ଆସନ୍ତା ଫେବ୍ରୁଆରିରେ ଉପଲବ୍ଧ ହୋଇପାରେ କରୋନା ଟିକା କୋଭାକ୍ସିନ
ହାଇଦ୍ରାବାଦ : ଭାରତ ବାୟୋଟେକ ଦ୍ବାରା ପ୍ରସ୍ତୁତ କରୋନା ଟିକା କୋଭାକ୍ସିନକୁ ଧାର୍ଯ୍ୟ ସମୟର କିଛି ମାସ ପୂର୍ବରୁ ବଜାରକୁ ଛଡ଼ାଯାଇପାରେ । ଏହି ଟିକାକୁ ଆସନ୍ତା ୨୦୨୧ ଜୁନ ସୁଦ୍ଧା ବଜାରକୁ ଛାଡ଼ିବାକୁ କମ୍ପାନି ଲକ୍ଷ୍ୟ ରଖିଥିବାବେଳେ ମିଳିଥିବା ନୂଆ ସୂଚନା ଅନୁସାରେ ଏହାକୁ ଆସନ୍ତା ଫେବ୍ରୁଆରିରେ ହିଁ ଲଞ୍ଚ୍ କରାଯିବ ।
Sambad is now on WhatsApp
Join and get latest news updates delivered to you via WhatsApp
ଚଳିତ ମାସଠାରୁ ଆରମ୍ଭ ହୋଇଥିବା କୋଭାକ୍ସିନର ଚୂଡ଼ାନ୍ତ ପର୍ଯ୍ୟାୟ ପରୀକ୍ଷଣର ପ୍ରାରମ୍ଭିକ ରିପୋର୍ଟ ସନ୍ତୋଷଜନକ ଥିବାରୁ ଏହି ଟିକାକୁ ଜୁନ ବଦଳରେ ଫେବ୍ରୁଆରି କିମ୍ବା ମାର୍ଚ୍ଚରେ ହିଁ ଲଞ୍ଚ୍ କରାଯିବାର ସମ୍ଭାବନା ରହିଛି ବୋଲି ଆଇସିଏମଆରର ବୈଜ୍ଞାନିକ ରଜନୀକାନ୍ତ କହିଛନ୍ତି । ସେ କହିଛନ୍ତି ଯେ କୋଭାକ୍ସିନ ନିରାପଦ ଥିବା ପ୍ରାରମ୍ଭିକ ରିପୋର୍ଟରୁ ଜଣାପଡ଼ୁଛି ।
ଗତ ମାସରେ ବାୟୋଟେକର କାର୍ଯ୍ୟନିର୍ବାହୀ ନିର୍ଦ୍ଦେଶକ ସାଇ ପ୍ରସାଦ କହିଥିଲେ ଯେ, ଆସନ୍ତା ବର୍ଷ ଜୁନ ସୁଦ୍ଧା ଏହି ଟିକା ଲୋକଙ୍କୁ ଦେବା ପାଇଁ ପ୍ରସ୍ତୁତ ହୋଇଯାଇଥିବ । ତେବେ ଯଦି ସରକାର ଜରୁରୀକାଳୀନ ଭିତ୍ତିରେ ଆଦେଶ ଦିଅନ୍ତି ତେବେ ଏହାକୁ ତା ପୂର୍ବରୁ ବି ବଜାରକୁ ଛଡ଼ାଯାଇପାରେ ।
ଚଳିତ ମାସଠାରୁ କୋଭାକ୍ସିନର ୩ୟ ପର୍ଯ୍ୟାୟ ପରୀକ୍ଷଣ ଆରମ୍ଭ ହୋଇଛି । ଏଥିଲାଗି ସାରା ଦେଶରେ ପ୍ରାୟ ୨୬ ହଜାର ସ୍ବେଚ୍ଛାସେବୀଙ୍କ ପଂଜୀକରଣ କରାଯାଇଛି । ଦେଶର ୩୦ଟି ପରୀକ୍ଷଣ କେନ୍ଦ୍ରରେ ଏହି ପରୀକ୍ଷଣ କରାଯାଉଛି ।
ଏଠାରେ ଉଲ୍ଲେଖଯୋଗ୍ୟ ଯେ କୋଭାକ୍ସିନ ଟିକାକୁ ଭାରତ ସରକାରଙ୍କ ଭାରତୀୟ ଭେଷଜ ଅନୁସଂଧାନ ପରିଷଦ (ଆଇସିଏମଆର) ଅନ୍ତର୍ଗତ ଇଣ୍ଡିଆନ ଇନଷ୍ଟିଚ୍ୟୁଟ ଅଫ ଭାଇରୋଲୋଜୀ ଦ୍ବାରା ବିକଶିତ କରାଯାଉଛି ।