କଂଗ୍ରେସ ତା’ ଭୂମିକା ନିଜେ ସ୍ଥିର କରିବ: ଅଖିଳେଶ
ନୂଆଦିଲ୍ଲୀ: ନିକଟରେ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ କୋଲକାତାଠାରେ ତୃଣମୂଳ କଂଗ୍ରେସ ନେତ୍ରୀ ମମତା ବାନାର୍ଜୀଙ୍କୁ ସାକ୍ଷାତ୍ କରିବା ସହ କଂଗ୍ରେସକୁ ଛାଡ଼ି ଏକ ନୂଆ ବିରୋଧୀ ସାମ୍ମୁଖ୍ୟ ଗଠନ ଲାଗି ସହମତି ପ୍ରକାଶ କରିଥିଲେ। ଆଜି ଅଖିଳେଶ କହିଛନ୍ତି, କଂଗ୍ରେସ ଏକ ଜାତୀୟ ଦଳ, ଆମେ ଆଞ୍ଚଳିକ ଦଳ ଏବଂ କଂଗ୍ରେସ ତା’ର ନିଜର ଭୂମିକା ନିଜେ ସ୍ଥିର କରିବ।
Sambad is now on WhatsApp
Join and get latest news updates delivered to you via WhatsApp
ଯାଦବ ମଧ୍ୟ ଇଙ୍ଗିତ ଦେଇଛନ୍ତି ଯେ, ପୂର୍ବରୁ ଗାନ୍ଧି ପରିବାରର ଗଡ଼ ବୋଲାଉଥିବା ଆମେଥିରୁ ତାଙ୍କ ଦଳ ଲୋକସଭା ନିର୍ବାଚନ ଲଢ଼ିବ। ୧୯୯୬ ମସିହାରୁ ତାଙ୍କ ଦଳ ଏହି ଆସନରୁ ପ୍ରତିଦ୍ବନ୍ଦ୍ବିତା କରିନାହିଁ। ୨୦୧୯ ଲୋକସଭା ନିର୍ବାଚନରେ କେନ୍ଦ୍ରମନ୍ତ୍ରୀ ସ୍ମୃତି ଇରାନୀ ଏହି ଆସନରୁ ଲଢ଼ି ରାହୁଲ ଗାନ୍ଧିଙ୍କୁ ହରାଇ ଦେଇଥିଲେ। ସେହିପରି ଗାନ୍ଧି ପରିବାରର ଆଉ ଏକ ଗଡ଼ ତଥା ସୋନିଆ ଗାନ୍ଧିଙ୍କ ନିର୍ବାଚନମଣ୍ଡଳୀ ରାଏବରେଲିରୁ ମଧ୍ୟ ଦଳ ନିର୍ବାଚନ ଲଢ଼ିବା ପାଇଁ ଅଖିଳେଶ ଇଙ୍ଗିତ ଦେଇଛନ୍ତି।