ବୁଧବାରଦିନ ମହାରାଷ୍ଟ୍ରର ଆଲିବାଗ ନିକଟରେ ସ୍ଥଳଭାଗ ଛୁଇଁବ ସାମୁଦ୍ରିକ ବାତ୍ୟା ନିସର୍ଗ
ମୁମ୍ବାଇ : ସାମୁଦ୍ରିକ ବାତ୍ୟା ନିସର୍ଗ ଆସନ୍ତା କାଲି ମହାରାଷ୍ଟ୍ରର ଆଲିବାଗ ନିକଟରେ ସ୍ଥଳଭାଗ ଛୁଇଁବ । ଏହା ଫଳରେ ମୁମ୍ବାଇ ମହାନଗରୀ ପାଇଁ ବିପଦ ଆଶଙ୍କା ବଢିଯାଇଛି । ଏହା ଦୃଷ୍ଟିରେ ରଖି ମୁମ୍ବାଇରେ ପ୍ରଶାସନ ପକ୍ଷରୁ ସତର୍କତାମୂଳକ ପଦକ୍ଷେପ ଗ୍ରହଣ କରାଯାଛି । ସମୁଦ୍ରକୂଳରେ ବୁଲାବୁଲି କରିବାକୁ ଲୋକମାନଙ୍କୁ ବାରଣ କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଭାରତୀୟ ପାଣିପାଗ ବିଭାଗ ପକ୍ଷରୁ କୁହାଯାଇଛି ଯେ ଆଜି ଆରବ ସାଗରରେ ଥିବା ଡିପଡିପ୍ରେସନ ଏକ ସିଭିୟର ସାଇକ୍ଲୋନରେ ପରିଣତ ହୋଇଛି । ଆସନ୍ତା କାଲି ଅପରାହ୍ଣରେ ଏହି ଭୀଷଣ ସାମୁଦ୍ରିକ ବାତ୍ୟା ମହାରାଷ୍ଟ୍ରର ଆଲିବାଗ ନିକଟରେ ସ୍ଥଳଭାଗ ଛୁଇଁବ । ସ୍ଥଳଭାଗ ଛୁଇଁବା ବେଳକୁ ପବନର ବେଗ ଘଣ୍ଟା ପ୍ରତି ୧୦୦ କିଲୋମିଟର ରହିବ । ଏହାକୁ ଦୃଷ୍ଟିରେ ରଖି ମହାରାଷ୍ଟ୍ରର ନାସିକ, ପୁନେ, ଥାନେ, ମୁମ୍ବାଇ, ପାଲଘର, ରାଇଗଡ, ଧୁଲେ, ନାନ୍ଦୁରବାର ଆଦି ଅଂଚଳରେ ସତର୍କତାମୂଳକ ପଦକ୍ଷେପ ନିଆଯାଇଛି । ପୂର୍ବରୁ ପାଣିପାଗ ବିଭାଗ ଅଟକଳ କରିଥିଲା ଯେ ଏହା ଗୁଜୁରାଟରେ ସ୍ଥଳଭାଗ ଛୁଇଁବ । କିନ୍ତୁ ନିସର୍ଗ ନିଜର ଗତି ବଦଳାଇବା ପରେ ମହାରାଷ୍ଟ୍ର ଉପକୂଳ ଆଡକୁ ଗତିକରୁଛି । ତେବେ ସ୍ଥିତିକୁ ନଜରରେ ରଖି ଉଭୟ ମହାରାଷ୍ଟ୍ର ଓ ଗୁଜୁରାଟରେ ଏନଡିଆରଏଫ ଟିମ ମୁତୟନ କରାଯାଇଛି ।
ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ଗୃହ ମନ୍ତ୍ରୀ ଅମିତ ଶାହା ସ୍ଥିତିର ସମୀକ୍ଷା କରିବା ସହ ଉଭୟ ମହାରାଷ୍ଟ୍ର ଓ ଗୁଜୁରାଟ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିଛନ୍ତି । ସ୍ଥିତିର ମୁକାବିଲା କରିବାକୁ କେନ୍ଦ୍ର ସରକାର ସବୁପ୍ରକାରର ସହାୟତା କରିବେ ବୋଲି ମୋଦୀ କହିଛନ୍ତି ।