ଦିଲ୍ଲୀରେ ଚିହ୍ନଟ ଓମିକ୍ରନ୍ ସଂକ୍ରମିତଙ୍କ ପାଖରେ ଦେଖାଯାଉଛି କେଉଁ କେଉଁ ଲକ୍ଷଣ? ଜାଣନ୍ତୁ କ’ଣ କହିଲେ ଡାକ୍ତର
ନୂଆଦିଲ୍ଲୀ: କରୋନାର ନୂଆ ଭାରିଆଣ୍ଟ ଓମିକ୍ରନକୁ ନେଇ ଏବେ ଚାରିଆଡେ ଚର୍ଚ୍ଚା । ଏହାରି ଭିତରେ ଏହି ନୂଆ ଭାରିଆଣ୍ଟ ରାଜଧାନୀ ଦିଲ୍ଲୀରେ ମଧ୍ୟ ପହଞ୍ଚିଯାଇଛି । ରବିବାର ରାଜଧାନୀ ଦିଲ୍ଲୀରୁ ପ୍ରଥମ କରି ଓମିକ୍ରନ୍ ସଂକ୍ରମିତ ଚିହ୍ନଟ ହୋଇଛନ୍ତି, ଯାହାଙ୍କର ଚିକିତ୍ସା ଏଲଏନଜେପି ହସ୍ପିଟାଲରେ ଜାରି ରହିଛି । ଏଲଏନଜେପି ମେଡିକାଲର ନିର୍ଦ୍ଦେଶକ ସୁରେଶ କୁମାରଙ୍କ କହିବା ମୁତାବକ, ଯେଉଁ ବ୍ୟକ୍ତି ଜଣକ ଓମିକ୍ରନରେ ସଂକ୍ରମିତ ହୋଇଛନ୍ତି, ସେ ପ୍ରଥମେ ତାଙ୍କ ଗଳାରେ କଷ୍ଟ ଅନୁଭବ କରିଥିଲେ । ତେବେ ବର୍ତ୍ତମାନ ହସ୍ପିଟାଲରେ ତାଙ୍କର ଚିକିତ୍ସା ଚାଲିଥିବାବେଳେ, ତାଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ରହିଛି ।
Sambad is now on WhatsApp
Join and get latest news updates delivered to you via WhatsApp
ଖାଲି ସେତିକି ନୁହେଁ, ଡାକ୍ତର ସୁରେଶ କୁମାରଙ୍କ ସୂଚନା ମୁତାବକ, ଓମିକ୍ରନ୍ ସଂକ୍ରମିତଜଣକ କରୋନାର ଦୁଇଟି ଯାକ ଟିକା ନେଇସାରିଥିଲେ । ହେଲେ ଏହା ସତ୍ୱେ ମଧ୍ୟ ସେ ଓମିକ୍ରନରେ ସଂକ୍ରମିତ ହୋଇଛନ୍ତି । ତେବେ ରୋଗୀଜଣକ ନିଜ ଶରୀରରେ ଦରଜ ଅନୁଭବ କରିବା ସହ ଦୁର୍ବଳ ଅନୁଭବ କରୁଛନ୍ତି । ହେଲେ ତାଙ୍କର ଅମ୍ଳଜାନ ସ୍ଥରରେ କୌଣସି ପରିବର୍ତ୍ତନ ଦେଖିବାକୁ ମିଳିନାହିଁ । ଡାକ୍ତରଙ୍କ ସ୍ପେଶାଲ ଟିମ୍ ଓମିକ୍ରନ ସଂକ୍ରମିତଙ୍କ ଉପରେ ୨୪ ଘଣ୍ଟା ନଜର ରଖିଛନ୍ତି । ବିଶେଷକରି ରୋଗୀଜଣଙ୍କର ଅମ୍ଳଜାନ ସ୍ଥରକୁ ଧ୍ୟାନରେ ରଖାଯାଇଛି । ଏଥିପାଇଁ ହସ୍ପିଟାଲ ଭିତରେ ସମସ୍ତ ପ୍ରସ୍ତୁତି ଶେଷ ହୋଇଛି ।