ବିନମ୍ର ହେବାକୁ ଅଶନୀରଙ୍କୁ କୋର୍ଟଙ୍କ ପରାମର୍ଶ

ନୂଆଦିଲ୍ଲୀ : ବିନମ୍ର ହେବାକୁ ଭାରତପେ’ର ପ୍ରତିଷ୍ଠାତା ଅଶନୀର ଗ୍ରୋଭରଙ୍କୁ ଦିଲ୍ଲୀ ହାଇକୋର୍ଟ ପରାମର୍ଶ ଦେଇଛନ୍ତି। ଅଶନୀର ଓ ତାଙ୍କ ପତ୍ନୀଙ୍କ ବି‌ରୋଧରେ କଂପାନି ଅର୍ଥ ଆତ୍ମସାତ ଅଭିଯୋଗ ଆଣିଛି। କଂପାନିରୁ ଉଭୟଙ୍କୁ ବିଦା ହେବାକୁ ପଡ଼ିଛି। ଉଭୟ କଂପାନି କର୍ତ୍ତୃପକ୍ଷ ଓ ଅଶନୀରଙ୍କ ମଧ୍ୟରେ ଆଇନଗତ ଲଢ଼େଇ ଚାଲିଥିବା ବେଳେ ସୋସିଆଲ ମିଡିଆରେ କିନ୍ତୁ ପରସ୍ପର ଉପରେ ଆକ୍ଷେପ ଜାରି ରହିଛି। ଅନେକ ସମୟରେ ଅଶନୀର ବହୁ ଆପତ୍ତିଜନକ ମନ୍ତବ୍ୟ ଦେଉଛନ୍ତି ଯାହାକୁ ନେଇ ଭାରତପେ’ କର୍ତ୍ତୃପକ୍ଷ ଆପତ୍ତି ଉଠାଇଛନ୍ତି।

ଏ ସମ୍ପର୍କିତ ଏକ ମାମଲାର ଶୁଣାଣି କରି ଦିଲ୍ଲୀ ହାଇକୋର୍ଟ କହିଛନ୍ତି ଯେ ଗ୍ରୋଭର ଏବଂ ତାଙ୍କ ପରିବାର ସଦସ୍ୟ କୌଣସି ଆପତ୍ତିଜନକ ମନ୍ତବ୍ୟଠାରୁ ଦୂରେଇ ରହିବା ଉଚିତ। ସୋସିଆଲ ମିଡିଆ କ’ଣ ଆମକୁ ଏତେ ତଳକୁ ଖସାଇ ଦେଇଛି କି ବୋଲି କୋର୍ଟ ପ୍ରଶ୍ନ କରିଛନ୍ତି। ଆପତ୍ତିଜନକ ଆରୋପ ପ୍ରତ୍ୟାରୋପରୁ ଦୂରେଇ ରହିବା ଲାଗି ନିଜ ପକ୍ଷଙ୍କୁ ବୁଝାଇବା ପାଇଁ କୋର୍ଟ ସେମାନଙ୍କ ଆଇନଜୀବୀଙ୍କୁ କହିଛନ୍ତି।