ରାୟପୁର: ଛତିଶଗଡ଼ ବିଧାନସଭା ନିର୍ବାଚନରେ ଭାରତୀୟ ଜନତା ପାର୍ଟି (ବିଜେପି)କୁ ଲାଗିଛି ଶକ୍ତ ଝଟ୍କା। ବିଗତ ୧୫ ବର୍ଷ ଧରି ଛତିଶଗଡ଼ରେ ଶାସନ କ୍ଷମତାରେ ରହି ଆସିଥିବା ବିଜେପିକୁ ଚଳିତ ନିର୍ବାଚନରେ ପରାଜୟର ମୁହଁ ଦେଖିବାକୁ ପଡ଼ିଛି। ଚୂଡ଼ାନ୍ତ ଫଳାଫଳ ଅଦ୍ୟାବଧି ପ୍ରକାଶ ପାଇ ନଥିଲେ ମଧ୍ୟ ଛତିଶଗଡ଼ରେ କଂଗ୍ରେସ ସ୍ପଷ୍ଟ ବହୁମତ ହାସଲ କରିବା ସହ ରାଜ୍ୟର ପରବର୍ତ୍ତୀ ସରକାର ଗଠନ କରିବା ପ୍ରାୟ ନିଶ୍ଚିତ ହୋଇପଡ଼ିଛି।
Sambad is now on WhatsApp
Join and get latest news updates delivered to you via WhatsApp
୯୦ ଆସନ ବିଶିଷ୍ଟ ଛତିଶଗଡ଼ ବିଧାନସଭାରେ ସରକାର ଗଠନ ପାଇଁ ୪୬ ବିଧାୟକ ଆବଶ୍ୟକ ଥିବା ବେଳେ ଏଠାରେ କଂଗ୍ରେସ ୬୮ ଆସନ (୩୮ରେ ବିଜୟୀ ଓ ୩୦ରେ ଆଗୁଆ) ସହ ସରକାର ଗଠନ କରିବା ନିଶ୍ଚିତ କରିଛି। ଅନ୍ୟ ପକ୍ଷରେ ୧୫ ବର୍ଷ ଧରି କ୍ଷମତାରେ ରହିଥିବା ଭାରତୀୟ ଜନତା ପାର୍ଟି (ବିଜେପି) ୧୫ ଆସନ (୮ଟିରେ ବିଜୟୀ ଓ ୭ଟିରେ ଆଗୁଆ) ରହିଥିବା ବେଳେ ଅନ୍ୟାନ୍ୟମାନେ ୭ଟି ଆସନରେ ଆଗରେ ରହିଛି। ଛତିଶଗଡ଼ରେ ଦଳର ଶୋଚନୀୟ ପରାଜୟ ପାଇଁ ମୁଖ୍ୟମନ୍ତ୍ରୀ ରମଣ ସିଂହ ସମସ୍ତ ଦୋଷ ନିଜ ମୁଣ୍ଡକୁ ନେବା ସହ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି।