ସିଆଚେନ୍: ୩୮ ବର୍ଷ ପରେ ମିଳିଲା ବରଫ ତଳୁ ମିଳିଲା ଯବାନଙ୍କ ମୃତଦେହ | ଆଉ ଏହା ଜାଣିବା ପରେ ଯବାନଙ୍କ ପରିବାର ଏବେ ଅନ୍ତିମ ସଂସ୍କାର ପାଇଁ ପ୍ରସ୍ତୁତି ଆରମ୍ଭ କରିଛନ୍ତି | କଥାଟି ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ବି ଏକଥା ଏକଦମ ସତ | ସିଆଚେନ୍ ଗ୍ଲାସିଅରରେ ବରଫ ଧସିବା କାରଣରୁ ପ୍ରାଣ ହରାଇଥିବା ଲାନସନାୟକ ଚନ୍ଦ୍ରଶେଖର ହରବୋଲାଙ୍କ ମୃତଦେହ ମିଳିଛି। ମୃତଦେହ ମିଳିବାର ସୂଚନା ପାଇବା ପରେ ପରିବାର ପକ୍ଷରୁ ଏବେ ରୀତିନୀତିରେ ଅନ୍ତିମ ସଂସ୍କାର ପାଇଁ ପ୍ରସ୍ତୁତି ଆରମ୍ଭ କରାଯାଇଛି |
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁଯାୟୀ, ସହିଦଙ୍କ ମୃତଦେହ ମଙ୍ଗଳବାର ଦିନ ଉତ୍ତରାଖଣ୍ଡର ହଲଦୱାନୀରେ ପହଞ୍ଚିବାର ସମ୍ଭାବନା ରହିଛି। ଚନ୍ଦ୍ରଶେଖର ହରବୋଲାଙ୍କ ପୈତୃକ ଘର ଉତ୍ତରାଖଣ୍ଡର ଆଲମୋରା ଜିଲ୍ଲାର ବିଣ୍ଟାହାଟିଖୁର ଗ୍ରାମ ହୋଇଥିବାବେଳେ ୧୯୭୧ ମସିହାରେ କୁମାଉଁ ରେଜିମେଣ୍ଟରେ ସେ ଯୋଗ ଦେଇଥିଲେ | ମେ ୧୯୮୪ରେ, ଲେଫ୍ଟନେଣ୍ଟ ପିଏସ ପୁଣ୍ଡିରଙ୍କ ନେତୃତ୍ୱରେ ୧୯ ଜଣ ସୈନିକଙ୍କ ଏକ ଟିମ୍ ଅପରେସନ୍ ମେଘଦୂତ ପାଇଁ ବାହାରିଥିଲେ | ଆଉ ମେ ୨୯ରେ, ହିମସ୍ଖଳନ ଯୋଗୁଁ ଏହି ଟିମ ଉପରେ ବରଫ ପାହାଡ ଧସିହୋଇପଡିଥିଲା | ଏହାପରେ ଚନ୍ଦ୍ରଶେଖରଙ୍କ ସହ ଅନ୍ୟମାନଙ୍କୁ ସହିଦ ବୋଲି ଘୋଷଣା କରାଯାଇଥିଲା |
ସେତେବେଳେ ଲାନ୍ସନାୟକ ଚନ୍ଦ୍ରଶେଖରଙ୍କ ବୟସ ୨୮ ବର୍ଷ ଥିଲା। ଶନିବାର ରାତିରେ ସହିଦଙ୍କ ପତ୍ନୀ ଶାନ୍ତି ଦେବୀଙ୍କୁ ଫୋନ ଆସିଥିଲା ଯେ ସହିଦ ଲାନ୍ସନାୟକ ଚନ୍ଦ୍ରଶେଖରଙ୍କ ମୃତଦେହ ଗ୍ଲାସିଅରରୁ ଉଦ୍ଧାର କରାଯାଇଛି । ଆଉ ସ୍ଥାନୀୟ ପ୍ରଶାସନର ସୂଚନା ଅନୁଯାୟୀ ମଙ୍ଗଳବାର ସନ୍ଧ୍ୟା ସୁଦ୍ଧା ସହିଦଙ୍କ ମୃତଦେହ ହଲଦୱାନୀରେ ପହଞ୍ଚିବ। ରାନୀବାଗସ୍ଥିତ ଚିତ୍ରଶିଲା ଘାଟରେ ସହିଦଙ୍କ ଶେଷ ରୀତିନୀତି ରାଜକୀୟ ସମ୍ମାନ ସହିତ ପାଳନ କରାଯିବ ବୋଲି କୁହାଯାଇଛି |