ନାଚୁନାଚୁ ଧସିଗଲା ବିବାହ ମଣ୍ଡପ, ଅତିଥିଙ୍କର ହେଲା ଏଭଳି ଅବସ୍ଥା

ନୂଆଦିଲ୍ଲୀ: ବିବାହ ଭୋଜିରେ ନାଚଗୀତ ମଜାମସ୍ତି ହେବା ଏକ ସାଧାରଣ କଥା। କିନ୍ତୁ ବେଳେବେଳେ ଏଭଳି ଖୁସିର ପରିବେଶରେ ହଠାତ ଅଘଟଣ ଘଟି ଯାଇଥାଏ। ନିକଟର ଏମିତି ଏକ ଘଟଣା ସାମ୍ନାକୁ ଆସିଛି।

ବର-ବଧୂଙ୍କ ବିବାହ ଭୋଜି ଚାଲୁଥିବା ବେଳେ କିଛିଲୋକ ଏକାଠି ହୋଇ ମଜାମସ୍ତି କରି ନାଚୁ ଥିଲେ। ନାଚଗୀତରେ ମସଗୁଲ ଥିବା ବେଳେ ଲୋକେ ଯେଉଁ ସ୍ଥାନରେ ନାଚୁଥିଲେ ଉକ୍ତ ଚଟାଣଟି ଭାର ସମ୍ଭାଳି ନପାରି ଧସି ଯାଇଥିଲା। କେହି କିଛି ବୁଝିବା ପୂର୍ବରୁ ୧୦ରୁ ଊର୍ଧ୍ବ ଲୋକ ତଳକୁ ଖସି ପଡ଼ିଥିଲେ। ଏତେବଡ଼ ଦୁର୍ଘଟଣା ଘଟିଥିଲେ ବି ସୌଭାଗ୍ୟବଶତଃ ଏଥିରେ କାହାରି କିଛି କ୍ଷତି ହୋଇନାହିଁ। ସମସ୍ତେ ସୁସ୍ଥ ଅଛନ୍ତି। କିନ୍ତୁ ଏହି ଦୁର୍ଘଟଣାର ସମ୍ମୁଖୀନ ହୋଇଥିବା ଲୋକେ ଭୟଭୀତ ହୋଇପଡ଼ିଛନ୍ତି।

ଅନ୍ୟପଟେ ଦେଖିବାକୁ ଗଲେ ଏହି ବିବାହର ପ୍ରତି ମୁହୂର୍ତ୍ତର ଫଟୋ ଉଠାଇବାକୁ ଆସିଥିବା କ୍ୟାମେରାମ୍ୟାନ ନିଜ କର୍ତ୍ତବ୍ୟରୁ ଓହରି ନଥିଲେ। ନାଚୁନାଚୁ ଚଟାଣ ଧସିଯିବାର ଭିଡିଓକୁ ସେ ନିଜର କ୍ୟାମେରାରେ କୈଦ କରି ନେଇଥିଲେ। ଫଳରେ ବାସ୍ତବରେ ଚଟାଣ କେମିତି ଧସି ଯାଇଥିଲା ତାହା କ୍ୟାମେରାମ୍ୟାନ ରେକର୍ଡ କରିଥିବା ଭିଡିଓରୁ ସ୍ପଷ୍ଟ ହୋଇପାରୁଛି।