ଗୁରୁବାର ଦିନ ଦିଲ୍ଲୀ ମେୟର୍‌ ନିର୍ବାଚନ: ‘ଆପ୍‌-ବିଜେପି’ ସଂଘର୍ଷ ଯୋଗୁଁ ୩ ଥର ବନ୍ଦ ରହିଥିଲା

ନୂଆଦିଲ୍ଲୀ: ‘ଆପ୍‌’ ଓ ‘ବିଜେପି’ ମଧ୍ୟରେ ବାଦବିବାଦ ଯୋଗୁଁ ୩ ଥର ବିଫଳ ହୋଇଥିବା ଦିଲ୍ଲୀ ମେୟର୍‌ ନିର୍ବାଚନ ନିମନ୍ତେ ଆଗାମୀ ଗୁରୁବାର ଦିନ ଦିଲ୍ଲୀ ନଗର ନିଗମର ବୈଠକ ବସିବ ବୋଲି ‘ଏନ୍‌ଡିଟିଭି’ ରିପୋର୍ଟ କରିଛି।

ଫେବ୍ରୁଆରି ୧୬ ତାରିଖ, ଗୁରୁବାର ଦିନ ମେୟର୍‌ ନିର୍ବାଚନ କରାଇବା ଲାଗି ଆଜି ସକାଳେ ଉପରାଜ୍ୟପାଳ ଭି. କେ. ସାକ୍ସେନା ‘ଆପ୍‌’ର ପ୍ରସ୍ତାବ ଗ୍ରହଣ କରିଥିବା କଥା ସରକାରୀ ଅଧିକାରୀମାନେ କହିଛନ୍ତି।

ଉପରାଜ୍ୟପାଳଙ୍କଦ୍ବାରା ମନୋନୀତ ୧୦ଜଣ କାଉନ୍‌ସିଲର୍‌ଙ୍କୁ ଭୋଟ୍‌ ଦେବା ଲାଗି ଅନୁମତି ନ ମିଳିବା ପ୍ରସଙ୍ଗକୁ ନେଇ ‘ବିଜେପି’ ଓ ‘ଆପ୍‌’ କାଉନ୍‌ସିଲର୍‌ଙ୍କ ମଧ୍ୟରେ ସଂଘର୍ଷ ଲାଗିବାରୁ ଜାନୁଆରି ୬, ୨୪ ଓ ଫେବ୍ରୁଆରି ୬ ତାରିଖରେ ମେୟର୍‌ ନିର୍ବାଚନ ସମ୍ଭବପର ହୋଇ ପାରି ନ ଥିଲା।

Image Courtesy of India.com

ସୂଚନାଯୋଗ୍ୟ, ଦିଲ୍ଲୀ ନଗର ନିଗମ ଆଇନ ଅନୁସ‌ାରେ, ମନୋନୀତ ସଦସ୍ୟମାନେ ଗୃହ ବୈଠକରେ ଭୋଟ୍‌ ଦେଇ ପାରିବେ ନାହିଁ।

‘ଆପ୍‌’ ଅଭିଯୋଗ କରିଛି ଯେ, ନିକଟ ଅତୀତରେ ଆୟୋଜିତ ନଗର ନିଗମ ନିର୍ବାଚନରେ ‘ଆପ୍‌’ ବିପୁଳ ସଂଖ୍ୟାରେ ବିଜୟୀ ହୋଇଥିବା ସତ୍ତ୍ବେ  ମେୟର୍‌ ପଦବୀରେ ଜଣେ ‘ବିଜେପି’ ନେତାଙ୍କୁ ନିର୍ବାଚିତ କରି ‘ବିଜେପି’ ଦିଲ୍ଲୀ ନଗର ନିଗମକୁ ଅକ୍ତିଆର କରିବାକୁ ଉଦ୍ୟମ କରୁଛି।

ଏହି ନିର୍ବାଚନରେ ‘ଆପ୍‌’ ସ୍ପଷ୍ଟ ସଂଖ୍ୟା ଗରିଷ୍ଠତା ହାସଲ କରିଥିଲେ ବି ମେୟର୍‌ ନିର୍ବାଚନ ବେଳେ ‘ସିକ୍ରେଟ୍‌ ବାଲଟ୍‌’ ଓ ‘କ୍ରସ୍‌-ଭୋଟିଙ୍ଗ୍‌’ ଫଳାଫଳକୁ ବଦଳାଇ ଦେଇପାରେ।

ଡିସେମ୍ବର ମାସରେ ଅନୁଷ୍ଠିତ ଏହି ନିର୍ବାଚନରେ ‘ଆପ୍‌’ ୧୩୪ଟି ୱାର୍ଡରେ ବିଜୟୀ ହୋଇଥିବା ବ‌େଳେ ‘ବିଜେପି’ ୧୦୪ଟି ୱାର୍ଡରେ ବିଜୟୀ ହୋଇଛି। ୯ଟି ୱାର୍ଡରେ ବିଜୟ ଲାଭ କରି କଂଗ୍ରେସ ତୃତୀୟ ସ୍ଥାନରେ ରହିଛି।