ନୂଆଦିଲ୍ଲୀ : ସରକାରୀ ଅର୍ଥରେ ମସଜିଦର ଇମାମଙ୍କୁ ଦରମା ଦେବା ସମ୍ବିଧାନର ଉଲ୍ଲଙ୍ଘନ ବୋଲି କହିଛନ୍ତି କେନ୍ଦ୍ରୀୟ ସୂଚନା କମିସନ । ଏ ପ୍ରସଙ୍ଗରେ ୧୯୯୩ରେ ସୁପ୍ରିମକୋର୍ଟ ଦେଇଥିବା ରାୟ ସମ୍ବିଧାନର ଉଲ୍ଲଙ୍ଘନ କରିବା ସହ ଅଯଥା ସାଂପ୍ରଦାୟିକ ଉତ୍ତେଜନା ସୃଷ୍ଟି କରୁଛି ବୋଲି କମିସନ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଏକ ଆରଟିଆଇ ଆବେଦନର ଶୁଣାଣି କରି ସୂଚନା କମିସନର ଉଦୟ ମହୁରକର କହିଛନ୍ତି ଯେ ସମ୍ବିଧାନରେ ଥିବା ବ୍ୟବସ୍ଥା ଅନୁସାରେ ଟିକସ ଦାତାଙ୍କ ଅର୍ଥ କୌଣସି ଏକ ନିର୍ଦ୍ଦିଷ୍ଟ ଧର୍ମର ସୁବିଧା ପାଇଁ ବ୍ୟବହାର କରିହେବ ନାହିଁ । ସମ୍ବିଧାନର ଧାରା ୨୫ରୁ ୨୮ ଯେପରି ଠିକ ଭାବରେ ପାଳନ ହେବ ତାହା ନିଶ୍ଚିତ କରିବାକୁ କେନ୍ଦ୍ର ସରକାର ଆବଶ୍ୟକ ପଦକ୍ଷେପ ନେବାକୁ ସେ ନିର୍ଦ୍ଦେଶ ଦେଇଛନ୍ତି ।
କମିସନ ଆହୁରି ମଧ୍ୟ କହିଛନ୍ତି ଯେ ୧୯୪୭ ପୂର୍ବରୁ ଇମାମମାନଙ୍କୁ ସରକାରୀ ଅର୍ଥରେ ଦରମା ଦେବାର ବ୍ୟବସ୍ଥା ଥିଲା । ଏହା ଭାରତୀୟ ମୁସଲିମମାନଙ୍କ ଏକ ଗୋଷ୍ଠୀକୁ ବିଭାଜନ ପାଇଁ ପ୍ରେତ୍ସାହିତ କରିଥିଲା । ଏଣୁ ଏପରି କିଛି କରିବା ପୂର୍ବରୁ ଇତିହାସକୁ ଦେଖାଯିବା ଉଚିତ ।
ଆରଟିଆଇ କର୍ମୀ ସୁଭାଷ ଅଗ୍ରଓ୍ବାଲ ନିଜ ଆରଟିଆଇ ଆବେଦନରେ ଦିଲ୍ଲୀ ସରକାର ଓ ଓ୍ବାକଫ ବୋର୍ଡ ଇମାମ ମାନଙ୍କ ଦରମା ପାଇଁ କେତେ ବ୍ୟୟ କରୁଛନ୍ତି ସେ ସଂପର୍କିତ ତଥ୍ୟ ମାଗିଥିଲେ । କିନ୍ତୁ ସେ ଏହାର କୌଣସି ସନ୍ତୋଷଜନକ ଉତ୍ତର ପାଇପାରିନଥିଲେ । ଏହାର ବିଚାର କରି ସୁଭାଷଙ୍କୁ ୨୫ ହଜାର ଟଙ୍କାର କ୍ଷତିପୂରଣ ଦେବାକୁ କମିସନ ନିର୍ଦ୍ଦେଶ ଦେଇଛନ୍ତି ।