ପ୍ରଥମ ଥର ବିଧାୟକ ହୋଇଥିଲେ ବି କାହିଁକି ଭୁପେନ୍ଦ୍ରଙ୍କ ନାମରେ ମୋହର ମାରିଲା ବିଜେପି? ଜାଣନ୍ତୁ ଗୁଜୁରାଟର ନୂଆ ମୁଖ୍ୟମନ୍ତ୍ରୀଙ୍କ ବାବଦରେ ଅଜଣା କଥା
ଗାନ୍ଧୀନଗର: ମୁଖ୍ୟମନ୍ତ୍ରୀ ଭାବେ ଗୁଜରାଟରେ ବିଜୟ ରୂପାନୀଙ୍କ ଇସ୍ତଫା ପରେ ଏବେ ସେଠାରେ ଆରମ୍ଭ ହେବାକୁ ଯାଇଛି ଭୁପେନ୍ଦ୍ର ସରକାର । ଆଜି ବିଜେପି ବିଧାୟକ ଦଳର ବୈଠକରେ ଗୁଜରାଟର ନୂଆ ମୁଖ୍ୟମନ୍ତ୍ରୀ ଭାବେ ଭୁପେନ୍ଦ୍ର ପଟେଲଙ୍କ ନାଁରେ ମୋହର ବାଜିଛି । ତେବେ ମୁଖ୍ୟମନ୍ତ୍ରୀ ରେସରେ ଅନ୍ୟ ବଡ ବଡ ନେତା ଥିଲେ ମଧ୍ୟ ଘାତାଲୋଡିୟା ବିଧାୟକ ଭୁପେନ୍ଦ୍ର ପଟେଲ ଗୁଜରାଟର ନୂଆ ମୁଖ୍ୟମନ୍ତ୍ରୀ ହେବା ସ୍ଥିର ହୋଇଛି । ତେବେ ମୁଖ୍ୟମନ୍ତ୍ରୀ ହେବାକୁ ଯାଉଥିବା ଭୂପେନ୍ଦ୍ର ପଟେଲ କିଏ? ତାହା ଆଜି ବି ଅନେକ ଲୋକଙ୍କୁ ଅଜଣା ।
Sambad is now on WhatsApp
Join and get latest news updates delivered to you via WhatsApp
ଭୁପେନ୍ଦ୍ର ପଟେଲ ଅହମ୍ମଦାବାଦର ଘାତାଲୋଡିୟା ବିଧାନସଭା ଆସନରୁ ବିଧାୟକ ଭାବେ ନିର୍ବାଚିତ ହୋଇଥିବାବେଳେ, ପୂର୍ବରୁ ସେ ଅହମ୍ମଦାବାଦ ଅର୍ବାନ ଡେଭଲପମେଣ୍ଟ ଅଥରଟିର ଚେୟାରମ୍ୟାନ ଥିଲେ । ଖାଲି ସେତିକି ନୁହେଁ, ତାଙ୍କର ଶିକ୍ଷାଗତ ଯୋଗ୍ୟତା ଇଞ୍ଜିନିୟରିଂ ହୋଇଥିବାବେଳେ ସେ ଆନନ୍ଦୀବେନ ପଟେଲଙ୍କ ନିକଟତର ବୋଲି ଚର୍ଚ୍ଚା ହେଉଛି ।
ଘାତାଲୋଡିୟା ବିଧାନସଭା ଆସନରୁ ଆନନ୍ଦୀବେନ ପଟେଲ ଲଢି ଆସୁଥିଲେ । ହେଲେ ସେ ରାଜ୍ୟପାଳ ହେବା ପରେ ଭୁପେନ୍ଦ୍ର ପଟେଲ ସେହି ଆସନରୁ ଜିତି ବିଧାନସଭାକୁ ପ୍ରଥମ କରି ଆସିଥିଲେ । ଅନ୍ୟପଟେ ଆନନ୍ଦୀବେନ ପଟେଲଙ୍କ ନିକଟତମ ନେତା ହେବା ସହିତ ଭୁପେନ୍ଦ୍ର ପଟେଲ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ମଧ୍ୟ ଘନିଷ୍ଠ ବୋଲି ଜଣାଯାଏ । ଭୁପେନ୍ଦ୍ର ପଟେଲ ପଟିଦାର ସମ୍ପ୍ରଦାୟରୁ ଆସୁଛନ୍ତି । ପଟିଦାର ସମ୍ପ୍ରଦାୟ ସହିତ ବିଜେପିର ଭଲ ସମ୍ପର୍କ ନଥିବାରୁ, ତାଙ୍କୁ ମୁଖ୍ୟମନ୍ତ୍ରୀ ବନେଇ ଦଳ ପଟିଦାର ସମ୍ପ୍ରଦାୟର ଭୋଟ୍ ହାତେଇବାକୁ ମଧ୍ୟ ଲକ୍ଷ୍ୟ ରଖିଛି ।