ଦିଲ୍ଲୀ ଅବକାରୀ ଦୁର୍ନୀତି ମାମଲାରେ ଗିରଫଦାରୀକୁ ନେଇ ସୁପ୍ରିମ୍‌କୋର୍ଟଙ୍କ ଦ୍ବାରସ୍ଥ ହେଲେ ମନୀଷ ସିସୋଦିଆ

ନୂଆଦିଲ୍ଳୀ: ଅବକାରୀ ଦୁର୍ନୀତିରେ ନିଜ ଗିରଫଦାରୀ ବିରୋଧରେ ମଙ୍ଗଳବାର ସୁପ୍ରିମ୍‌କୋର୍ଟଙ୍କ ଦ୍ବାରସ୍ଥ ‌ହୋଇଛନ୍ତି ଦିଲ୍ଳୀର ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ। ମନୀଷ ସିସୋଦିଆଙ୍କୁ ରବିବାର ସିବିଆଇ ଗିରଫ କରିବା ପରେ ସୋମବାର କୋର୍ଟରେ ହାଜର କରିଥିଲା। ତା’ପରେ ତାଙ୍କୁ ୫ ଦିନିଆ ସବିଆଇ ‌ହେପାଜତରେ ରଖାଯାଇଛି। ଆଜି ଅପରାହ୍ନ ୩.୫୦ସମୟରେ ଏହି ମାମଲାର ଶୁଣାଣି କରିବାକୁ ଭାରତର ପ୍ରଧାନ ବିଚାରପତି ରାଜି ହୋଇଛନ୍ତି।

ଅବକାରୀ ଦୁର୍ନୀତି ମାମଲାରେ ସିସୋଦିଆଙ୍କ ଗିରଫ ଓ  ସିବିଆଇ ତଦନ୍ତ ପ୍ରକ୍ରିୟାକୁ ଚ୍ୟାଲେଞ୍ଜ କରି ପୂର୍ବରୁ ବରିଷ୍ଠ ଓକିଲ ଅଭିଷେକ ମନୁ ସିଂଘଭୀ ପ୍ରଧାନ ବିଚାରପତିଙ୍କ ନିକଟରେ ଆବେଦନ ଦାଖଲ କରିଥିଲେ। ତାହାକୁ ବିଚାର ପାଇଁ ଗ୍ରହଣ କରି ଆଜି ଅପରାହ୍ନରେ ପ୍ରଧାନ ବିଚାରପତି ମାମଲାର ଶୁଣାଣି କରିବେ।

ସିସୋଦିଆ ରବିବାର ଦିନ ପ୍ରାୟ ୧୧ଟାରେ ଜେରାର ସମ୍ମୁଖୀନ ହେବାପାଇଁ ସିବିଆଇ ମୁଖ୍ୟାଳୟରେ ହାଜର ହୋଇଥିଲେ। ଏହି ମାମଲାରେ ଦାଖଲ ହୋଇଥିବା ଚାର୍ଜସିଟରେ ତାଙ୍କ ନାମ ନଥିଲେ ମଧ୍ୟ ପଚରାଉଚରା ପାଇଁ ସିବିଆଇ ରବିବାର ଦିନ ତାଙ୍କୁ ସମନ କରିଥି‌ଲା। ଜେରାର ସମ୍ମୁଖୀନ ହେବା ପୂର୍ବରୁ ସିସୋଦିଆ କହିଥିଲେ ଯେ ୭/୮ ମାସ ଜେଲ୍‌ରେ ରହିବା ପାଇଁ ମୁଁ ପ୍ରସ୍ତୁତ ହୋଇ ରହିଛି। ଦିଲ୍ଲୀର ଉନ୍ନୟନ କାର୍ଯ୍ୟରେ ବ୍ୟାଘାତ ଆଣିବା ପାଇଁ ବିଜେପି ତାଙ୍କୁ ଗିରଫ କରିବାକୁ ଚାହୁଛି ବୋଲି ସେ ଅଭିଯୋଗ କରିଥିଲେ।

ଏହାପୂର୍ବରୁ ସିସୋଦିଆଙ୍କୁ ଫେବ୍ରୁଆରି ୧୯ରେ ସିବିଆଇରେ ହାଜର ହେବା ପାଇଁ କୁହାଯାଇଥିଲା କିନ୍ତୁ ବଜେଟ୍ କାମ ଚାଲିଥିବା ଦର୍ଶାଇ ସେ ତାରିଖ ଘୁଞ୍ଚାଇବାକୁ ଅନୁରୋଧ କରିଥିଲେ। ସିବିଆଇ ଏହି ଅନୁରୋଧକୁ ରକ୍ଷା କରି ତାଙ୍କୁ ଫେବ୍ରୁଆରି ୨୬ରେ ହାଜର ହେବାକୁ ଦ୍ବିତୀୟ ନୋଟିସ୍ ଜାରି କରିଥିଲା। ସିସୋଦିଆଙ୍କୁ ଜେରା ଓ ଗିରଫଦାରୀ ନେଇ ଆପ୍‌ ନେତାମାନେ କଡ଼ା ପ୍ରତିକ୍ରିୟା ପ୍ରକାଶ କରିଛନ୍ତି।