ଅମ୍ଲଜାନ ପରିବହନ ଗାଡ଼ି ଉପରେ ଲାଗୁ ହେବନି କରୋନା କଟକଣା, ଶିଳ୍ପ ବ୍ୟବହାର ଲାଗି ଅମ୍ଳଜାନ ଯୋଗାଣ ବନ୍ଦ ହେବ : ଗୃହ ମନ୍ତ୍ରାଳୟ
ନୂଆଦିଲ୍ଲୀ: କରୋନାର ଦ୍ବିତୀୟ ଲହର ସହ ଲଢ଼ୁଥିବା ଭାରତ ଏବେ ଅମ୍ଲଜାନ ଅଭାବ ସହ ଲଢ଼ୁଛି। ଦେଶରେ ବିଭିନ୍ନ ରାଜ୍ୟରେ ଅମ୍ଲଜାନର ଅଭାବ ଦେଖାଦେଉଥିବା ବେଳେ ଏହା ଏବେ କେନ୍ଦ୍ର ଓ ବିଭିନ୍ନ ରାଜ୍ୟର ସରକାରଙ୍କ ମୁଣ୍ଡବିନ୍ଧାର କାରଣ ପାଲଟିଲାଣି। ଅମ୍ଲଜାନ ଅଭାବରୁ ଦେଶର ବିଭିନ୍ନ କୋଣରେ କରୋନା ଆକ୍ରାନ୍ତଙ୍କ ମୃତ୍ୟୁ ହେବା ପରେ ଏବେ ଅମ୍ଳଜାନ ପରିବହନକୁ ତ୍ୱରାନ୍ୱିତ କରିବାକୁ ଗୃହ ମନ୍ତ୍ରାଳୟ ନିର୍ଦ୍ଦେଶନାମା ଜାରି କରିଛି । ରାଜ୍ୟ-ରାଜ୍ୟ ମଧ୍ୟରେ ମେଡିକାଲ ବ୍ୟବହାର୍ଯ୍ୟ ଅମ୍ଳଜାନର ପରିବହନ ଉପରେ କୌଣସି ପ୍ରତିବନ୍ଧକ ଲଗାଯିବ ନାହିଁ ଏବଂ ସେହି ଅନୁଯାୟୀ ଅମ୍ଳଜାନର ମାଗଣା ଆନ୍ତଃ ରାଜ୍ୟ ପରିବହନକୁ ଅନୁମତି ଦେବାକୁ ଗୃହ ମନ୍ତ୍ରାଳୟ ନିର୍ଦ୍ଦେଶ ଦେଇଛି।
Sambad is now on WhatsApp
Join and get latest news updates delivered to you via WhatsApp
ଅମ୍ଲଜାନ ଅଭାବକୁ ଦୂର କରିବା ପାଇଁ ଗୃହ ମନ୍ତ୍ରାଳୟ ପକ୍ଷରୁ ଦିଆଯାଇଥିବା ନିର୍ଦ୍ଦେଶ ଗୁଡ଼ିକ ହେଲା:
– ରାଜ୍ୟଗୁଡିକ ମଧ୍ୟରେ ମେଡିକାଲ ଅମ୍ଳଜାନର ପରିବହନ ଉପରେ କୌଣସି ପ୍ରତିବନ୍ଧକ ଲଗାଯିବ ନାହିଁ ଏବଂ ପରିବହନ କର୍ତ୍ତୃପକ୍ଷଙ୍କୁ ସେହି ଅନୁଯାୟୀ ଅମ୍ଳଜାନ ପରିବହନ କରୁଥିବା ଯାନଗୁଡିକର ମାଗଣା ଆନ୍ତଃ ରାଜ୍ୟ ଗତିବିଧିକୁ ଅନୁମତି ଦେବେ।
– ଅମ୍ଳଜାନ ଉତ୍ପାଦନକାରୀ ଏବଂ ଯୋଗାଣକାରୀଙ୍କ ଉପରେ କେବଳ ନିଜ ରାଜ୍ୟ / କେନ୍ଦ୍ରଶାସିତ ଅଞ୍ଚଳରେ ଥିବା ଡାକ୍ତରଖାନାଗୁଡ଼ିକରେ ଅମ୍ଳଜାନ ଯୋଗାଣକୁ ସୀମିତ ରଖିବା ପାଇଁ କୌଣସି ପ୍ରତିବନ୍ଧକ ଲଗାଯିବ ନାହିଁ।
– ସହରରେ ଅମ୍ଳଜାନ ପରିବହନ କରୁଥିବା ଯାନଗୁଡିକର ଗତାଗତ ଉପରେ କଟକଣା ରହିବ ନାହିଁ ।
No restriction shall be imposed on the movement of Medical Oxygen between the State and transport authorities shall be instructed to accordingly allow free inter-state movement of oxygen-carrying vehicles: MHA #COVID19 pic.twitter.com/EvOkeuT7By
— ANI (@ANI) April 22, 2021
– କୌଣସି କର୍ତ୍ତୃପକ୍ଷ ସେମାନଙ୍କ ଅଞ୍ଚଳ ଦେଇ ଯାଉଥିବା ଅମ୍ଳଜାନ ପରିବହନ ଯାନକୁ କୌଣସି ନିର୍ଦ୍ଦିଷ୍ଟ ଜିଲ୍ଲା (ଅଞ୍ଚଳ) କିମ୍ବା କ୍ଷେତ୍ର ପାଇଁ ଅମ୍ଲଜାନ ଯୋଗାଣ ପାଇଁ ସଂଲଗ୍ନ କରିବେ ନାହିଁ।
– ଏପ୍ରିଲ ୨୨ଠାରୁ ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ଶିଳ୍ପରେ ବ୍ୟବହାର ଲାଗି ଉଦ୍ଦିଷ୍ଟ ଅମ୍ଳଜାନ ଯୋଗାଣ ବନ୍ଦ କରାଯିବ।
ଉପରୋକ୍ତ ନିର୍ଦ୍ଦେଶଗୁଡ଼ିକର କାର୍ଯ୍ୟକାରୀତା ପାଇଁ ଜିଲ୍ଲାପାଳ, ଉପ-ଜିଲ୍ଲାପାଳ, ମୁନିସପାଲ୍ କମିସନର୍ ଏବଂ ବରିଷ୍ଠ ପୁଲିସ ଅଧୀକ୍ଷକ, ପୁଲିସ ଅଧୀକ୍ଷକ, ଉପ-ଅଧୀକ୍ଷକ ବ୍ୟକ୍ତିଗତ ଭାବେ ଦାୟୀ ରହିବେ।