରିଛନ୍ତି। ପୂର୍ବରୁ ପାଟନା ଏବଂ ବେଙ୍ଗାଲୁରୁରେ ‌ହୋଇଥିବା ୨ଟି ବୈଠକରେ ଆପ୍‌ ଯୋଗ ଦେଇଥିଲା।

ଗତ ସପ୍ତାହରେ ଆପ୍‌ ମୁମ୍ବାଇ ବୈଠକକୁ ବର୍ଜନ କରିବ ବୋଲି ଧମକ ଦେଇଥିଲା। ୨୦୨୪ ଲୋକସଭା ନିର୍ବାଚନରେ କଂଗ୍ରେସ ଦିଲ୍ଲୀରେ ସମସ୍ତ ୭ଟି ଲୋକସଭା ଆସନରେ ନିର୍ବାଚନ ଲଢ଼ିବା ପାଇଁ ପ୍ରସ୍ତୁତ ହେଉଛି ବୋଲି ଦିଲ୍ଲୀର କଂଗ୍ରେସ ନେତା ଅଳକା ଲାମ୍ବା ଟିପ୍ପଣୀ ଦେବାପରେ ଆପ୍‌ ଏହାକୁ ଜୋରଦାର ବିରୋଧ କରିଥିଲା। କଂଗ୍ରେସ ନେତାଙ୍କ ଟିପ୍ପଣୀ ପାଇଁ ଆପ୍‌ ମୁମ୍ବାଇ ବୈଠକ ବର୍ଜନ କରିବାର ଧମକ ଦେଇଥିଲା। କିନ୍ତୁ ପରେ କଂଗ୍ରେସ ଦଳ ମୁଖପାତ୍ରଙ୍କ ଟିପ୍ପଣୀଠାରୁ ଦୂରେଇ ରହିଥିଲା ଏବଂ ଏନେଇ ଏକ ସ୍ପଷ୍ଟୀକରଣ ମଧ୍ୟ ଜାରି କରିଥିଲା। ଆପ୍‌ ଏବଂ କଂଗ୍ରେସ ପରସ୍ପରକୁ ଏମିତି ଖୋଲା‌ଖୋଲି ବିରୋଧ କରିବା ପରେ ମେଣ୍ଟରେ ଏକାଠି ରହିବାକୁ ନେଇ ଏବେ ପ୍ରଶ୍ନ ଉଠୁଛି। ଅବଶ୍ୟ ଆପ୍‌ କଂଗ୍ରେସକୁ ଧମକ ଦେବା କିଛି ନୂଆ କଥା ନୁହେଁ। ବେଙ୍ଗାଲୁରୁରେ ମେଣ୍ଟର ଦ୍ବିତୀୟ ବୈଠକ ହେବାର ଅବ୍ୟବହିତ ପୂର୍ବରୁ କେଜ୍ରିୱାଲଙ୍କ ଦଳ ଘୋଷଣା କରିଥିଲା ଯେ ଯଦି କଂଗ୍ରେସ ଦିଲ୍ଲୀ ସର୍ଭିସ ବିଲ୍‌କୁ ବିରୋଧ କରୁଛି ବୋଲି ଖୋଲାଖୋଲି ଘୋଷଣା ନକରିବ ତେବେ ଆପ୍‌ ବୈଠକରେ ଯୋଗଦେବନି। ଏହାପରେ ମେଣ୍ଟର ସ୍ବାର୍ଥ ଦୃଷ୍ଟିରୁ କଂଗ୍ରେସ ଦିଲ୍ଲୀ ସର୍ଭିସ ବିଲ୍‌କୁ ବିରୋଧ କରିବ ବୋଲି ଘୋଷଣା କରିଥିଲା। କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ ମଧ୍ୟ ଆପ୍‌କୁ କଟାକ୍ଷ କରି କହିଥିଲେ ଯେ ଥରେ ଦିଲ୍ଲୀ ସର୍ଭିସ ସଂଶୋଧନ ବିଲ୍‌ ସଂସଦରେ ଗୃହୀତ ହୋଇଯିବାପରେ ଆପ୍‌ ବିରୋଧୀ ମେଣ୍ଟ ଛାଡ଼ିଦେବ।

ଜାତୀୟ ସ୍ତରରେ ବିରୋଧୀ ଏକତାର ବୃହତ୍ତର ସ୍ବାର୍ଥ ପାଇଁ ଉଭୟ କଂଗ୍ରେସ ଏବଂ ଆପ୍‌ ସେମାନଙ୍କ ବ୍ୟକ୍ତିଗତ ସ୍ବାର୍ଥକୁ ଅଣଦେଖା କରିବାକୁ ଚେଷ୍ଟା କରୁଥିଲେ ସୁଦ୍ଧା ଆଗାମୀ ପଥ ଆଦୌ ସହଜ ଥିବାଭଳି ମନେ ହେଉନାହିଁ। ନିର୍ବା‌ଚନ ଥିବା ଛତିଶଗଡ଼ରେ ଗତକାଲି ଏହାର ଏକ ଝଲକ ଦେଖିବାକୁ ମିଳିଛି। କେଜ୍ରିୱାଲ ଗତକାଲି ଛତିଶଗଡ଼ରେ ଭୂପେଶ ବାଘେଲ ସରକାର ଉପରେ ତୀବ୍ର ଆକ୍ରମଣ କରିଥିଲେ। ଛତିଶଗଡ଼ରେ ସରକାରୀ ସ୍କୁଲ୍‌ ଗୁଡ଼ିକର ସ୍ଥିତି ଅତ୍ୟନ୍ତ ଭୟଙ୍କର କହି କେଜ୍ରିୱାଲ କଂଗ୍ରେସ ସରକାରକୁ ଟାର୍ଗେଟ୍‌ କରିଥିଲେ। କେଜ୍ରିୱାଲ ମଧ୍ୟ ଛତିଶଗଡ଼ରେ ୧୦ଟି ନିର୍ବାଚନ ପ୍ରତିଶ୍ରୁତି ଦେଇ ସାରିଲେଣି। କଂଗ୍ରେସ କେଜ୍ରିୱାଲଙ୍କ ଟିପ୍ପଣୀର କଡ଼ା ପ୍ରତିକ୍ରିୟା ରଖିଛି। କଂଗ୍ରେସ ନେତା ପୱନ ଖେଡ଼ା କେଜ୍ରିୱାଲଙ୍କୁ କଂଗ୍ରେସ ବନାମ ଆପ୍‌ ସରକାରର କାର୍ଯ୍ୟ ଉପରେ ଏକ ବିତର୍କ ପାଇଁ ଆହ୍ବାନ କରିଛନ୍ତି। ଆପ୍‌ ମଧ୍ୟ ମଧ୍ୟପ୍ରଦେଶରେ ପ୍ରବେଶ କରିବାକୁ ଚେଷ୍ଟା‌ କରିଛି। ବୋଧହୁଏ ଯେଉଁସବୁ ରାଜ୍ୟରେ କଂଗ୍ରେସର ସ୍ଥିତି ସୁଦୃଢ଼ ରହିଛି ଆପ୍‌ ସେହିସବୁ ରାଜ୍ୟରେ ପ୍ରବେଶ କରିବାର ଲକ୍ଷ୍ୟ ରଖିଛି। ତେବେ ଏହା ସତ୍ୟ ‌ଯେ ଇଣ୍ଡିଆ ମେଣ୍ଟରେ ରହିବା ପାଇଁ ଉଭୟ ଆପ୍‌ ଏବଂ କଂଗ୍ରେସକୁ ଅନେକ ସନ୍ତୁଳନ ରକ୍ଷା କରିବାକୁ ପଡ଼ିବ। ବିଜେପି ଏବଂ କଂଗ୍ରେସ ବାଦ୍‌ ଆପ୍‌ ହେଉଛି ଏକମାତ୍ର ଦଳ ଯାହା ଏକରୁ ଅଧିକ ରାଜ୍ୟରେ କ୍ଷମତାରେ ରହିଛି। ଆପ୍‌ ଅନ୍ୟ ରାଜ୍ୟରେ ଏହାର ପତିଆରା ବଢ଼ିବା ଚାହୁଛି। ଉଭୟ ଆପ୍‌ ଏବଂ କଂଗ୍ରେସ ଜାତୀୟ ସ୍ତରରେ ବିଜେପିକୁ ବିରୋଧ କରିବାପାଇଁ ହାତ ମିଳାଇବାକୁ ବାଧ୍ୟ ହୋଇଥିଲେ ବି ରାଜ୍ୟ ବିଧାନସଭା ନିର୍ବାଚନରେ ସେମାନଙ୍କ ସ୍ଥିତି ହିଁ ପରିଶେଷରେ ବିରୋଧୀ ମେଣ୍ଟର ଭବିଷ୍ୟତ ନିର୍ଦ୍ଧାରଣ କରିବ।