ଗାଈଙ୍କ ପାଇଁ ବଞ୍ଚିଗଲା ସିଆରପିଏଫ ଯବାନଙ୍କ ଜୀବନ
ବିଜାପୁର: ଛତିଶଗଡ଼ର ବିଜାପୁର ଜିଲ୍ଲାରେ ନକ୍ସଲଙ୍କ ଦ୍ୱାରା ରଚାଯାଇଥିବା ଏକ ବଡଧରଣର ଷଡ଼ଯନ୍ତ୍ରକୁ ଗାଈଙ୍କ ଏକ ଦଳ ପଣ୍ଡ କରିଦେଇଛନ୍ତି | ନକ୍ସଲମାନେ ଯବାନଙ୍କୁ ଟାର୍ଗେଟ କରି ପ୍ରେସର ବୋମା ରଖିଥିବାବେଳେ ସେହି ରାସ୍ତା ଦେଇ ଗାଈ ଯିବା ଦ୍ୱାରା ଏଇ ଉଦ୍ୟମ ଫସର ଫାଟିଯାଇଥିଲା | ମିଳିଥିବା ସୂଚନା ମୁତାବକ ବିଜାପୁରରୁ ସୁକୁମାକୁ ରାସ୍ତା ସଂଯୋଗ ପାଇଁ କାମ ଚାଲିଥିଲା | ଏହି ଅଞ୍ଚଳଟି ମାଓ ଉପଦ୍ରୁତ ଅଂଚଳ ହୋଇଥିବାରୁ ରାସ୍ତାର ସୁରକ୍ଷା ଦାୟିତ୍ୱରେ ଥିଲେ ସିଆରପିଏଫ ଯବାନ | ଯବାନମାନଙ୍କ ୧୬୮ ବାଟାଲିୟନ ରାସ୍ତା ନିକଟରେ କ୍ୟାମ୍ପ କରି ରାସ୍ତାକୁ ଜଗୁଥିଲେ | ତେବେ ଯୋଗାଯୋଗ ବିଛିନ୍ନ କରିବାକୁ ଓ ସିଆରପିଏଫ ଯବାନଙ୍କୁ ଟାର୍ଗେଟ କରି ରାସ୍ତାର ଉଭୟ ପାର୍ଶ୍ୱରେ ମାଓବାଦୀମାନେ ଆଇଇଡି ବିସ୍ଫୋରକ ସହ ପ୍ରେସର ବୋମା ଲଗାଇଦେଇଥିଲେ |
Sambad is now on WhatsApp
Join and get latest news updates delivered to you via WhatsApp
କିଛି ସମୟ ପରେ ଯବାନଙ୍କୁ ନେଇ ଗାଡି ଆସିବାକୁ ଥିବାବେଳେ ଗାଈଙ୍କର ଏକ ଦଳ ଏହି ବାଟ ଦେଇ ଯାଇଥିଲେ | ଗାଈଙ୍କ ପାଦର ଚାପରେ ଏହି ପ୍ରେସର ବୋମା ଫାଟିଯାଇଥିଲା | ପ୍ରଚଣ୍ଡ ଶବ୍ଦ ହେବା ପରେ ଯବାନମାନେ ଏ ବାବଦରେ ଜାଣିପାରିଥିଲେ | ତେବେ ଏହି ବିସ୍ଫୋରଣରେ କୌଣସି ଯବାନଙ୍କର କୌଣସି କ୍ଷତି ହୋଇନଥିବାବେଳେ ଦୁଇଟି ଗାଈଙ୍କର ମୃତ୍ୟୁ ଘଟିଛି |
ପ୍ରତ୍ୟକ୍ଷଦର୍ଶୀ କହିଛନ୍ତି ଯେ ଗାଈଙ୍କ ବଡ ଦଳ ପ୍ରେସର ବୋମା ପୋତାଯାଇଥିବା ସ୍ଥାନରେ ବାରମ୍ବାର ପାଦ ରଖିବାରୁ ସେହି ଚାପରେ ଏହା ଫାଟିଯାଇଥିଲା | ଏହି ଘଟଣା ପରେ ଯବାନମାନେ ସ୍ଥାନୀୟ ଅଂଚଳରେ କମ୍ବିଙ୍ଗ ଅପରେସନକୁ ଜୋରଦାର କରିଛନ୍ତି |