ଦିଲ୍ଲୀ ହିଂସାରେ ସଂପୃକ୍ତ ୧୧୦୦ ଜଣଙ୍କୁ ଚିହ୍ନଟ କରାଯାଇଛି : ଶାହା
ନୂଆଦିଲ୍ଲୀ : ଦିଲ୍ଲୀ ହିଂସା ସଂପର୍କରେ ଆଜି ସଂସଦରେ ନିଜର ବୟାନ ରଖିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହା । ସେ କହିଛନ୍ତି ଯେ ଏହି ଦଙ୍ଗା ବେଶ ପୂର୍ବପ୍ରସ୍ତୁତି ଅନୁସାରେ ହୋଇଥିଲା । କିନ୍ତୁ ଦିଲ୍ଲୀ ପୁଲିସ ମାତ୍ର ୩୬ ଘଣ୍ଟାରେ ଏହାକୁ ନିୟନ୍ତ୍ରଣ କରିନେଇଥିଲା । ସେ କହିଛନ୍ତି ଯେ ଏହି ହିଂସାକାଣ୍ଡରେ ଜଡ଼ିତ ଲୋକମାନଙ୍କ ବିରୁଦ୍ଧରେ ପ୍ରାୟ ୭୦୦ଟି ଏଫଆଇଆର ରୁଜ୍ଜୁ କରାଯାଇଛି । ପୁଲିସ ପ୍ରାୟ ୧୫୦ଟି ମାରଣାସ୍ତ୍ର ଜବତ କରିଛି ଓ ମାରଣାସ୍ତ୍ର ଆଇନ ଅନୁସାରେ ୪୯ଟି ମାମଲା ରୁଜ୍ଜୁ କରିଛି । ସେ କହିଛନ୍ତି ଫେବ୍ରୁଆରି ୨୨ରୁ ୨୭ ମଧ୍ୟରେ ହୋଇଥିବା ଏହି ସାଂପ୍ରଦାୟିକ ଦଙ୍ଗାରେ ପ୍ରାୟ ୫୨ ଜଣ ମୃତ୍ୟୁବରଣ କରିଛନ୍ତି ଓ ୫୨୬ ଜଣ ଆହତ ହୋଇ ଚିକିତ୍ସିତ ହେଉଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସେ ଆହୁରି ମଧ୍ୟ କହିଛନ୍ତି ଯେ ଫେସ ରେକଗନିସନ ସଫ୍ଟଓ୍ଵାର ବ୍ୟବହାର କରି ଦଙ୍ଗାରେ ସଂପୃକ୍ତ ପ୍ରାୟ ୧୧୦୦ ଲୋକଙ୍କୁ ଚିହ୍ନଟ କରାଯାଇଛି । ପୁଲିସର ୪୦ଟି ଟିମ ଗଠନ କରାଯାଇ ଏମାନଙ୍କ ସନ୍ଧାନ କରାଯାଉଛି । ଏମାନଙ୍କ ମଧ୍ୟରୁ ପ୍ରାୟ ୩୦୦ ଉତ୍ତରପ୍ରଦେଶରୁ ଆସିଥିଲେ ବୋଲି ସେ କହିଛନ୍ତି ।