ପରୀକ୍ଷାର ଦୁଇ ମାସ ପୂର୍ବରୁ ଜାଣିଲେ ହୋଇଛି ରକ୍ତକର୍କଟ; ଚିକିତ୍ସା ସହ ଜାରି ରଖିଲେ ପାଠପଢ଼ା, ରଖିଲେ ୯୫ ପ୍ରତିଶତ ମାର୍କ
ନୂଆଦିଲ୍ଲୀ : ଗତକାଲି ସିବିଏସ୍ଇ ୧୦ ଶ୍ରେଣୀର ଫଳ ପ୍ରକାଶ ପାଇଥିଲା । ଯେଉଁଥିରେ କିଛି ପିଲା ପାସ୍ ହେବା ସହ କିଛି ପିଲା ଅସଫଳ ମଧ୍ୟ ହୋଇଥିଲେ । କିଛି ଟପ୍ପର ହେବା ପରେ ନିଜ ଅଭିଜ୍ଞତା ବିଷୟରେ ସମସ୍ତଙ୍କୁ ଜଣାଇଥିଲେ । କିନ୍ତୁ ଏବେ ଟପ୍ପରଙ୍କ ଅପେକ୍ଷା ଦିଲ୍ଲୀର ମୟୁର ବିହାରର ପ୍ରିୟେଶ ତୟାଲ ଏବେ ଚର୍ଚ୍ଚାରେ ଥିବା ଜଣା ପଡ଼ିଛି । ରକ୍ତ କର୍କଟ ଭଳି ରୋଗର ଶିକାର ହୋଇ ମଧ୍ୟ ସିବିଏସ୍ଇ ୧୦ଶ୍ରେଣୀ ପରୀକ୍ଷାରେ ୯୫ ପ୍ରତିଶତ ମାର୍କ ରଖିଥିବାରୁ ଏବେ ତାଙ୍କୁ ନେଇ ଚର୍ଚ୍ଚା ଜୋର ଧରିଛି ।
Sambad is now on WhatsApp
Join and get latest news updates delivered to you via WhatsApp
ପ୍ରିୟେଶ୍ ପରୀକ୍ଷାର ଦୁଇ ମାସ ପୂର୍ବରୁ ତାଙ୍କୁ ରକ୍ତ କର୍କଟ ହୋଇଛି ବୋଲି ଜାଣି ଭାଙ୍ଗି ଯାଇ ନଥିଲେ ବରଂ ଚିକିତ୍ସା ସହ ପାଠ ପଢ଼ି ପରୀକ୍ଷା ଦେବେ ବୋଲି ମନସ୍ଥ କରିଥିଲେ । ତାଙ୍କର ଏହି ଦୃଢ଼ ମନୋବଳକୁ ଦେଖି ଚିକିତ୍ସା କରୁଥିବା ଡ଼ାକ୍ତର ଏବଂ ତାଙ୍କ ମାତା-ପିତା ଆଶ୍ଚର୍ଯ୍ୟ ହୋଇ ଯାଇଥିଲେ ।
ସୂଚନା ମୁତାବକ, ମୟୁର ବିହାରର ଫେଜ୍-୧ରେ ରହୁଥିବା ପ୍ରିୟେଶ ଏଏସ୍ଏସ୍ ପବ୍ଲିକ୍ ସ୍କୁଲର ଛାତ୍ର ବୋଲି ଜଣାପଡ଼ିଛି । ଡ଼ିସେମ୍ବର ୨୦୧୭ରେ ପ୍ରି-ବୋର୍ଡ଼ ପରୀକ୍ଷା ସମୟରେ ସେ ରକ୍ତ କର୍କଟ ଭଳି ରୋଗରେ ଆକ୍ରାନ୍ତ ବୋଲି ଜାଣିବାକୁ ପାଇଥିଲେ । କିନ୍ତୁ ସେ ରୋଗ ଉପରେ ଧ୍ୟାନ ଦେବା ପରିବର୍ତ୍ତେ ନିଜ ପରୀକ୍ଷା ଉପରେ ଧ୍ୟାନ ଦେଇଥିଲେ । ଏଥିରେ ତାଙ୍କ ପରିବାର ଲୋକମାନେ ମଧ୍ୟ ତାଙ୍କୁ ସାହାଯ୍ୟ କରିଥିଲେ । ଅନ୍ୟ ପକ୍ଷରେ ଚିକିତ୍ସା ଆରମ୍ଭ ହେବାରୁ ସେ ଜାନୁଆରୀ ମାସଠାରୁ ସ୍କୁଲ ଯିବା ବନ୍ଦ କରି ଦେଇଥିଲେ । ଡ଼ାକ୍ତରଖାନାରେ ଚିକିତ୍ସା ସହ ସେ ନିଜ ପରୀକ୍ଷା ପାଇଁ ମଧ୍ୟ ପ୍ରସ୍ତୁତି କରିଥିଲେ । ସ୍କୁଲରେ ଶିକ୍ଷକ କ’ଣ ପଢ଼ାଇଲେ ସେ ବିଷୟରେ ସେ ହ୍ଵାଟ୍ସ୍ଆପ୍ ମାଧ୍ୟମରେ ନିଜ ସାଙ୍ଗମାନଙ୍କୁ ପଚାରି ବୁଝୁଥିଲେ । ପରୀକ୍ଷା ସମୟରେ ତାଙ୍କ ଦେହ ଏତେ ଖରାପ ହୋଇ ଯାଇଥିଲା କି ତାଙ୍କୁ ପରୀକ୍ଷା କେନ୍ଦ୍ରରୁ ଡ଼ାକ୍ତରଖାନା ନିଆଯାଇଥିଲା । ଏଭଳି ଗମ୍ଭୀର ପରିସ୍ଥିତିରେ ମଧ୍ୟ ସେ ନ ହାରି ପରୀକ୍ଷାରେ ୯୫ ପ୍ରତିଶତ ମାର୍କ ଆଣିବାରେ ସଫଳ ହୋଇଛନ୍ତି । ପ୍ରିୟେଶଙ୍କ ଏହି କାହାଣୀ ଅନେକଙ୍କୁ ଅନୁପ୍ରାଣିତ କରିବ ନିଶ୍ଚୟ ।