ନୂଆଦିଲ୍ଲୀ: ଅଷ୍ଟ୍ରେଲିଆର ଗ୍ରାହାମ ଷ୍ଟେନ୍‌ସ ଓ ତାଙ୍କ ଦୁଇ ଶିଶୁପୁତ୍ରଙ୍କୁ ପୋଡ଼ି ହତ୍ୟା କରାଯିବା ମାମଲାରେ ଆଜୀବନ କାରାଦଣ୍ଡ ଭୋଗୁଥିବା ରବୀନ୍ଦ୍ର କୁମାର ପାଲ ଓରଫ ଦାରା ସିଂଙ୍କ ରେମିସନ୍‌ (ଜେଲରୁ ଆଗୁଆ ମୁକ୍ତି) ମାମଲାରେ ଚାରି ସପ୍ତାହ ଭିତରେ ସତ୍ୟପାଠ ଜରିଆରେ ଆଭିମୁଖ୍ୟ ସ୍ପଷ୍ଟ କରିବା ପାଇଁ ଓଡ଼ିଶା ସରକାରଙ୍କୁ ସୁପ୍ରିମ୍‌କୋର୍ଟ ନିର୍ଦ୍ଦେଶ ଦେଇଛନ୍ତି। ଏହି ପ୍ରସଙ୍ଗରେ ରାଜ୍ୟ ସରକାରଙ୍କ କ’ଣ ଆଭିମୁଖ୍ୟ ରହିଛି ତାହା ସ୍ପଷ୍ଟ କରିବାକୁ ସୁପ୍ରିମ୍‌କୋର୍ଟ କହିଛନ୍ତି। ରାଜ୍ୟ ସରକାର ସତ୍ୟପାଠ ଦାଖଲ କରିବାର ଦୁଇ ସପ୍ତାହ ଭିତରେ ଆବେଦନକାରୀ ଏହା ଉପରେ ପ୍ରତିଜବାବ ଦାଖଲ କରି ପାରିବେ। ମାମଲାର ପରବର୍ତ୍ତୀ ଶୁଣାଣି ଅଗଷ୍ଟ ୧୧କୁ ଧାର୍ଯ୍ୟ କରାଯାଇଛି। ଜଷ୍ଟିସ୍‌ ସଂଜୟ କାରୋଲ ଓ ଜଷ୍ଟିସ୍‌  ମନୋଜ ମିଶ୍ରଙ୍କୁ ନେଇ ଗଠିତ ଖଣ୍ଡପୀଠ ଦାରା ସିଂର ଆବେଦନର ଶୁଣାଣି କରି ଏପରି ନିର୍ଦ୍ଦେଶ ପ୍ରଦାନ କରିଛନ୍ତି। 

Advertisment

ମାମଲାର ବିବରଣୀରୁ ପ୍ରକାଶ ଯେ ୨୦୨୪ ଜୁଲାଇ ୯ରେ ଦାରା ଆଜୀବନ କାରାଦଣ୍ଡରୁ ଛାଡ଼ ପାଇଁ ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଥିଲେ। ସେ ଜେଲ୍‌ରେ ୨୪ ବର୍ଷ କଟାଇ ସାରିଲେଣି। ଏବେ ତାଙ୍କର ବୃଦ୍ଧାବସ୍ଥା। ରାଜୀବ ଗାନ୍ଧୀଙ୍କ ହତ୍ୟା ମାମଲାରେ ଆଜୀବନ କାରାଦଣ୍ଡରେ ଦଣ୍ଡିତ ବ୍ୟକ୍ତିଙ୍କୁ ମୁକ୍ତ କରାଯାଇଥିବା ସଂକ୍ରାନ୍ତରେ ଦାରାଙ୍କ ଆବେଦନରେ ଉଲ୍ଲେଖ କରାଯାଇଥିଲା। ଦାରାଙ୍କ ମାମଲାକୁ ବିଚାର ପାଇଁ ସୁପ୍ରିମ୍‌କୋର୍ଟ ଗ୍ରହଣ କରି ରାଜ୍ୟ ସରକାରଙ୍କୁ ନୋଟିସ୍ ଜାରି କରି ଜବାବ ରଖିବାକୁ କହିଥିଲେ। ସେହିଭଳି ଦାରାଙ୍କ ଦ୍ବାରା ୨୦୨୪ ଅଗଷ୍ଟ ୨୦ରେ ସୁପ୍ରିମ୍‌କୋର୍ଟରେ ଆଉ ଏକ ଆବେଦନ ଦାଖଲ କରାଯାଇ ତାଙ୍କର ଆଗୁଆ ମୁକ୍ତିରେ ଉଦାର ନୀତି ଆପଣାଇବା ପାଇଁ ନିବେଦନ କରାଯାଇଥିଲା। ମାମଲାରେ ପୁଣିଥରେ ସୁପ୍ରିମ୍‌କୋର୍ଟ ଦୁଇ ସପ୍ତାହରେ ଜବାବ ଦାଖଲ ପାଇଁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଥିଲେ। ଗତ ଜାନୁଆରି ୬ରେ ଦାରାଙ୍କ ଆବେଦନର ସୁପ୍ରିମ୍‌କୋର୍ଟ ଶୁଣାଣି କରି ମାମଲାରେ ସିବିଆଇକୁ ପକ୍ଷଭୁକ୍ତ ପାଇଁ ଅନୁମତି ଦେଇଥିଲେ। ସିବିଆଇ  ମଧ୍ୟ ଏହି ମାମଲାରେ ବର୍ତ୍ତମାନ ସୁଦ୍ଧା ଜବାବ ଦାଖଲ କରିନାହିଁ। ପୂର୍ବ ଶୁଣାଣିରେ ରାଜ୍ୟ ସରକାରଙ୍କ ଓକିଲଙ୍କ ଦ୍ବାରା ଦାରାଙ୍କ ରେମିସନ୍‌ ବାବଦରେ ରାଜ୍ୟ ସରକାରଙ୍କ ୫ଟି କମ୍ପିଟେଣ୍ଟ କମିଟି ବୈଠକ ସଂପର୍କରେ ଅବଗତ କରାଯାଇ କମିଟିର ନିଷ୍ପତ୍ତି ସଂପର୍କରେ ଅବଗତ କରାଯିବ ବୋଲି କୁହାଯାଇଥିଲା। ଆଜି ରାଜ୍ୟ ସରକାରଙ୍କୁ ଏହି ପ୍ରସଙ୍ଗରେ ଅବଗତ କରିବାକୁ ସୁପ୍ରିମ୍‌କୋର୍ଟ ମହଲତ ପ୍ରଦାନ କରିଛନ୍ତି। ରାଜ୍ୟ ସରକାରଙ୍କ ତରଫରୁ ଆଡଭୋକେଟ୍‌ ଜେନେରାଲ୍‌ ପୀତାମ୍ବର ଆଚାର୍ଯ୍ୟ ମାମଲା ପରିଚାଳନା କରୁଛନ୍ତି।