ହଜିଯାଇଥିବା ୧୦୦ ପିଲାଙ୍କୁ ଖୋଜି ସେମାନଙ୍କ ବାପା-ମାଙ୍କ ପାଖକୁ ପଠାଇଲେ ଦିଲ୍ଲୀ ପୁଲିସ
ନୂଆଦିଲ୍ଲୀ: ନିଖୋଜ ଥିବା ୧୦୦ ଜଣ ପିଲାଙ୍କୁ ଖୋଜି ସେମାନଙ୍କ ବାପା-ମା ଙ୍କ ପାଖକୁ ପଠାଇବାକୁ ସମର୍ଥ ହୋଇଛି ଦିଲ୍ଲୀ ପୁଲିସ | ଦିଲ୍ଲୀ ପୁଲିସ ଏକ ସ୍ୱତନ୍ତ୍ର ମିଶନ ଲଞ୍ଚ କରି ୧୦୦ ପିଲାଙ୍କୁ ସେମାନଙ୍କ ପରିବାର ପାଖକୁ ପଠାଇଦେଇଛି | ଦିଲ୍ଲୀ ପୁଲିସର ଆଣ୍ଟି-ହ୍ୟୁମାନ୍ ଟ୍ରାଫିକିଙ୍ଗ ୟୁନିଟ ଦକ୍ଷିଣ ଦିଲ୍ଲୀର ପ୍ରାୟ ୧୦୦ ପିଲାଙ୍କୁ ଖୋଜିବାରେ ସଫଳତା ପାଇଛି, ଯେଉଁମାନଙ୍କ ମଧ୍ୟରେ ୮୦ଜଣ ପିଲାଙ୍କ ବୟସ ୧୮ ବର୍ଷରୁ କମ୍ ରହିଛି । ଏହି ପିଲାମାନଙ୍କୁ କେବଳ ଦିଲ୍ଲୀ ନୁହେଁ ବିହାର, ଉତ୍ତରପ୍ରଦେଶ, ଛତିଶଗଡ, ପଶ୍ଚିମବଙ୍ଗରୁ ମଧ୍ୟ ଚିହ୍ନଟ କରାଯାଇଛି। ମିଳିଥିବା ସୂଚନା ମୁତାବକ ଦିଲ୍ଲୀର ବିଭିନ୍ନ ପୁଲିସ ଷ୍ଟେସନରେ ଏହି ପିଲାମାନେ ନିଖୋଜ ହୋଇଯାଇଥିବା ନେଇ ଅଭିଯୋଗ ହୋଇଥିଲା |
Sambad is now on WhatsApp
Join and get latest news updates delivered to you via WhatsApp
ଆଉ ଦିଲ୍ଲୀ ପୁଲିସ କମିଶନର ଏସ.ଏନ୍ ଶ୍ରୀବାସ୍ତବ ବର୍ଷେ ଧରି ଏକ ଅଭିଯାନ ଆରମ୍ଭ କରିଥିଲେ, ଯେଉଁଥିରେ ନିଖୋଜ ପିଲାମାନଙ୍କୁ ଖୋଜି ସେମାନଙ୍କ ପରିବାର ପାଖକୁ ପଠାଇବା ପାଇଁ ମିଶନ ଆରମ୍ଭ ହୋଇଥିଲା | ତେବେ ଏହି ମିଶନକୁ ନେଇ ପୁଲିସ କମିଶନର ନିୟମ କରିଥିଲେ ଯେ ଯେଉଁ ପୁଲିସ କର୍ମଚାରୀ ଅଧିକ ସଂଖ୍ୟକ ପିଲାଙ୍କୁ ଖୋଜି ସେମାନଙ୍କ ପରିବାର ପାଖକୁ ପଠାଇବେ ସେମାନଙ୍କୁ ପଦୋନ୍ନତି ମିଳିବ | ଏହି ନିୟମ ପରେ ଅଧିକାଂଶ ପୁଲିସ କର୍ମଚାରୀ ପଦୋନ୍ନତି ଆଶାରେ କାମରେ ଲାଗିପଡ଼ିଥିଲେ |
ଆଉ ପୁଲିସ କର୍ମଚାରୀଙ୍କ ପ୍ରଚେଷ୍ଟା ସଫଳ ହୋଇଥିଲା | କେବଳ ଦକ୍ଷିଣ ଦିଲ୍ଲୀ ପୁଲିସ ୫୮ ଜଣ ଶିଶୁଙ୍କୁ ଉଦ୍ଧାର କରିଛି। ସେହିପରି ଉଦ୍ଧାର ହୋଇଥିବା ଅନ୍ୟ ପିଲାମାନଙ୍କ ମଧ୍ୟରେ ହରିୟାଣାର ୬ ଜଣ ପିଲା, ବିହାରର ୬ ଜଣ, ଛତିଶଗଡର ୧ ଜଣ, ଉତ୍ତରପ୍ରଦେଶର ୧୭ ଜଣ, ମଧ୍ୟପ୍ରଦେଶର ୩ ଜଣ ଏବଂ ଝାଡ଼ଖଣ୍ଡର ଜଣେ ଶିଶୁଙ୍କୁ ପୁଲିସ ଉଦ୍ଧାର କରିଥିଲା |