ପ୍ରେମିକ ସହ ମିଶି ବାପାଙ୍କୁ ହତ୍ୟା କଲା ଝିଅ, ଅନ୍ତିମ ସଂସ୍କାର ସମୟରେ ଖୋଲିଲା ଗୁମର
ରାୟପୁର: ପ୍ରେମିକ ସହ ମିଶି ବାପାଙ୍କୁ ହତ୍ୟା କଲା ଝିଅ | ଆଉ ନିଜ ବାପାଙ୍କର ଅପମୃତ୍ୟୁ ହୋଇଥିବାର ଥାନାରେ ଅଭିଯୋଗ କରିଥିଲେ | ତେବେ ଅନ୍ତିମ ସଂସ୍କାର ପୂର୍ବରୁ ମୃତକଙ୍କ ଶରୀରରେ ଆକ୍ରମଣର ଦାଗ ଦେଖି ସ୍ଥାନୀୟ ଲୋକ ପୁଲିସକୁ ଖବର ଦେଇଥିଲେ | ଆଉ ପୁଲିସ ପହଞ୍ଚି ମୃତଦେହ ଜବତ କରିବା ସହ ହତ୍ୟାକାଣ୍ଡର ପର୍ଦ୍ଦାଫାସ କରିଛି | ଛତିଶଗଡର ଧାମତରୀ ନାଭଗାଓଁରେ ଏହି ଘଟଣା ଘଟିଛି। ମିଳିଥିବା ସୂଚନା ମୁତାବକ ଜଣେ ୬୦ ବର୍ଷ ବୟସ୍କ ବ୍ୟକ୍ତିଙ୍କ ମୃତ୍ୟୁ ହେବା ପରେ ଗ୍ରାମବାସୀଙ୍କୁ ମୃତକଙ୍କ ଝିଅ କହିଥିଲେ ଯେ ତାଙ୍କ ବାପାଙ୍କର ଅଜଣା ରୋଗ କାରଣରୁ ମୃତ୍ୟୁ ହୋଇଯାଇଛି | ଆଉ ଗ୍ରାମବାସୀ ଯେତେବେଳେ ତାଙ୍କ ମୃତଦେହକୁ ଅନ୍ତିମ ସଂସ୍କାର ପାଇଁ ନେଉଥିଲେ, ସେତେବେଳେ ମୃତକଙ୍କ ଶରୀରରେ ମାଡ ମାରିଥିବାର ଚିହ୍ନ ଦେଖିବାକୁ ମିଳିଥିଲା |
Sambad is now on WhatsApp
Join and get latest news updates delivered to you via WhatsApp
ଏହାପରେ ଗ୍ରାମବାସୀମାନେ ପୁଲିସକୁ ଖବର ଦେଇଥିଲେ | ପୁଲିସ ଏବାବଦରେ ସୂଚନା ପାଇ ପୋଲିସ ମୃତଦେହ ଜବତ କରି ପୋଷ୍ଟମର୍ଟମ ପାଇଁ ପଠାଇଥିଲା | ଆଉ ରିପୋର୍ଟରୁ ଜଣାପଡିଥିଲା ଯେ ମୃତ ବ୍ୟକ୍ତିଙ୍କୁ ମାଡ଼ ମାରିବା ସହ ଶ୍ବାସରୁଦ୍ଧ କରି ହତ୍ୟା କରାଯାଇଥିଲା। ଆଉ ପୁଲିସ ସନ୍ଦେହ ଆଧାରରେ ମୃତକଙ୍କ ଝିଅକୁ ଡାକି ପଚରାଉଚୁରା କରିଥିଲା | ଶେଷରେ ଝିଅ ଜଣକ ହତ୍ୟା କରିଥିବାର ସ୍ୱୀକାର କରିଥିଲେ |
ପୁଲିସର ସୂଚନା ମୁତାବକ ଅଭିଯୁକ୍ତ ମହିଳା ତାଙ୍କ ସ୍ୱାମୀଙ୍କଠାରୁ ଅଲଗା ରହୁଥିଲେ ଏବଂ ପାଖ ଗ୍ରାମର ୩୫ ବର୍ଷୀୟ ରୋଶନ ଯାଦବଙ୍କ ସହ ତାଙ୍କର ପ୍ରେମ ସମ୍ପର୍କ ଥିଲା | ତେବେ ସେମାନଙ୍କ ସମ୍ପର୍କ ବିଷୟରେ ଜାଣିବା ପରେ ତାଙ୍କ ବାପା ଏଥିରେ ରାଜି ନଥିଲେ ଓ ବାରମ୍ବାର ଏପରି ନ କରିବାକୁ ମନା କରିଥିଲେ | ତେବେ ସମ୍ପର୍କରେ କଣ୍ଟା ସାଜିଥିବା ନିଜ ବାପାଙ୍କୁ ରାସ୍ତାରୁ ହଟାଇବାକୁ ଉଭୟ ପ୍ରେମୀଯୁଗଳ ଯୋଜନା କରିଥିଲେ ଓ ତାଙ୍କ ବାପାଙ୍କୁ ହତ୍ୟା କରିଥିଲେ |