ମୁମ୍ବାଇରେ ଏୟାରବ୍ୟାଗ ପାଇଁ ଚାଲିଗଲା ୬ବର୍ଷୀୟ ବାଳକର ଜୀବନ

ନୂଆଦିଲ୍ଲୀ: କାର କିଣିବା ସମୟରେ ଲୋକମାନେ ସାଧାରଣତଃ ଏଥିରେ ଥିବା ଅନ୍ୟ ସମସ୍ତ ଫିଚର ସହିତ ଏୟାରବ୍ୟାଗ ସଂଖ୍ୟା ପ୍ରତି ବିଶେଷ ଧ୍ୟାନ ଦିଅନ୍ତି | ଏହାର ସବୁଠାରୁ ବଡ କାରଣ ହେଉଛି ସୁରକ୍ଷା | ଆମେ ଭାବୁ ଯେ ଯଦି କୌଣସି କାରଣରୁ ଆମର କାର ଦୁର୍ଘଟଣାର ସମ୍ମୁଖୀନ ହୁଏ, ତେବେ ଆମେ ଏବଂ ଆମ ପରିବାର ସଦସ୍ୟମାନେ ଏୟାରବ୍ୟାଗ ପାଇଁ ବଞ୍ଚିଯିବେ | କିନ୍ତୁ ଯଦି ଏହି ଏୟାରବ୍ୟାଗ୍ ଆପଣଙ୍କ ପାଇଁ କିମ୍ବା ଆପଣଙ୍କ ପରିବାରର କୌଣସି ସଦସ୍ୟଙ୍କ ପାଇଁ ମୃତ୍ୟୁର କାରଣ ହୋଇଯାଏ, ତେବେ ଆପଣ କ'ଣ କରିବେ | ଏହା ଟିକେ ଆଶ୍ଚର୍ଯ୍ୟ ଲାଗୁଥାଇପାରେ କିନ୍ତୁ ଏହା ହେଉଛି ସତ୍ୟ | ମୁମ୍ବାଇର ବାସି ଅଞ୍ଚଳରେ ଏୟାରବ୍ୟାଗ ପାଇଁ ଜଣେ ୬ବର୍ଷିୟ ବାଳକର ମୃତ୍ୟୁ ହୋଇଥିବା ଜଣାଯାଇଛି | 

ମୃତକଙ୍କ ନାମ ହେଉଛି ହର୍ଷ | ଦୁର୍ଘଟଣା ସମୟରେ କାରର ଆଗ ସିଟରେ ବସିଥିଲେ ହର୍ଷ | ଏୟାରବ୍ୟାଗଟି ତାଙ୍କ ଦେହରେ ମାଡ଼ ହେବାରୁ ତାଙ୍କ ଶରୀରରେ ଅନେକ ଆଭ୍ୟନ୍ତରୀଣ ଆଘାତ ଲାଗିଥିଲା, ଯାହା ପାଇଁ ତାଙ୍କର ମୃତ୍ୟୁ ହୋଇଛି |

ହର୍ଷଙ୍କ ବାପା ମାବଜୀ ଅରୋଠିଆଙ୍କ ଅନୁଯାୟୀ, ଆମ ଆଗରେ ଯାଉଥିବା ଏକ କାରଟି ଡିଭାଇଡରରେ ଧକ୍କା ଖାଇ ଦୁର୍ଘଟଣାଗ୍ରସ୍ତ ହେବାରୁ କାରର ପଛ ବନେଟ ଆସି ଆମ କାରର ଆଗ ବନେଟରେ ପଡିଥିଲା | ଏଥିପାଇଁ ଏୟାରବ୍ୟାଗ ଖୋଲିଯାଇଥିଲା | ହଠାତ ଖୁବ ଜୋରରେ ଏୟାରବ୍ୟାଗ ଖୋଲିବା ସହ ହର୍ଷଙ୍କ ଦେହରେ ମାଡ଼ ହୋଇଥିଲା | ବାହାରେ କୌଣସି ଆଘାତ ଲାଗିନଥିଲେ ବି ଆଭ୍ୟନ୍ତରୀଣ ଆଘାତ ପାଇଁ ସେ ଅଚେତ ହୋଇପଡିଥିଲେ | ଏହା ପରେ ତାଙ୍କର ମୃତ୍ୟୁ ହୋଇଥିଲା |