ମୁମ୍ବାଇରେ ବିଲ୍‌ବୋର୍ଡ ପଡ଼ିବା ଘଟଣା: ମୃତକଙ୍କ ମଧ୍ୟରେ ଅଛନ୍ତି ଅବସରପ୍ରାପ୍ତ ଏଟିସି ମ୍ୟାନେଜର ଏବଂ ତାଙ୍କ ପତ୍ନୀ

ମୁମ୍ବାଇ: ସୋମବାର ଦିନ ମୁମ୍ବାଇରେ ଏକ ବଡ଼ ଧୂଳି ଝଡ଼ରେ ଘାଟଗୋପର ଅଞ୍ଚଳରେ ଏକ ବିରାଟ ବିଲ୍‌ବୋର୍ଡ ଭୁଶୁଡ଼ି ପଡ଼ିବା ଘଟଣାରେ ମୃତ୍ୟୁବରଣ କରିଥିବା ୧୬ ଜଣଙ୍କ ମଧ୍ୟରେ ଜଣେ ଅବସରପ୍ରାପ୍ତ ଏୟାର ଟ୍ରାଫିକ୍ କଣ୍ଟ୍ରୋଲ୍ (ଏଟିସି) ମ୍ୟାନେଜର ଏବଂ ତାଙ୍କ ପତ୍ନୀ ବି ଅଛନ୍ତି।
ପୂର୍ବ ମୁମ୍ବାଇର ଏକ ପେଟ୍ରୋଲ ପମ୍ପ ଉପରେ ୧୦୦ ଫୁଟର ହୋର୍ଡିଂ ଖସିଯିବା ପରେ ବୁଧବାର ରାତିରେ ଅବସରପ୍ରାପ୍ତ ଏଟିସି ମ୍ୟାନେଜର ମନୋଜ ଚାନସୋରିଆ ଏବଂ ୬୦ ବର୍ଷୀୟା ତାଙ୍କ ପତ୍ନୀ ଅନିତାଙ୍କ ମୃତଦେହ ସେମାନଙ୍କ କାର ଭିତରୁ ମିଳିଛି।

ପେଟ୍ରୋଲ ପମ୍ପ ଉପରେ ବିଶାଳ ହୋର୍ଡିଂ ପଡ଼ିବା ପରେ ସେମାନେ ତଳେ ଫସି ରହିଥିବା ଅନ୍ୟ ୧୦୦ ଜଣଙ୍କ ମଧ୍ୟରେ ଥିଲେ। ଚାନସୋରିଆ ଚଳିତବର୍ଷ ମାର୍ଚ୍ଚରେ ମୁମ୍ବାଇ ଏଟିସିର ଜେନେରାଲ ମ୍ୟାନେଜର ଭାବରେ ଅବସର ନେଇଥିଲେ। ଅବସର ପରେ ଦମ୍ପତି ଜବଲପୁରକୁ ପଳାଇଥିଲେ।

ସେହିପରି ଶ୍ରୀମତୀ ଚାନସୋରିଆଙ୍କ ପାଇଁ ଭିସା ଔପଚାରିକତା ପୂରଣ କରିବାକୁ ସେମାନେ କିଛି ଦିନ ମୁମ୍ବାଇରେ ଥିଲେ ବୋଲି ପୁଲିସ କହିଛି। ସେମାନଙ୍କର କାର୍ଯ୍ୟ ସମାପ୍ତ ହେବା ପରେ ଦମ୍ପତି ଜବଲପୁର ଅଭିମୁଖେ ଯାଉଥିଲେ ଓ ବାଟରେ ଅଟକି ପେଟ୍ରୋଲ୍‌ ପମ୍ପରେ ପେଟ୍ରୋଲ ଭରିଥିଲେ। ସେହି ସମୟରେ ହିଁ ଏହି ଦୁର୍ଘଟଣା ଘଟିଥିଲା।

ଏହି ଦୁଃଖଦ ଘଟଣାରେ ଏପର୍ଯ୍ୟନ୍ତ ୧୬ ଜଣଙ୍କର ମୃତ୍ୟୁ ଘଟିଥିବା ବେଳେ ୪୧ ଜଣ ଗୁରୁତର ଆହତ ହୋଇଛନ୍ତି। ଉଦ୍ଧାର ହୋଇଥିବା ଲୋକଙ୍କ ମଧ୍ୟରୁ ୩୪ ଜଣ ବଞ୍ଚିଛନ୍ତି ଏବଂ ମୁମ୍ବାଇର ବିଭିନ୍ନ ଡାକ୍ତରଖାନାରୁ ଚିକିତ୍ସା ପରେ ଡିସଚାର୍ଜ ହୋଇଛନ୍ତି।