ପ୍ରଚାର ପାଇଁ ଯୋଗୀଙ୍କ ଚାହିଦା ଜୋର : ବିଜେପି ଶୀର୍ଷ ନେତୃତ୍ବଙ୍କ ପାଖରେ ପହଞ୍ଚିଲା ଦାବି
ବେଙ୍ଗାଲୁରୁ: କର୍ଣ୍ଣାଟକ ବିଧାନସଭା ନିର୍ବାଚନ ପାଇଁ ଆଜି ତାରିଖ ଘୋଷଣା ହୋଇଛି | ଆସନ୍ତା ମେ ୧୦ରେ ନିର୍ବାଚନ ହେବାକୁ ଥିବାବେଳେ ମେ ୧୩ରେ ଫଳାଫଳ ପ୍ରକାଶ ପାଇବ | ତେବେ ନିର୍ବାଚନରେ ବିଜେପିର ପ୍ରଚାରକଙ୍କ ମଧ୍ୟରେ ଯୋଗୀଙ୍କୁ ସାମିଲ କରି ପୂର୍ବାପେକ୍ଷା ଅଧିକ ଜନସଭା କରାଇବାକୁ କର୍ଣ୍ଣାଟକ ନେତୃତ୍ୱ ଏବେ ବିଜେପି କେନ୍ଦ୍ରୀୟ ଟିମ ସାମ୍ନାରେ ଦାବି ରଖିଛନ୍ତି | କର୍ଣ୍ଣାଟକର ବିଜେପି ନେତାଙ୍କ କହିବା କଥା ଯେ ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଯାଦୁ କର୍ଣ୍ଣାଟକର ଲୋକଙ୍କ ଉପରେ କାମ କରୁଛି। ୨୦୧୮ ବିଧାନସଭା ନିର୍ବାଚନରେ ଯୋଗୀ ଆଦିତ୍ୟନାଥ ବିଜେପି ସପକ୍ଷରେ ଯେଭଳି ମାହୋଲ ସୃଷ୍ଟି କରିଥିଲେ, ସେହି ମାହୋଲ ଆଣିବାକୁ ହେଲେ ଯେମିତି ବି ହେଉ ଯୋଗୀଙ୍କୁ କର୍ଣ୍ଣାଟକ ପଠାଇବାକୁ ରାଜ୍ୟସ୍ତରୀୟ ନେତାମାନେ ଦାବି କରିଛନ୍ତି | ବଡ କଥା ଯେ କର୍ଣ୍ଣାଟକ ମୁଖ୍ୟମନ୍ତ୍ରୀ ବସଭରାଜ ବୋମ୍ମାଇ ମଧ୍ୟ କେନ୍ଦ୍ରୀୟ ନେତୃତ୍ୱଙ୍କ ସାମ୍ନାରେ ଯୋଗୀ ଆଦିତ୍ୟନାଥଙ୍କୁ ରାଜ୍ୟରେ ପ୍ରଚାର କରିବାକୁ ପଠାଇବାକୁ ଦାବି କରିଛନ୍ତି। ବର୍ତ୍ତମାନ ବିଜେପି ପକ୍ଷରୁ ପ୍ରାର୍ଥୀ ଚୟନ ଓ ତାରକା ପ୍ରଚାରକଙ୍କ ତାଲିକା ପ୍ରସ୍ତୁତ କରାଯାଉଥିବାବେଳେ କୁହାଯାଉଛି ଯେ ଏଥର ମଧ୍ୟ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ କର୍ଣ୍ଣାଟକରେ ଷ୍ଟାର ପ୍ରଚାରକ ତାଲିକାରେ ଆଗରେ ରଖାଯିବ |
Sambad is now on WhatsApp
Join and get latest news updates delivered to you via WhatsApp
କେବଳ ଏତିକି ନୁହେଁ ଏଥର ଯୋଗୀ ଆଦିତ୍ୟନାଥଙ୍କ ନିର୍ବାଚନ ରାଲି ସଂଖ୍ୟା ବୃଦ୍ଧି କରିବାକୁ କର୍ଣ୍ଣାଟକ ବିଜେପି ପକ୍ଷରୁ ଦାବି ରହିଛି। ଏନେଇ ରାଜନୈତିକ ବିଶ୍ଳେଷକଙ୍କ କହିବା କଥା ଯେ ଯୋଗୀ ଆଦିତ୍ୟନାଥ ୨୦୧୮ରେ କର୍ଣ୍ଣାଟକରେ ଯେଭଳି ବାତାବରଣ ସୃଷ୍ଟି କରିଥିଲେ, ଏହା ନିର୍ବାଚନ ପ୍ରଚାରରେ ବିଜେପିକୁ ସଫଳତା ଦେଇଥିଲା । ଏହି କାରଣରୁ କର୍ଣ୍ଣାଟକ ବିଜେପି ପୁନର୍ବାର ଯୋଗୀ ଆଦିତ୍ୟନାଥଙ୍କୁ କର୍ଣ୍ଣାଟକ ପଠାଇବାକୁ ଦାବି କରୁଛି | କର୍ଣ୍ଣାଟକ ବିଜେପିର ଜଣେ ବରିଷ୍ଠ ନେତା କହିଛନ୍ତି ଯେ ଯୋଗୀ ଆଦିତ୍ୟନାଥ ୨୦୧୮ରେ ଯେଉଁ ସବୁ ଆସନରେ ପ୍ରଚାର କରିଥିଲେ ଏବଂ ଯେଭଳି ଭାବରେ ନିର୍ବାଚନ ଫଳାଫଳ ଆସିଥିଲା, ତାହା ଅପ୍ରତ୍ୟାଶିତ ଥିଲା | ୨୦୧୮ ବିଧାନସଭା ନିର୍ବାଚନ ପୂର୍ବରୁ ଯୋଗୀ ଆଦିତ୍ୟନାଥ କର୍ଣ୍ଣାଟକରେ ୨୫ରୁ ଅଧିକ ସମାବେଶ ଏବଂ ୬ରୁ ଅଧିକ ରୋଡ୍ ସୋ କରିଥିଲେ। ସେ ଯେଉଁ ୩୫ଟି ବିଧାନସଭା ଆସନରେ ନିର୍ବାଚନ ପ୍ରଚାର କରିଥିଲେ, ସେଥିମଧ୍ୟରୁ ଭାରତୀୟ ଜନତା ପାର୍ଟି ୩୩ଟି ଆସନରେ ଜିତିଥିଲା। ଏହି କାରଣରୁ କର୍ଣ୍ଣାଟକ ବିଜେପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଆସନ୍ତା ବିଧାନସଭା ନିର୍ବାଚନରେ ପ୍ରଚାର କରିବା ପାଇଁ ଚାହୁଁଥିବାର ସେ କହିଛନ୍ତି |