ଇମ୍ଫାଲ: ମଣିପୁରରେ ଜଣେ ସିଆର୍‌ପିଏଫ୍‌ ଯବାନ ନିଜର ଦୁଇ ସହକର୍ମୀଙ୍କୁ ଗୁଳି କରି ହତ୍ୟା କରିବା ପରେ ଆତ୍ମହତ୍ୟା କରିଛନ୍ତି। ଗୁଳିମାଡ଼ରେ ୮ଜଣ ଯବାନ ମଧ୍ୟ ଗୁରୁତର ଆହତ ହୋଇଛନ୍ତି। ପଶ୍ଚିମ ଇମ୍ଫାଲରେ ଥିବା ୧୨୦ ସିଆର୍‌ପିଏଫ୍‌ ବାଟାଲିୟନ୍‌ର ଲାମ୍‌ଫେଲ୍‌ କ୍ୟାମ୍ପ୍‌ରେ ଆଜି ରାତି ପ୍ରାୟ ସାଢ଼େ ୮ଟା ବେଳେ ଏହି ବର୍ବର କାଣ୍ଡ ଘଟିଛି। ହାବିଲଦାର ସଞ୍ଜୟ କୁମାର ନିଜର ସରକାରୀ ବନ୍ଧୁକରେ ଜଣେ କନଷ୍ଟେବଳ ଓ ଜଣେ ସବ୍‌ ଇନ୍‌ସପେକ୍ଟରଙ୍କୁ ହତ୍ୟା କରିବା ସହ ଅନ୍ୟମାନଙ୍କ ଉପରେ ଗୁଳିମାଡ଼ କରିଥିଲେ। ପରେ ସେହି ବନ୍ଧୁକରେ ନିଜ ମୁଣ୍ଡକୁ ଗୁଳିକରି ଆତ୍ମହତ୍ୟା କରିଥିଲେ। ଆହତ ଯବାନମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି।