କଲମ୍ବୋ ବିସ୍ଫୋରଣ: ମୃତକଙ୍କ ସଂଖ୍ୟା ୩୧୦ ଛୁଇଁଲା, ୫୦୦ରୁ ଊର୍ଧ୍ୱ ଆହତ
କଲମ୍ବୋ: ଶ୍ରୀଲଙ୍କା ରାଜଧାନୀ କଲମ୍ବୋରେ ହୋଇଥିବା ସିରିଜ୍ ବିସ୍ଫୋରଣରେ ମୃତକଙ୍କ ସଂଖ୍ୟା ମଙ୍ଗଳବାର ସୁଦ୍ଧା ୩୧୦ ଛୁଇଁଛି। ଏହି ବିସ୍ଫୋରଣରେ ଆହତଙ୍କ ସଂଖ୍ୟା ୫୦୦ ଟିପଛି ବୋଲି ଜାଣିବାକୁ ମିଳିଛି। ଶ୍ରୀଲଙ୍କାରେ ଆତଙ୍କବାଦୀମାନେ ଘଟାଇଥିବା ଏହି ବିସ୍ଫୋରଣରେ ୩୦ରୁ ଊର୍ଧ୍ୱ ବିଦେଶୀଙ୍କ ମୃତ୍ୟୁ ଘଟିଥିବା ସୂଚନା ରହିଛି। ଏମାନଙ୍କ ମଧ୍ୟରୁ ୮ ଜଣ ଭାରତୀୟ ନାଗରିକ ଥିବା ଜାଣିବାକୁ ମିଳିଛି। ଅହତଙ୍କ ମଧ୍ୟରେ ବି ଭାରତୀୟ ନାଗରିକ ଥିବା ସୂଚନା ରହିଛି। ତେବେ, ଗତକାଲି ଜାଣିବାକୁ ମିଳିଥିଲା ଶ୍ରୀଲଙ୍କାରେ ଥିବା ଭାରତୀୟ ଉଚ୍ଚ ଆୟୋଗ ମୃତକ ଭାରତୀୟଙ୍କ ବିଷୟରେ ଟିକିନିକ୍ ଖବର ଦେଉଛନ୍ତି।
Sambad is now on WhatsApp
Join and get latest news updates delivered to you via WhatsApp
ଉଲ୍ଲେଖଯୋଗ୍ୟ, ବରିବାର ସକାଳ ପ୍ରାୟ ୮.୩୦ ଠାରୁ ବିସ୍ଫୋରଣ ଆରମ୍ଭ ହୋଇଥିଲା। ଅତଙ୍କବାଦୀମାନେ ପୂରା ଦିନ ଭିତରେ ସମୁଦାୟ ୮ ଥର ବିସ୍ଫୋରଣ ଘଟାଇଥିଲେ। ଦୁଇଟି ଗୀର୍ଜା ଓ ତିନୋଟି ପଞ୍ଚତାରିକା ହୋଟେଲ୍ରେ ହୋଇଥିବା ବିସ୍ଫୋରଣରେ ଶହ ଶହ ଲୋକଙ୍କ ଜୀବନ ଯାଇଛି। ସୋମବାର ମଧ୍ୟ ପୁଣି ଥରେ ବିସ୍ଫୋରଣ ଘଟିବାର ସୂଚନା ରହିଛି।