କଂଗ୍ରେସ-ଜେଏମ୍‌ଏମ୍‌ ୭୦ ଆସନରେ ଲ‌ଢ଼ିବେ

ରାଞ୍ଚି: ଇଣ୍ଡି ମେଣ୍ଟ ଆଗାମୀ ଝାଡ଼ଖଣ୍ଡ ବିଧାନସଭା ନିର୍ବାଚନ ଏକାଠି ଲଢ଼ିବ। ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ ଆଜି ଏନେଇ ଘୋଷଣା କରିଛନ୍ତି। ହେମନ୍ତ ସୋରେନ କହିଛନ୍ତି, ଆଗାମୀ ଝାଡ଼ଖଣ୍ଡ ବିଧାନସଭା ନିର୍ବାଚନ ପାଇଁ ଇଣ୍ଡି ମେଣ୍ଟରେ ଆସନ ବୁ୍‌ଝାମଣା ଚୂଡ଼ାନ୍ତ ହୋଇଛି। କଂଗ୍ରେସ, ଆରଜେଡି, ଜେଏମ୍‌ଏମ୍‌ ଏବଂ ବାମ ଦଳକୁ ନେଇ ଗଠିତ ଇଣ୍ଡି ମେଣ୍ଟ ଏକାଠି ନିର୍ବାଚନ ଲଢ଼ିବେ ବୋଲି ସୋରେନ କହିଛନ୍ତି।   କଂଗ୍ରେସ ଏବଂ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା (ଜେଏମ୍‌ଏମ୍‌) ଝାଡ଼ଖଣ୍ଡରେ ୮୧ ବିଧାନସଭା ଆସନରୁ ୭୦ଟି ଆସନରେ ପ୍ରାର୍ଥୀ ଦେବେ।  ମେଣ୍ଟ ସହଯୋଗୀଙ୍କ ସହ କଥା ହେବା ପରେ ବାକି ୧୧ ଆସନ ଉପରେ ନିଷ୍ପତ୍ତି ନିଆଯିବ ବୋଲି ସେ କହିଛନ୍ତି।

ମେଣ୍ଟରେ ଏକତା ଥିବା ଉପରେ ସୋରେନ ଗୁରୁତ୍ବାରୋପ କରି କହିଛନ୍ତି ଯେ ସବୁ ଆସନ ପାଇଁ ସହମତି ପ୍ରକାଶ ପାଇଛି। ତେବେ କେଉଁ ଦଳ କେଉଁ ଆସନରେ ପ୍ରାର୍ଥୀ ଦେବ ସେନେଇ ଖୁବ୍‌ଶୀଘ୍ର ଘୋଷଣା ହେବ। ଉଲ୍ଲେଖଯୋଗ୍ୟ,  ପୂର୍ବ ବିଧାନସଭା ନିର୍ବାଚନରେ ଜେଏମ୍‌ଏମ୍‌ ୪୩ ଆସନରେ ନିର୍ବାଚନ ଲଢ଼ିଥିଲା ଏବଂ କଂଗ୍ରେସ ୩୧ ଆସନରେ ଲଢ଼ିଥିଲା। କିନ୍ତୁ ଚଳିତ ଥର କଂଗ୍ରେସକୁ ୨୭ରୁ ୨୮ ଆସନ ମିଳିପାରେ ବୋଲି କୁହାଯାଉଛି।  ଜେଏମ୍‌ଏମ୍‌ ଚଳିତ ଥର ଅଧିକ ଆସନରେ ନିର୍ବାଚନ ଲଢ଼ିବ ବୋଲି ଜଣାପଡ଼ିଛି।  ୨୦୨୯ ବିଧାନସଭା ନିର୍ବାଚନରେ ଜେଏମଏମ୍‌ ୮୧ ଆସନରୁ ୩୦ଟି ଆସନରେ ଜିତିଥିଲା।  କଂଗ୍ରେସ ୧୬ଟି ଆସନରେ ଜିତିଥିବା ବେଳେ ଆର୍‌ଜେଡି ଗୋଟିଏ ଆସନରେ ଜିତିଥିଲା।