ଗଡ଼କରୀଙ୍କୁ ୧୦୦ କୋଟି ମାଗି ହତ୍ୟା ଧମକ, କର୍ଣ୍ଣାଟକ ଜେଲରେ ଗ୍ୟାଙ୍ଗଷ୍ଟର

ନାଗପୁର : ନିଜକୁ ଦାଉଦ ଇବ୍ରାହିମ୍‌ର ଲୋକ କହି କେ‌ନ୍ଦ୍ରମନ୍ତ୍ରୀ ନୀତୀନ ଗଡ଼କରୀଙ୍କୁ ୧୦୦ କୋଟି ଟଙ୍କା ମାଗିବା ସହ ନ ଦେଲେ ହତ୍ୟା କରିବାକୁ ଧମକ ଦେଇଥିବା ବ୍ୟକ୍ତିକୁ ଧମକର କିଛି ଘଣ୍ଟା ପରେ ନାଗପୁର ପୁଲିସ ଠାବ କରିବାରେ ସଫଳ ହୋଇଛି। ସେ ଆଉ କେହି ନୁହେଁ, କର୍ଣ୍ଣାଟକର ବେଲଗାବି ଜେଲରେ ରହୁଥିବା କୁଖ୍ୟାତ ଗ୍ୟାଙ୍ଗଷ୍ଟର ଜୟେଶ କାନ୍ଥା। ସେ ଜେଲ ଭିତରେ ଥାଇ ବେଆଇନ ଭାବେ ଫୋନ୍ ବ୍ୟବହାର କରି ମନ୍ତ୍ରୀଙ୍କୁ ଧମକ ଦେଇଥିଲା।

ନାଗପୁର ପୁଲିସ କମିସନର ଅମିତେଶ କୁମାର ରବିବାର କହିଛନ୍ତି ଯେ ମନ୍ତ୍ରୀଙ୍କୁ ଫୋନ କରି ୧୦୦ କୋଟି ଟଙ୍କା ମାଗିବା ଏବଂ ହତ୍ୟା ଧମକ ଦେବା ଖବର ସତ। ବେଲଗାବି ଜେଲରେ ରହୁଥିବା କୁଖ୍ୟାତ ଗ୍ୟାଙ୍ଗଷ୍ଟର ଓ ହତ୍ୟା ଅଭିଯୁକ୍ତ ଜୟେଶ କାନ୍ଥା ଏହି ଧମକ ଦେଇଥିଲା। ସେ କେନ୍ଦ୍ର ସଡ଼କ ଓ ପରିବହନ ମନ୍ତ୍ରୀଙ୍କ କାର୍ଯ୍ୟାଳୟର ଲ୍ୟାଣ୍ଡ ଫୋନ୍‌କୁ ତିନି ଥର ଫୋନ କରିଥିଲା। ଜେଲ କର୍ତ୍ତୃପକ୍ଷ ତା’ଠାରୁ ଏକ ଡାଇରି ପାଇଛନ୍ତି, ଯେଉଁଥିରେ ଅନେକ ଫୋନ୍ ନମ୍ବର ଲେଖା ହୋଇଛି। ଏହି ଡାଇରି ଅଧିକ ତଦନ୍ତରେ ସାହାଯ୍ୟ କରିବ। ଜେଲରେ ଥିବା ଅଭିଯୁକ୍ତ କାନ୍ଥାକୁ ରିମାଣ୍ଡରେ ଆଣିବା ପାଇଁ ନାଗପୁର ପୁଲିସ ବେଲଗାବି ଯାଇଛି। କାନ୍ଥା ମନ୍ତ୍ରୀଙ୍କ ଅଫିସର ଲ୍ୟାଣ୍ଡ ଫୋନ୍‌କୁ କଲ୍ କରି କହିଥିଲା- ମୁଁ ହେଉଛି ଦାଉଦ ଗ୍ୟାଙ୍ଗର ସଦସ୍ୟ। ମନ୍ତ୍ରୀଙ୍କୁ କହିଦବ ୧୦୦ କୋଟି ଦେବେ। ନ ଦେଲେ ବୋମା ପକେଇ ମନ୍ତ୍ରୀଙ୍କୁ ଉଡ଼େଇଦେବି। ସେ କର୍ଣ୍ଣାଟକର ଏକ ଠିକଣା ଓ ଫୋନ୍ ନମ୍ବର ବି ଦେଇଥିଲା, ଯେଉଁଠିକି ଟଙ୍କା ପଠେଇବାକୁ ହେବ।