୨୪ଟି ରାଜ୍ୟରେ କମିଛି କରୋନା ସଂକ୍ରମଣ ହାର, ଦେଶରେ ଏବେ ୯୦%ରହିଛି ସୁସ୍ଥତା ହାର: କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ
ନୂଆଦିଲ୍ଲୀ: ଗତ ୨ମାସ ହେଲାଣି କରୋନାର ଦ୍ଵିତୀୟ ଲହର ଭାରତକୁ କଲବଲ କରୁଛି | ହଠାତ ସଂକ୍ରମଣ ହାର ବଢ଼ିଯିବା ସହ ଲୋକଙ୍କ ଜୀବନହାନୀ ହୋଇଛି | ହେଲେ ଏମଧ୍ୟରେ ଏକ ଭଲ ଖବର ଆସିଛି | ବିଭିନ୍ନ ରାଜ୍ୟରେ ଲକଡାଉନ ପାଇଁ ଏବେ ୨୪ଟି ରାଜ୍ୟରେ କରୋନା ସଂକ୍ରମଣ ହାର କମ ହୋଇଛି | ଏହା ସହ ଦେଶରେ ସୁସ୍ଥତା ହାର ୯୦%ରେ ପହଞ୍ଚିଛି ବୋଲି ଆଜି ସାମ୍ବାଦିକ ସମ୍ମିଳନୀରେ କହିଛନ୍ତି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟର ଯୁଗ୍ମ ସଚିବ ଲବ ଅଗ୍ରୱାଲ | ଏହା ସହ ମେ’ ୨୬ରେ ସବୁଠାରୁ ଅଧିକ ୨୨,୧୭,୩୨୦ଟି ନମୁନା ପରୀକ୍ଷା କରାଯାଇଥିବା ନେଇ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ପକ୍ଷରୁ କୁହାଯାଇଛି |
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ଡାକ୍ତର ଭି.କେ.ପୌଲ କହିଛନ୍ତି ଯେ, ଏହା ଆଶ୍ୱାସନାର ବିଷୟ ଯେ ଦ୍ୱିତୀୟ ତରଙ୍ଗରେ ସଂକ୍ରମିତଙ୍କ ସଂଖ୍ୟା କମ ହେଉଛି | ଠିକ ସମୟରେ ଲାଗିଥିବା ପ୍ରତିବନ୍ଧକଗୁଡିକ ଖୋଲିଲେ ସଂକ୍ରମିତଙ୍କ ସଂଖ୍ୟାକୁ ଆମେ କମ ରଖିପାରିବା | ଏହା ସହ ଉତ୍ତରପ୍ରଦେଶରେ ଭୁଲବଶତଃ ୨୦ଜଣକୁ ୨ଟି ଟିକା ଦିଆଯିବାକୁ ନେଇ ସେ କହିଛନ୍ତି ଯେ, ଆମର ପ୍ରୋଟୋକଲ୍ ସ୍ପଷ୍ଟ ଯେ, ଦିଆଯାଇଥିବା ଉଭୟ ଡୋଜ ସମାନ ଟିକା ହେବା ଉଚିତ୍ | ଏହି ଘଟଣାର ଅନୁସନ୍ଧାନ କରାଯିବା ଉଚିତ୍। ଯଦିଓ ଏହା ଘଟିଛି ତେବେ ଏହା ଚିନ୍ତାର କାରଣ ହେବା ଉଚିତ୍ ନୁହେଁ |
ଏହା ସହ ଫାଇଜର ଟିକା କିଣିବା ନେଇ ଡାକ୍ତର ଭି.କେ.ପୌଲ କହିଛନ୍ତି ଯେ, ଭାରତକୁ ଫାଇଜର ଟିକା ଦେବା ନେଇ ଆମେ କମ୍ପାନିକୁ ଅନୁରୋଧ କରିଛୁ | ଆସନ୍ତା ଜୁଲାଇ ମଧ୍ୟରେ ସେମାନେ ଟିକାର କିଛି ଡୋଜ ଆମକୁ ଦେବା ପାଇଁ କହିଛନ୍ତି | ବିଶ୍ୱର ଅନ୍ୟ ରାଷ୍ଟ୍ର ପ୍ରତି କମ୍ପାନିର ଟିକା ଯୋଗାଇବା ନେଇ ଦାୟିତ୍ୱ ଥିବାରୁ ସେମାନେ ଅପେକ୍ଷା କରିବାକୁ ଅନୁରୋଧ କରିଛନ୍ତି | ଆମେ ଏହି ଅନୁରୋଧକୁ ପରୀକ୍ଷା କରୁଛୁ | ବର୍ତ୍ତମାନ ସୁଦ୍ଧା କୌଣସି ନିଷ୍ପତ୍ତି ନିଆଯାଇନାହିଁ |