ସେପ୍ଟେମ୍ବର ସୁଦ୍ଧା ୨ ବର୍ଷରୁ ଊର୍ଦ୍ଧ୍ବ ପିଲାଙ୍କ ପାଇଁ ମିଳିବ ‘କୋଭାକ୍ସିନ୍‌’ ଟିକା: ‘ଏମ୍‌ସ୍‌’ ମୁଖ୍ୟ

ନୂଆଦିଲ୍ଲୀ: ସେପ୍ଟେମ୍ବର ସୁଦ୍ଧା ୨ ବର୍ଷରୁ ଊର୍ଦ୍ଧ୍ବ ବୟସ୍କ ପିଲାଙ୍କ ନିମନ୍ତେ ‘କୋଭାକ୍ସିନ୍‌’ ଟିକା ମିଳିଯିବ ବୋଲି ମଙ୍ଗଳବାର ଦିନ ଦିଲ୍ଲୀ ‘ଏମ୍‌ସ୍‌’ର ନିର୍ଦେଶକ ଡାକ୍ତର ରଣଦୀପ ଗୁଲେରିଆ ଗଣମାଧ୍ୟମକୁ କହିଛନ୍ତି।

ଫୁସ୍‌ଫୁସ୍‌ ଏବଂ ଶ୍ବାସପ୍ରଶ୍ବାସ ରୋଗ ସମ୍ବନ୍ଧୀୟ ପ୍ରବୀଣ ବିଶେଷଜ୍ଞ ତଥା ଭାରତ ସରକାରଙ୍କ କୋଭିଡ୍‌-୧୯ ଟାସ୍କ୍‌ ଫୋର୍ସର ବିଶିଷ୍ଟ ସଦସ୍ୟ ଡାକ୍ତର ଗୁଲେରିଆ ଗଣମାଧ୍ୟମକୁ କହିଛନ୍ତି ଯେ, ୨ ଓ ୩ୟ ପର୍ଯ୍ୟାୟ ପରୀକ୍ଷା ପରେ ସେପ୍ଟେମ୍ବର ସୁଦ୍ଧା ପିଲାମାନଙ୍କ ପାଇଁ ଉଦ୍ଦିଷ୍ଟ ‘କୋଭାକ୍ସିନ୍‌’ର ତଥ୍ୟାବଳୀ ମିଳିଯିବ ଏବଂ ସେହି ମାସରେ ହିଁ ଟିକା ପ୍ରୟୋଗ ପାଇଁ ଅନୁମୋଦନ ଦିଆଯିବ ବୋଲି ମନେହେଉଛି।

ସେ ଆହୁରି ମଧ୍ୟ କହିଛନ୍ତି ଯେ, ଭାରତରେ ଯଦି ‘ଫାଇଜର୍‌-ବାୟୋଏନ୍‌ଟେକ୍‌’ ଟିକାକୁ ଅନୁମୋଦନ ମିଳିଯାଏ, ତେବେ ତାହା ପିଲାମାନଙ୍କ ପାଇଁ ବିକଳ୍ପ ହୋଇପାରିବ।

ଟିକା ପରୀକ୍ଷା ନିମନ୍ତେ ଦିଲ୍ଲୀ ‘ଏମ୍‌ସ୍‌’ ପିଲାମାନଙ୍କୁ ଚୟନ କରି ସାରିଛି। ଜୁନ୍ ୭ ରୁ ଆରମ୍ଭ ହୋଇଥିବା ଏହି ଚୟନ ପ୍ରକ୍ରିୟାରେ ୨ ରୁ ୧୭ ବର୍ଷ ବୟସ୍କ ପିଲାଏ ଅନ୍ତର୍ଭୁକ୍ତ ଅଛନ୍ତି।

ସର୍ବନିମ୍ନ ଦୁଇ ବର୍ଷ ବୟସ୍କ ଶିଶୁଙ୍କ କ୍ଷେତ୍ରରେ ଦ୍ବିତୀୟ ଏବଂ ତୃତୀୟ ପର୍ଯ୍ୟାୟ ‘କୋଭାକ୍ସିନ୍‌’ ପରୀକ୍ଷା ନିମନ୍ତେ ‘ଡିସିଜିଆଇ’ ମେ ୧୨ ତାରିଖ ଦିନ ‘ଭାରତ ବାୟୋଟେକ୍‌’କୁ ଅନୁମତି ଦେଇଥିଲେ।