ଦିଲ୍ଲୀ ଅସ୍ତବ୍ୟସ୍ତ: ୧୩ରୁ ୨୦ ପର୍ଯ୍ୟନ୍ତ ଯୁଗ୍ମ-ଅଯୁଗ୍ମ ସୂତ୍ର, ଦଶମ, ଦ୍ୱାଦଶ ଶ୍ରେଣୀ ବ୍ୟତୀତ ସ୍କୁଲ ବନ୍ଦ

ନୂଆଦିଲ୍ଲୀ: ଦିଲ୍ଲୀରେ ପ୍ରଦୂଷଣ ଚିନ୍ତା ବଢ଼ାଇବାରେ ଲାଗିଛି। ବଢୁଥିବା ପ୍ରଦୂଷଣକୁ ନିୟନ୍ତ୍ରଣ କରିବା ଲାଗି ଦିଲ୍ଲୀରେ ଦୀପାବଳି ପରଦିନଠାରୁ ଯୁଗ୍ମ ଅଯୁଗ୍ମ ନିୟମ ଲାଗୁ ହେବ। ଏଥିସହିତ ଚଳିତ ସପ୍ତାହ ପାଇଁ ସ୍କୁଲ ବନ୍ଦକୁ ଏକାଦଶ ଶ୍ରେଣୀ ପର୍ଯ୍ୟନ୍ତ ବୃଦ୍ଧି କରାଯାଇଛି ବୋଲି ରାଜ୍ୟ ପରିବେଶ ମନ୍ତ୍ରୀ ଗୋପାଳ ରାୟ ଆଜି କହିଛନ୍ତି। ନଭେମ୍ବର ୧୦ ତାରିଖ ପର୍ଯ୍ୟନ୍ତ ଦଶମ ଓ ଦ୍ୱାଦଶ ଶ୍ରେଣୀ ବ୍ୟତୀତ ଅନ୍ୟ ସମସ୍ତ ଶ୍ରେଣୀ ପାଇଁ ଛୁଟି ଘୋଷଣା କରାଯାଇଛି। ବର୍ତ୍ତମାନ କେବଳ ପଞ୍ଚମ ଶ୍ରେଣୀ ପର୍ଯ୍ୟନ୍ତ ପାଠପଢ଼ା ବନ୍ଦ ରହିଛି।

ଦିଲ୍ଲୀକୁ ପ୍ରାୟ ଏକ ସପ୍ତାହ ହେବ ବିଷାକ୍ତ ଧୂଆଁ ମିଶ୍ରିତ କୁହୁଡ଼ି (ସ୍ମଗ୍) ଆଚ୍ଛାଦିତ କରି ରଖିଥିବାରୁ କର୍ତ୍ତୃପକ୍ଷ ସହର ଭିତରକୁ ଡିଜେଲ ଟ୍ରକ୍ ପ୍ରବେଶକୁ ବାରଣ କରିବା ସହ ଗ୍ରେଡେଡ୍ ରେସପନ୍ସ ଆକ୍ସନ ପ୍ଲାନ୍ (ଜିଆର୍‌ଏପି)ର ଷ୍ଟେଜ୍-୪ ଅଧୀନରେ ସହରରେ ନିର୍ମାଣ କାର୍ଯ୍ୟ ଉପରେ ପ୍ରତିବନ୍ଧକ ଲଗାଇଛନ୍ତି। ବିଏସ୍-୩ ପେଟ୍ରୋଲ ଓ ବିଏସ୍-୪ ଡିଜେଲ ଯାନ ଉପରେ କଟକଣା ମଧ୍ୟ ଜାରି ରହିବ ବୋଲି ରାୟ କହିଛନ୍ତି। ବାଣ କଟକଣା ଓ ସ୍ମଗ୍ ଗନ୍ ଲଗାଇବା ପ୍ରଭୃତି ସରକାରଙ୍କ ଅନ୍ୟାନ୍ୟ ପଦକ୍ଷେପ ସମ୍ପର୍କରେ ମଧ୍ୟ ସେ ସୂଚନା ଦେଇଛନ୍ତି।

ଗତ କିଛି ବର୍ଷ ଧରି ପ୍ରଦୂଷଣ ମୁକାବିଲାରେ ଅରବିନ୍ଦ କେଜ୍ରିୱାଲ ସରକାରଙ୍କ ପ୍ରମୁଖ ପଦକ୍ଷେପ ପାଲଟିଥିବା ଯୁଗ୍ମ ଅଯୁଗ୍ମ ନିୟମ ଏବେ ଦୀପାବଳି ପରଦିନ ଅର୍ଥାତ୍ ନଭେମ୍ବର ୧୩ରୁ ଏକ ସପ୍ତାହ ପାଇଁ ଫେରିବ। ଏହି ନିୟମ ଅନୁଯାୟୀ, କେବଳ ଅଯୁଗ୍ମ ନମ୍ବର ଥିବା ଗାଡ଼ିଗୁଡ଼ିକୁ ଦିଲ୍ଲୀ ରାସ୍ତାରେ ଅଯୁଗ୍ମ ଦିନରେ ଏବଂ ଯୁଗ୍ମ ନମ୍ବର ବିଶିଷ୍ଟ ଗାଡ଼ିଗୁଡ଼ିକୁ ଯୁଗ୍ମ ଦିନରେ ଅନୁମତି ମିଳିବ। ନଭେମ୍ବର ୨୦ ପରେ ଯୁଗ୍ମ ଅଯୁଗ୍ମ ନିୟମକୁ ବଢ଼ାଇବାର ଆବଶ୍ୟକତା ଉପରେ ସମୀକ୍ଷା କରାଯିବ ବୋଲି ମନ୍ତ୍ରୀ କହିଛନ୍ତି। ଯୁଗ୍ମ ଅଯୁଗ୍ମ ଗାଡ଼ି ଚଳାଚଳ କାର୍ଯ୍ୟକାରୀ ହେବା ଦ୍ବାରା ଦିଲ୍ଲୀ ରାସ୍ତାରେ ଗାଡ଼ି ସଂଖ୍ୟା ଅଧା ହୋଇଯିବ। ଏହାଦ୍ବାରା ଯାନବାହନ ଜନିତ ପ୍ରଦୂଷଣ କମିବ ବୋଲି ଆଶା କରାଯାଉଛି। ଆଜି ସକାଳେ ଦିଲ୍ଲୀରେ ସାମଗ୍ରିକ ବାୟୁ ମାନ ସୂଚକାଙ୍କ (ଏକ୍ୟୁଆଇ) ୪୮୮ ରେକର୍ଡ କରାଯାଇଛି, ଯାହା କି ବିଶ୍ୱ ସ୍ୱାସ୍ଥ୍ୟ ସଂଗଠନ ଦ୍ୱାରା ନିର୍ଦ୍ଧାରିତ ସର୍ବୋଚ୍ଚ ସ୍ତରଠାରୁ ଯଥେଷ୍ଟ ଅଧିକ। ସବୁଠାରୁ ଅଧିକ ପ୍ରଭାବିତ ଅଞ୍ଚଳ ମଧ୍ୟରେ ଆରକେପୁରମ୍ (୪୬୬), ଆଇଟିଓ (୪୦୨), ପାଟପରଗଞ୍ଜ (୪୭୧) ଏବଂ ନ୍ୟୁ ମୋତି ବାଗ (୪୮୮) ରହିଛି। ଏକ୍ୟୁଆଇ ୫୦୦ ପାଖାପାଖି ରହିଥିବାରୁ ଦିଲ୍ଲୀ ଓ ଆଖପାଖ ସହରରେ ଲୋକମାନେ ଯେଉଁ ବାୟୁରେ ନିଶ୍ୱାସ ନେଉଛନ୍ତି ତାହାର ଗୁଣବତ୍ତା ଦିନକୁ ୨୫-୩୦ଟି ସିଗାରେଟ୍ ଟାଣିବା ସହ ସମାନ।

କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (ସିପିସିବି)ର ତଥ୍ୟ ଅନୁଯାୟୀ, ବାୟୁର ଗୁଣବତ୍ତା ‘ଗମ୍ଭୀର’ ଶ୍ରେଣୀରେ ରହିଥିବାରୁ ଦିଲ୍ଲୀ ଘନ କୁହୁଡ଼ିରେ ଆଚ୍ଛାଦିତ ହୋଇ ରହିଛି। କ୍ରମାଗତ ଚତୁର୍ଥ ଦିନ ପାଇଁ ଜାତୀୟ ରାଜଧାନୀରେ ବାୟୁର ଗୁଣବତ୍ତା ‘ଗୁରୁତର’ ଥିବା ରେକର୍ଡ କରାଯାଇଛି। ସିପିସିବି ତଥ୍ୟ ଅନୁଯାୟୀ, ଦିଲ୍ଲୀର ସାମଗ୍ରିକ ବାୟୁ ମାନ ସୂଚକାଙ୍କ (ଏକ୍ୟୁଆଇ) ସକାଳ ୯ଟା ସୁଦ୍ଧା ୪୩୭ ରେକର୍ଡ କରାଯାଇଛି। ଦିଲ୍ଲୀରେ ପ୍ରଦୂଷଣ ସଙ୍କଟକୁ ନେଇ ଆଜି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଯାଇଛି। ଏହି ବୈଠକରେ ଦିଲ୍ଲୀ ପରିବେଶ ମନ୍ତ୍ରୀ ଗୋପାଳ ରାୟଙ୍କ ସମେତ ପରିବହନ, ଏମ୍‌ସିଡି, ଦିଲ୍ଲୀ ପୁଲିସ ଏବଂ ଦିଲ୍ଲୀ ଟ୍ରାଫିକ ପୁଲିସ ଭଳି ସଂପୃକ୍ତ ବିଭାଗର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।
ଆଜି ସକାଳ ୯ଟାରେ ଏକ୍ୟୁଆଇ ବାୱାନାରେ ୪୭୮, ଦ୍ୱାରକା ସେକ୍ଟର ୮ରେ ୪୫୯, ଜାହାଙ୍ଗୀରପୁରୀରେ ୪୭୫, ମୁଣ୍ଡକାରେ ୪୬୬, ନରେଲାରେ ୪୬୦, ନ୍ୟୁ ମୋତି ବାଗରେ ୪୪୪, ଓଖଲା ଫେଜ୍ -୨ରେ ୪୪୬, ପଞ୍ଜାବୀ ବାଗରେ ୪୬୯, ଆରକେପୁରମ୍‌ରେ ୪୬୨, ରୋହିଣୀରେ ୪୭୮, ସିରି ଦୁର୍ଗରେ ୪୩୦ ରେକର୍ଡ କରାଯାଇଛି। ପଡ଼ୋଶୀ ଦିଲ୍ଲୀ ସହର ଲକ୍ଷ୍ନୌରେ ମଧ୍ୟ ବାୟୁର ଗୁଣବତ୍ତା ଖରାପ ରହିଛି।