କରୋନା ପୁଣି ଫେରିଲା: ମାସ୍କ ପିନ୍ଧିବାକୁ ସତର୍କ ସୂଚନା ଜାରି

ସିଙ୍ଗାପୁର: ସିଙ୍ଗାପୁରରେ କ୍ରମାଗତ ଭାବେ ବଢୁଥିବା କରୋନା ମାମଲାକୁ ନେଇ ବିଶ୍ବର ଅନ୍ୟ ଦେଶମାନଙ୍କରେ ମଧ୍ୟ ଆତଙ୍କ ସୃଷ୍ଟି ହୋଇଛି। ଏହା ହେଉଛି କରୋନାର ଆଉ ଏକ ନୂଆ ଲହରର ପ୍ରତ୍ୟାବର୍ତ୍ତନ। କରୋନା ପୁଣି ଦୁନିଆରେ ଆତଙ୍କ ସୃଷ୍ଟି କରିବାକୁ ଯାଉଛି। ଅନେକ ପ୍ରଶ୍ନ ଲୋକଙ୍କୁ ଅସୁବିଧାରେ ପକାଉଛି। ଏହି ସମୟରେ, କରୋନା ରୋଗୀଙ୍କ ସଂଖ୍ୟା ବୃଦ୍ଧି ପାଇବା ଦ୍ବାରା ସିଙ୍ଗାପୁରରେ ସ୍ଥିତି ସଙ୍କଟ ଜନକ ମୁହାଁ ହୋଇଛି। କ‌ୋଭିଡ୍-୧୯ର ଏକ ନୂଆ ଳହର ଏଠାରେ ଦେଖାଯାଉଛି।

କୋଭିଡ୍-୧୯ ମାମଲା କ୍ରମାଗତ ଭାବରେ ବୃଦ୍ଧି ପାଉଛି। ମେ’ ୫ ରୁ ୧୧ ମଧ୍ୟରେ ପ୍ରାୟ ୨୬,୦୦୦ ମାମଲା ପଞ୍ଜିକୃତ ହୋଇଥିଲା। ସିଙ୍ଗାପୁରର ସ୍ୱାସ୍ଥ୍ୟମନ୍ତ୍ରୀ ଅଙ୍ଗ ୟେ କୁଙ୍ଗ ଲୋକଙ୍କୁ ମାସ୍କ ପିନ୍ଧିବାକୁ ପରାମର୍ଶ ଦେଇଛନ୍ତି। ବାହାରକୁ ବାହାରିଲେ ମାସ୍କ ପିନ୍ଧିବା ଲାଗି ସତର୍କ ସୂଚନା ଜାରି କରାଯାଇଛି।

ଏକ ରିପୋର୍ଟରେ କୁହାଯାଇଛି ମନ୍ତ୍ରୀ କହିଛନ୍ତି, ଆମେ ଏକ ନୂଆ ଲହାରର ଆରମ୍ଭ ଦେଖୁଛୁ। କ୍ରମାଗତ ଭାବେ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଛି। ତେଣୁ, ମୁଁ କହିବାକୁ ଚାହେଁ ଯେ ଆଗାମୀ ଦୁଇରୁ ଚାରି ସପ୍ତାହ ମଧ୍ୟରେ ଲହର ଶିଖରରେ ପହଞ୍ଚିପାରେ । ଏହାର ସ୍ପଷ୍ଟ ଅର୍ଥ ହେଉଛି ଜୁନ୍ ମଧ୍ୟଭାଗରୁ ଶେଷ ପର୍ଯ୍ୟନ୍ତ ସିଙ୍ଗାପୁରରେ ଏକ ନୂଆ ଲହର ଦେଖାଯିବ । ଅର୍ଥାତ୍ ଜୁନ୍ ୧୫ରୁ ୩୦ ମଧ୍ୟରେ କରୋନାର ନୂଆ ଲହର ସିଙ୍ଗାପୁରରେ ଶୀର୍ଷରେ ପହଞ୍ଚିବ।

ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି ଯେ ପୂର୍ବ ସପ୍ତାହରେ ୧୩,୭୦୦ ମାମଲା ତୁଳନାରେ ମେ’ ୫ ରୁ ୧୧ ମଧ୍ୟରେ କୋଭିଡ-୧୯ ଆକ୍ରାନ୍ତଙ୍କ ଆନୁମାନିକ ସଂଖ୍ୟା ୨୫,୯୦୦ କୁ ବୃଦ୍ଧି ପାଇଛି। କରୋନା ମହାମାରୀର ଦୈନିକ ମାମଲା ୧୮୧ ରୁ ପ୍ରାୟ ୨୫୦ କୁ ବୃଦ୍ଧି ପାଇଛି ।

ମନ୍ତ୍ରଣାଳୟ କହିଛି ଯେ ହସ୍ପିଟାଲରେ ଶଯ୍ୟା କ୍ଷମତା ସଂରକ୍ଷଣ ପାଇଁ ନୂତନ ପଦକ୍ଷେପ ନିଆଯାଉଛି। ସରକାରୀ ଡାକ୍ତରଖାନାଗୁଡ଼ିକୁ ସେମାନଙ୍କର ଅଣ-ଜରୁରୀ ଇଲେକ୍ଟିଭ୍ ସର୍ଜରୀ ମାମଲା ହ୍ରାସ କରିବାକୁ ଏବଂ ଆକ୍ରାନ୍ତଙ୍କୁ ଉପଯୁକ୍ତ ପ୍ରଭାବଶାଳୀ ଚିକିତ୍ସା ପ୍ରଦାନ କରିବାକୁ କୁହାଯାଇଛି। ଘରେ ସାମାନ୍ୟ ଅସୁସ୍ଥ ବ୍ୟକ୍ତିଙ୍କ ଯତ୍ନ ନେବାକୁ ମଧ୍ୟ କୁହାଯାଇଛି।
୬୦ ବର୍ଷରୁ ଅଧିକ ବୟସ୍କ ବ୍ୟକ୍ତି, ଦୁର୍ବଳ ବ୍ୟକ୍ତିଙ୍କ ଯତ୍ନ ନେବାକୁ କୁହାଯାଇଛି। ସିଙ୍ଗାପୁରବାସୀଙ୍କୁ ମାସ୍କ ପିନ୍ଧିବାକୁ ଏବଂ ଅସୁସ୍ଥ ଥିଲେ ଘରେ ରହିବାକୁ ଏବଂ ଟୀକାନେବାକୁ ପରାମର୍ଶ ଦିଆଯାଇଛି। ବରିଷ୍ଠ ନାଗରିକ କିମ୍ବା ଗୁରୁତର ରୋଗରେ ପୀଡିତ ଲୋକମାନଙ୍କ ପାଇଁ ବର୍ଷକୁ ଥରେ ଟୀକାକରଣ କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ କାରଣ ସେମାନଙ୍କୁ ସହଜରେ ସଂକ୍ରମଣ ହେବାର ଆଶଙ୍କା ଥିବାରୁ ସେମାନେ ଅଧିକ ଅସୁରକ୍ଷିତ ବୋଲି ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି ।