କର୍ଣ୍ଣେଲ ସୋଫିଆ କୁରେଶୀଙ୍କୁ ନେଇ ବିବାଦୀୟ ମନ୍ତବ୍ୟ: ମଧ୍ୟପ୍ରଦେଶ ମନ୍ତ୍ରୀ ବିଜୟ ଶାହଙ୍କ ବିରୋଧରେ ମାମଲା ରୁଜୁ

ଭୋପାଳ: କର୍ଣ୍ଣେଲ ସୋଫିଆ କୁରେଶୀଙ୍କ ଉପରେ ଅପମାନଜନକ, ସାମ୍ପ୍ରଦାୟିକ ଓ ଲିଙ୍ଗଗତ ମନ୍ତବ୍ୟ ଦେଇଥିବା ମଧ୍ୟପ୍ରଦେଶ ମନ୍ତ୍ରୀ ବିଜୟ ଶାହଙ୍କ ବିରୋଧରେ ପୁଲିସ ମାମଲା ରୁଜୁ କରିବାକୁ ରାଜ୍ୟ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ହାଇକୋର୍ଟଙ୍କ ନିର୍ଦ୍ଦେଶରେ ପୁଲିସ ଶାହଙ୍କ ବିରୋଧରେ ମାମଲା ରୁଜୁ କରିଛି। ଘଟଣାକୁ ନେଇ ନିନ୍ଦାର ସୁଅ ଛୁଟିବା ପରେ ବିଜୟ ଶାହଙ୍କ ବିରୋଧରେ ଏତଲା ଦେବାକୁ କୋର୍ଟ ଆଜି ରାଜ୍ୟ ପୁଲିସ ମୁଖ୍ୟଙ୍କୁ ନିର୍ଦ୍ଦେଶ ଦେଇଥିଲେ। କର୍ଣ୍ଣେଲ ସୋଫିଆ କୁରେସୀ ଏବଂ ଅନ୍ୟ ଜଣେ ଅଧିକାରୀ ୱିଙ୍ଗକମାଣ୍ଡର ବ୍ୟୋମିକା ସିଂହ ଅପରେସନ ସିନ୍ଦୂର ଉପରେ ସାମ୍ବାଦିକ ସମ୍ମିଳନୀରେ ସେନାର ମୁଖପାତ୍ର ହୋଇଥିଲେ। ବ୍ରିଫିଂ ସମୟରେ ସେମାନେ ବୈଦେଶିକ ସଚିବ ବିକ୍ରମ ମିସ୍ରିଙ୍କ ସହ ସାମିଲ ହେଉଥିଲେ।

ମଙ୍ଗଳବାର ମଧ୍ୟପ୍ରଦେଶର ଆଦିବାସୀ ବ୍ୟାପାର ମନ୍ତ୍ରୀ  ଶାହ ମହୁରେ ଏକ ସାଂସ୍କୃତିକ କାର୍ଯ୍ୟକ୍ରମରେ ଯୋଗ ଦେଇ କହିଥିଲେ ଯେ, ଆତଙ୍କବାଦୀମାନେ ଆମ ଭଉଣୀ ଓ ଝିଅମାନଙ୍କର ସିନ୍ଦୂର ପୋଛି ଦେଇଛନ୍ତି ଏବଂ ଆମେ ଏହାର ପ୍ରତିଶୋଧ ନେବା ପାଇଁ ସେମାନଙ୍କ ନିଜ ଭଉଣୀଙ୍କୁ ପଠାଇଛୁ। ସେମାନେ ହିନ୍ଦୁମାନଙ୍କୁ ଉଲ୍ଲଗ୍ନ କରି ହତ୍ୟା କରିଥିଲେ ଏବଂ ମୋଦୀଜୀ ସେମାନଙ୍କ ଭଉଣୀଙ୍କୁ ପଠାଇ ଜବାବ ଦେଇଛନ୍ତି। ଆମେ ସେମାନଙ୍କ ପୋଷାକ ବାହାର କରିପାରିଲୁ ନାହିଁ, ତେଣୁ ଆମେ ସେମାନଙ୍କ ସମ୍ପ୍ରଦାୟର ଏକ ଝିଅକୁ ପଠାଇଥିଲୁ ... ତୁମେ ଆମ ସମ୍ପ୍ରଦାୟର ଭଉଣୀମାନଙ୍କୁ ବିଧବା କଲ, ତେଣୁ ତୁମ ସମ୍ପ୍ରଦାୟର ଜଣେ ଭଉଣୀ ତୁମକୁ ଉଲଗ୍ନ କରିଦେବ। ପ୍ରତିଶୋଧ ନେବା ପାଇଁ ଆତଙ୍କୀଙ୍କ ସମ୍ପ୍ରଦାୟର ଝିଅମାନଙ୍କୁ ପାକିସ୍ତାନ ପଠାଯାଇପାରିବ ବୋଲି ମୋଦୀଜୀ ପ୍ରମାଣିତ କରିଛନ୍ତି।

ସେ ଏଭଳି ମନ୍ତବ୍ୟ ଦେବା ବେଳେ କେନ୍ଦ୍ର ମହିଳା ଓ ଶିଶୁ ବିକାଶ ରାଷ୍ଟ୍ରମନ୍ତ୍ରୀ ସାବିତ୍ରୀ ଠାକୁର, ବିଧାୟକ ତଥା ପୂର୍ବତନ କ୍ୟାବିନେଟ ମନ୍ତ୍ରୀ ଉଷା ଠାକୁର ଏବଂ ବିଜେପିର ଅନେକ ସ୍ଥାନୀୟ ନେତା ଉପସ୍ଥିତ ଥିଲେ। ଏହି ମନ୍ତବ୍ୟକୁ ସେନାର ବରିଷ୍ଠ ନେତା ଓ ବିରୋଧୀ ଦଳମାନେ ନିନ୍ଦା କରିଛନ୍ତି। କଂଗ୍ରେସ ମୁଖ୍ୟ ମଲ୍ଲିକାର୍ଜୁନ ଖଡ଼ଗେ ବିଜୟ ଶାହଙ୍କୁ ରାଜ୍ୟ ମନ୍ତ୍ରିମଣ୍ଡଳରୁ ବହିଷ୍କାର କରିବାକୁ ଦାବି କରିଛନ୍ତି। ବିଜୟ ଶାହ ପ୍ରଥମେ କହିଥିଲେ ଯେ ତାଙ୍କ ମନ୍ତବ୍ୟକୁ ପ୍ରସଂଗ ବାହାରେ ରିପୋର୍ଟ କରାଯାଇଥିଲା ଏବଂ ପରେ କ୍ଷମା ମାଗିବାକୁ ପ୍ରସ୍ତାବ ଦେଇଥିଲେ। ଶାହ କହିଛନ୍ତି, କର୍ଣ୍ଣେଲ ସୋଫିଆ କୁରେଶୀ ମୋ ପାଇଁ ମୋ ଭଉଣୀଠାରୁ ଅଧିକ କାରଣ ସେ ଜାତି ଓ ସମ୍ପ୍ରଦାୟରୁ ଉପରକୁ ଉଠି ପ୍ରତିଶୋଧ ନେଇଥିଲେ।