ରାହୁଲ ଗାନ୍ଧିଙ୍କୁ କାହିଁକି ବିରୋଧ କରୁଛନ୍ତି ମହାରାଷ୍ଟ୍ରର ସାମ୍ବାଦିକ ?

ମୁମ୍ବାଇ: ମହାରାଷ୍ଟ୍ରର ଅମରାବତୀରେ ଏକ ନିର୍ବାଚନୀ ରାଲିକୁ ସମ୍ବୋଧିତ କରି କଂଗ୍ରେସ ନେତା ରାହୁଲ ଗାନ୍ଧି ସାମ୍ବାଦିକମାନେ ଶାସକ ସରକାରଙ୍କ ଗୋଡ଼ାଣିଆ ଏବଂ ନିଜ ମାଲିକଙ୍କ ଦାସ ବୋଲି ଅଭିଯୋଗ କରିଛନ୍ତି। ଏହାକୁ ନେଇ ମୁମ୍ବାଇ ପ୍ରେସ୍ କ୍ଲବ ନିଜର ପ୍ରତିକ୍ରିୟା ରଖିଛି। ରାହୁଲ ଗାନ୍ଧିଙ୍କ 'ଗୁଲାମ' ମନ୍ତବ୍ୟ କୁ ନେଇ ଉଦବେଗ ପ୍ରକାଶ କରି ମୁମ୍ବାଇ ପ୍ରେସ୍ କ୍ଲବ୍ କହିଛି ଯେ ଲୋକସଭାରେ ବିରୋଧୀ ଦଳ ନେତା କେବଳ ବୟାନ ବଦଳରେ ସାମ୍ବାଦିକମାନେ ସମ୍ମୁଖୀନ ହେଉଥିବା ଆହ୍ୱାନର ମୁକାବିଲା ପାଇଁ ଠୋସ୍ ପଦକ୍ଷେପକୁ ପ୍ରାଥମିକତା ଦେବା ଉଚିତ।

ଏକ ପ୍ରେସ୍ ବିବୃତିରେ ମୁମ୍ବାଇ ପ୍ରେସ୍ କ୍ଲବ୍ ସ୍ପଷ୍ଟ କରିଛି ଯେ ସାମ୍ବାଦିକ ସମ୍ମିଳନୀକୁ ଏଡ଼ାଇବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ରାହୁଲଙ୍କ ସମାଲୋଚନା ଯୁକ୍ତିଯୁକ୍ତ । କିନ୍ତୁ ରାହୁଲ ଗାନ୍ଧି ବାରମ୍ବାର ସାମ୍ବାଦିକମାନଙ୍କୁ ଉପହାସ କରିବା ମଧ୍ୟ ନିନ୍ଦା ଯୋଗ୍ୟ। ମହାରାଷ୍ଟ୍ରର ଅମରାବତୀରେ ଏକ ନିର୍ବାଚନୀ ରାଲିରେ ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧି ସାମ୍ବାଦିକମାନଙ୍କୁ ନେଇ ଅତ୍ୟନ୍ତ ଆପତ୍ତିଜନକ ମନ୍ତବ୍ୟ ଦେଇଥିଲେ। ସେମାନେ ସରକାରଙ୍କ ଗୋଡ଼ାଣିଆ ବୋଲି ସେ ଅଭିଯୋଗ କରିବା ସହ ସେମାନଙ୍କୁ 'ସେମାନଙ୍କ ମାଲିକଙ୍କ ଦାସ' ବୋଲି କହିଥିଲେ। 

ପ୍ରେସ କ୍ଲବ ରାହୁଲ ଗାନ୍ଧୀଙ୍କୁ ପଚାରିଛି ଯେ ସେ କେବେ ଭାରତରେ କର୍ମଜୀବୀ ସାମ୍ବାଦିକମାନେ ସମ୍ମୁଖୀନ ହେଉଥିବା ଆହ୍ୱାନ ଏବଂ ସାମ୍ବାଦିକତାର ସାମଗ୍ରିକ ଦୁରାବସ୍ଥାର ମୂଳ କାରଣ ବିଷୟରେ ବିଚାର କରିଛନ୍ତି କି? ମୁମ୍ବାଇ ପ୍ରେସ୍ କ୍ଲବ୍ କହିଛି ଯେ ଆଜି ସାମ୍ବାଦିକମାନଙ୍କର ଖରାପ ଅବସ୍ଥା ମୁଖ୍ୟତଃ ଅନିୟନ୍ତ୍ରିତ ଚୁକ୍ତିଭିତ୍ତିକକରଣ କାରଣରୁ ହୋଇଛି। ୧୯୮୦ ଦଶକର ଶେଷ ଭାଗ ଏବଂ ୧୯୯୦ ଦଶକର ପ୍ରାରମ୍ଭରେ କଂଗ୍ରେସ ନେତୃତ୍ୱାଧୀନ ସରକାର ଆରମ୍ଭ କରିଥିବା ନବଉଦାରବାଦୀ ନୀତିଦ୍ୱାରା ଏହା ଆଂଶିକ ଭାବରେ ପ୍ରଭାବିତ ହୋଇଛି ।