୩ ମାସ ଆଗରୁ କର୍ଣ୍ଣାଟକ ନିର୍ବାଚନ ପାଇଁ କଂଗ୍ରେସ ପ୍ରସ୍ତୁତ ଥିଲା : ଶିବକୁମାର
ବେଙ୍ଗାଲୁରୁ : କର୍ଣ୍ଣାଟକ ବିଧାନସଭା ନିର୍ବାଚନ ପାଇଁ ତାରିଖ ଘୋଷଣା ହୋଇସାରିଛି । ମେ’ ୧୦ତାରିଖରେ ବିଧାନସଭା ନିର୍ବାଚନ ହେବାକୁ ଥିବା ବେଳେ ୧୩ ତାରିଖରେ ଭୋଟ୍ ଗଣତି ହେବ। ଏ ସଂପର୍କରେ ପ୍ରତିକ୍ରିୟା ପ୍ରକାଶ କରି ପିସିସି ସଭାପତି ଡିକେ ଶିବକୁମାର କହିଛନ୍ତି ଯେ ତାଙ୍କ ଦଳ ୩ ମାସ ଆଗରୁ ନିର୍ବାଚନ ପାଇଁ ପ୍ରସ୍ତୁତ ଥିଲା ।
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ଶିବକୁମାରଙ୍କ ଏକ ଭିଡିଓ ଭାଇରାଲ ହେବାରେ ଲାଗିଛି, ଯେଉଁଥିରେ ସେ ଲୋକମାନଙ୍କ ଉପରକୁ ନୋଟ୍ ଉଡାଉଥିବାର ଦେଖିବାକୁ ମିଳିଛି । ଭିଡିଓଟି ମଙ୍ଗଳବାର ମାଣ୍ଡ୍ୟା ଜିଲ୍ଲାରେ ହୋଇଥିବା ଡିକେ ଶିବକୁମାରଙ୍କ ପ୍ରଜା ଧ୍ବନି ରାଲିର ବୋଲି କୁହାଯାଉଛି । ଭିଡିଓରେ ଦେଖାଯାଉଛି ଯେ, ସେ ଏହି ରାଲିରେ ଲୋକଙ୍କ ଉପରକୁ ୫୦୦-୫୦୦ ଟଙ୍କିଆ ନୋଟ୍ ଉଡ଼ାଉଛନ୍ତି ।
କଂଗ୍ରେସର ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ପରିଚିତ ଶିବକୁମାର ଶକ୍ତିଶାଳୀ ଭୋକାଲିଗା ସମ୍ପ୍ରଦାୟର ଗଡ଼ କୁହାଯାଉଥିବା ମାଣ୍ଡ୍ୟାରେ ବ୍ୟାପକ ପ୍ରଚାର କରୁଛନ୍ତି । ଏହି ଅଂଚଳ ଜନତା ଦଳ (ସେକ୍ୟୁଲାର)ର ଗଡ଼ ରହିଆସିଛି । ୨୦୧୮ ନିର୍ବାଚନରେ ଜେଡିଏସ୍ ଜିଲ୍ଲାର ୭ଟି ଆସନରେ ବିଜୟୀ ହୋଇଥିଲା। ଏଥର ଏହି ଦୁର୍ଗ ଭେଦ କରିବାକୁ କଂଗ୍ରେସ ଉଦ୍ୟମ କରୁଛି ।
⚡️⚡️Karnataka Congress Chief DK Shivakumar was seen throwing Rs 500 currency notes at election rally in Mandya pic.twitter.com/5zwmqGLmu5
— Megh Updates 🚨™ (@MeghUpdates) March 29, 2023
୨୨୪ ଆସନ ବିଶିଷ୍ଟ ବିଧାନସଭା ପାଇଁ କଂଗ୍ରେସ ନିଜର ପ୍ରଥମ ତାଲିକାରେ ୧୨୪ ଜଣ ପ୍ରାର୍ଥୀ ଘୋଷଣା କରିଛି। ଚଳିତ କର୍ଣ୍ଣାଟକ ବିଧାନସଭାରେ ବିଜେପିର ୧୨୧ ଟି ଆସନ ରହିଛି । କଂଗ୍ରେସର ୭୦ ଓ ଜେଡିଏସ୍ ପାଖରେ ୩୦ ଆସନ ରହିଛି। ୨୦୧୮ରେ ବିଜେପି ସଂଖ୍ୟାଗରିଷ୍ଠତା ଠାରୁ ଦୂରରେ ରହିବା ପରେ କଂଗ୍ରେସ ଓ ଜେଡିଏସ୍ ସରକାର ଗଠନ କରିଥିଲେ। କିନ୍ତୁ ୨୦୧୯ରେ କଂଗ୍ରେସ ଓ ଜେଡିଏସ୍ ସରକାର ଭାଙ୍ଗିବା ପରେ ବିଜେପି ବିଦ୍ରୋହୀ ବିଧାୟକଙ୍କ ସମର୍ଥନରେ ସରକାର ଗଠନ କରିଥିଲା, ଯେଉଁମାନଙ୍କ ମଧ୍ୟରୁ ଅନେକଙ୍କୁ ପରେ ମନ୍ତ୍ରୀ କରାଯାଇଥିଲା ।