କୋଭିଡ-୧୯ର ଡେଲଟା ଭାରିଆଣ୍ଟ ଉପରେ ପ୍ରଭାବଶାଳୀ କୋଭାକ୍ସିନ୍ ଓ କୋଭିସିଲ୍ଡ ଟିକା
ଭାରତରେ ୨୨ଜଣ ଡେଲଟା ପ୍ଲସ ଭାରିଆଣ୍ଟ ଦ୍ୱାରା ସଂକ୍ରମିତ
ନୂଆଦିଲ୍ଲୀ: ଭାରତରେ ଦିଆଯାଉଥିବା କୋଭାକ୍ସିନ୍ ଏବଂ କୋଭିସିଲ୍ଡ ଟିକା କରୋନାଭାଇରସର ଡେଲଟା ଭାରିଆଣ୍ଟ ବିରୋଧରେ ପ୍ରଭାବଶାଳୀ | ଆଜି ହୋଇଥିବା ସାମ୍ବାଦିକ ସମ୍ମିଳନୀରେ ସ୍ୱାସ୍ଥ୍ୟ ସଚିବ ରାଜେଶ ଭୂଷଣ ଏହା କହିଛନ୍ତି। ଏହା ସହ ସେ କହିଛନ୍ତି ଯେ, କରୋନା ଭୂତାଣୁ ଭାରିଆଣ୍ଟର ପ୍ରସାରଣ କ୍ଷମତାକୁ ଦେଖି ତାକୁ ୨ଭାଗରେ ବିଭକ୍ତ କରାଯାଇଛି | ଗୋଟେ ହେଉଛି ‘ଭାରିଆଣ୍ଟ ଅଫ ଇଣ୍ଟରେଷ୍ଟ’ ଓ ‘ଭାରିଆଣ୍ଟ ଅଫ କନସର୍ଣ୍ଣ’ |
Sambad is now on WhatsApp
Join and get latest news updates delivered to you via WhatsApp
ନୂଆଦିଲ୍ଲୀରେ ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରି ରାଜେଶ ଭୂଷଣ କହିଛନ୍ତି ଯେ, ଭାରତ ସମେତ ୮୦ଟି ଦେଶରେ ଡେଲଟା ଭାରିଆଣ୍ଟ ଦେଖିବାକୁ ମିଳିଛି। ଏହା ସହ ୯ଟି ଦେଶ – ଆମେରିକା, ବ୍ରିଟେନ, ପର୍ତ୍ତୁଗାଲ, ସୁଇଜରଲାଣ୍ଡ, ଜାପାନ, ପୋଲାଣ୍ଡ, ନେପାଳ, ଚୀନ୍, ଋଷ ଏବଂ ଭାରତରେ ଡେଲଟା ପ୍ଲସ୍ ଭାରିଆଣ୍ଟ ଦେଖିବାକୁ ମିଳିଛି। ଆଜି ପର୍ଯ୍ୟନ୍ତ ଭାରତରେ ଡେଲଟା ପ୍ଲସ୍ ଭାରିଆଣ୍ଟ ଦ୍ୱାରା ମୋଟ ୨୨ଜଣ ସଂକ୍ରମିତ ହୋଇଛନ୍ତି। ଏହି ଭାରିଆଣ୍ଟକୁ ବର୍ତ୍ତମାନ ‘ଭାରିଆଣ୍ଟ ଅଫ ଇଣ୍ଟରେଷ୍ଟ’ରେ ଶ୍ରେଣୀଭୁକ୍ତ କରାଯାଇଛି। ଏହା ଏପର୍ଯ୍ୟନ୍ତ ‘ଭାରିଆଣ୍ଟ ଅଫ କନସର୍ଣ୍ଣ’ ହୋଇନାହିଁ | ଡେଲଟା ପ୍ଲସ୍ ଭାରିଆଣ୍ଟ ଦ୍ୱାରା ସଂକ୍ରମିତ ହୋଇଥିବା ୨୨ଜଣଙ୍କ ମଧ୍ୟରୁ ମହାରାଷ୍ଟ୍ରର ଜଲଗାଓଁ ଏବଂ ରତ୍ନଗିରି ଜିଲ୍ଲାରୁ ୧୬ଜଣ ରହିଛନ୍ତି | ଏହା ସହ ଅବଶିଷ୍ଟ ସଂକ୍ରମିତ କେରଳ ଏବଂ ମଧ୍ୟପ୍ରଦେଶରୁ ଚିହ୍ନଟ ହୋଇଥିବା ଜଣାପଡ଼ିଛି |
ସ୍ୱାସ୍ଥ୍ୟ ମନ୍ତ୍ରାଳୟ ମହାରାଷ୍ଟ୍ର, ମଧ୍ୟପ୍ରଦେଶ ଏବଂ କେରଳକୁ ଚିଠି ଲେଖି ଡେଲଟା ପ୍ଲସ୍ ଭାରିଆଣ୍ଟ ସଂକ୍ରମଣ ଉପରେ ତୀକ୍ଷ୍ଣ ନଜର ରଖିବାକୁ କହିଛି।