ନୂଆଦିଲ୍ଲୀ: କୋର୍ଟଙ୍କ ଆଦେଶ ପାଳନ ନକରିବାରୁ ଦିଲ୍ଲୀ ହାଇକୋର୍ଟ କେନ୍ଦ୍ରୀୟ ପାରାମିଲିଟାରୀ ଫୋର୍ସ ସିଆରପିଏଫର ଡିଜି କୁଲଦୀପ ସିଂଙ୍କ ଉପରେ ଜରିମାନା ଲଗାଇଛନ୍ତି। ବିଶେଷ କଥା ହେଉଛି ଡିଜିଙ୍କୁ ନିଜ ପକେଟରୁ କୋଡ଼ିଏ ହଜାର ଟଙ୍କା ଜରିମାନା ଦେବାକୁ ପଡିବ। ସିଆରପିଏଫର କାର୍ଯ୍ୟନିର୍ବାହୀ କ୍ୟାଡରର ଜଣେ ଅଧିକାରୀଙ୍କ ଦ୍ୱାରା କରାଯାଇଥିବା ମାମଲାରେ ହାଇକୋର୍ଟ ଡିଜିଙ୍କୁ ଏହା ଉପରେ ବିସ୍ତୃତ ନିର୍ଦ୍ଦେଶ ‘ସ୍ପିକିଙ୍ଗ ଅର୍ଡର’ ଜାରି କରିବାକୁ ନିର୍ଦ୍ଦେଶ ଦେଇଥିଲେ । ତେବେ କୋର୍ଟ ସ୍ଥିର କରିଥିବା ଅବଧି ମଧ୍ୟରେ ସିଆରପିଏଫ ଡିଜି ଏହି ମାମଲାରେ କୌଣସି ଆଦେଶ ଦେଇନଥିଲେ । ଫଳସ୍ୱରୂପ, ଦିଲ୍ଲୀ ହାଇକୋର୍ଟର ଜଷ୍ଟିସ ନଜମି ୱାଜିରୀ ସିଆରପିଏଫର ଡିଜି କୁଲଦୀପ ସିଂଙ୍କ ଉପରେ ଜରିମାନା ଲଗାଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ଦିଲ୍ଲୀ ହାଇକୋର୍ଟରେ ଏହି ମାମଲାର ପରବର୍ତ୍ତୀ ଶୁଣାଣି ନଭେମ୍ବର ୨୪ ରେ ହେବ। ସୂଚନା ଥାଉ କି ଯେ କାର୍ଯ୍ୟନିର୍ବାହୀ କ୍ୟାଡର ସହ ଜଡିତ ଅଧିକାରୀମାନେ ସିଆରପିଏଫରେ କ୍ୟାଡର ସମୀକ୍ଷା ସମ୍ପର୍କରେ ଦିଲ୍ଲୀ ହାଇକୋର୍ଟ ଯାଇଥିଲେ। ତେବେ ଗତ କିଛି ବର୍ଷ ଧରି କ୍ୟାଡର ସମୀକ୍ଷାର ଏହି ପ୍ରସଙ୍ଗ ଚାଲିଆସୁଛି। ସୁପ୍ରିମକୋର୍ଟରେ ମଧ୍ୟ ଏହି ମାମଲାର ଶୁଣାଣି ହୋଇଥିଲା। ଏହା ପରେ କିଛି ଅଧିକାରୀ ପୃଥକ ଭାବରେ ଦିଲ୍ଲୀ ହାଇକୋର୍ଟରେ ସେମାନଙ୍କ ପ୍ରତି ହେଉଥିବା ଅନ୍ୟାୟ ସମ୍ପର୍କରେ ଆବେଦନ କରିଥିଲେ। ଅନ୍ୟପକ୍ଷରେ କେନ୍ଦ୍ର ଗୃହ ମନ୍ତ୍ରାଳୟ ଏପର୍ଯ୍ୟନ୍ତ କ୍ୟାଡର ସମୀକ୍ଷା ପ୍ରସ୍ତାବ ଡିପାର୍ଟମେଣ୍ଟ ଅଫ ପରସନନେଲ ଆଣ୍ଡ ଟ୍ରେନିଂ(ଡିଓପିଟି) ରେ ଦାଖଲ କରିନାହାଁନ୍ତି। ନିୟମ ଅନୁଯାୟୀ, ଏହି ପ୍ରସ୍ତାବ ଜୁନ୍ ୨୦୨୧ ସୁଦ୍ଧା (ଡିଓପିଟି)ରେ ପହଞ୍ଚିବା କଥା | ଶେଷ କ୍ୟାଡର ସମୀକ୍ଷା ଅନୁଯାୟୀ ୨୦୧୫ରେ କ୍ୟାଡର ନିୟନ୍ତ୍ରଣ ପ୍ରାଧିକରଣ ଠିକ ସମୟରେ ରିପୋର୍ଟ ଦାଖଲ କରିଥିଲେ |
ଏହା ପରେ ୧୫ ଡିସେମ୍ବରରେ କ୍ୟାଡର ସମୀକ୍ଷା କମିଟିର ଏକ ବୈଠକ ଅନୁଷ୍ଠିତ ହୋଇଥିଲା ଏବଂ ୨୯ ଜୁନ୍ ୨୦୧୬ ରେ କେନ୍ଦ୍ର କ୍ୟାବିନେଟ୍ ସେହି ପ୍ରସ୍ତାବକୁ ଅନୁମୋଦନ ଦେଇଥିଲା। ଡିଓପିଟି ନିୟମ ଅନୁଯାୟୀ, ଏହି କ୍ୟାଡର ସମୀକ୍ଷା ପ୍ରକ୍ରିୟା ପ୍ରତି ପାଞ୍ଚ ବର୍ଷରେ ଅନୁଷ୍ଠିତ ହେବା ଆବଶ୍ୟକ। ତେବେ ଚଳିତ ବର୍ଷ ଜୁନ୍ ୯ରେ ଡିଜି କୁଲଦୀପ ସିଂ ନିର୍ଦ୍ଦିଷ୍ଟ ସମୟସୀମା ମଧ୍ୟରେ କୋର୍ଟଙ୍କ ନିର୍ଦ୍ଦେଶ ପାଳନ କରିବାକୁ କୁହାଯାଇଥିଲା। କିନ୍ତୁ ଡିଜିଙ୍କ ଠାରୁ କୌଣସି ଉତ୍ତର ମିଳିନଥିଲା | ତେଣୁ ଦିଲ୍ଲୀ ହାଇକୋର୍ଟ ଡିଜି କୁଲଦୀପ ସିଂ କୋଡିଏ ହଜାର ଟଙ୍କା ଜରିମାନା ଦେବାକୁ ନିର୍ଦ୍ଦେଶ ଦିଆଯାଇଛି | ମାମଲାର ପରବର୍ତ୍ତୀ ଶୁଣାଣି ତାରିଖ କିମ୍ବା ପୂର୍ବରୁ ତାଙ୍କୁ ଆବେଦନକାରୀଙ୍କୁ ଏହି ଜରିମାନା ଦେବାକୁ ପଡିବ।