ଧର୍ମେନ୍ଦ୍ରଙ୍କ ପାଖରେ ୨ କୋଟି ୨୮ ଲକ୍ଷର ସମ୍ପତ୍ତି
ନୂଆଦିଲ୍ଲୀ: ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟକୁ ପ୍ରଦାନ କରାଯାଇଥିବା ଆଠଜଣ କ୍ୟାବିନେଟ ମନ୍ତ୍ରୀଙ୍କ ସମ୍ପତ୍ତି ତାଲିକା ସାର୍ବଜନୀନ ହୋଇଛି। ଏଥିରେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସମ୍ପତ୍ତି ତାଲିକା ମଧ୍ୟ ରହିଛି। ମାର୍ଚ ୩୧, ୨୦୨୨ ସୁଦ୍ଧା ଶ୍ରୀ ପ୍ରଧାନଙ୍କ ନିକଟରେ ୨ କୋଟି ୨୮ ଲକ୍ଷ ୫୧ ହଜାର ୯୬୫ ଟଙ୍କାର ସମ୍ପତ୍ତି ରହିଛି। ଏଥିରୁ ୪୫ ଲକ୍ଷ ଟଙ୍କାର ଲାୟବିଲିଟିକୁ ବାଦ୍ ଦେଲେ ତାଙ୍କ ମୋଟ ସମ୍ପତ୍ତି ମୂଲ୍ୟ ୧ କୋଟି ୮୩ ଲକ୍ଷ ଟଙ୍କା।
Sambad is now on WhatsApp
Join and get latest news updates delivered to you via WhatsApp
ସ୍ଥାବର ସମ୍ପତ୍ତିରେ ଶ୍ରୀ ପ୍ରଧାନ ତାଙ୍କ ଗାଜିଆବାଦରେ ଥିବା ଘରର ମୂଲ୍ୟ ୯୧ ଲକ୍ଷ ଟଙ୍କା, ଅନୁଗୁଳ ଜିଲ୍ଲା ସତ୍ୟବନ୍ଧ ମୌଜାରେ ୨୪ ଲକ୍ଷ ଟଙ୍କାର ଘରବାଡ଼ି ଓ ୬ ଲକ୍ଷ ଟଙ୍କାର ଚାଷ ଜମି, ବ୍ୟାଙ୍କରେ ୩୦ ଲକ୍ଷ ଟଙ୍କାର ଜମା, ୧୪ ଲକ୍ଷ ଟଙ୍କାର ପିପିଏଫ୍, ୫୦ ଲକ୍ଷ ଟଙ୍କାର ମ୍ୟୁଚୁଆଲ୍ ପାଣ୍ଠି, ୯୫ ହଜାର ଟଙ୍କାର ମୋଟରଯାନ, ୮ ଲକ୍ଷରୁ ଅଧିକ ଟଙ୍କାର ଅଳଙ୍କାର ଓ ଆସବାବ ଓ ୨ ଲକ୍ଷରୁ ଅଧିକ ଟଙ୍କାର ଅନ୍ୟାନ୍ୟ ସମ୍ପତ୍ତି ସହ କ୍ୟାସ ବାଲାନ୍ସ ରହିଛି। ମାର୍ଚ ୩୧, ୨୦୨୧ ସୁଦ୍ଧା ତାଙ୍କର ୨ କୋଟି ୯ ଲକ୍ଷରୁ ଅଧିକ ମୂଲ୍ୟର ସ୍ଥାବର ଓ ଅସ୍ଥାବର ସମ୍ପତ୍ତି ରହିଥିଲା। ଏଥିରୁ ଲାୟବିଲିଟିକୁ ବାଦ ଦେଇ ସମୁଦାୟ ସମ୍ପତ୍ତି ମୂଲ୍ୟ ୧ କୋଟି ୬୨ ଲକ୍ଷରୁ ଅଧିକ ଥିଲା। ବର୍ଷକ ମଧ୍ୟରେ ତାଙ୍କ ସମ୍ପତ୍ତି ପ୍ରାୟ ୨୧ ଲକ୍ଷ ଟଙ୍କା ବଢ଼ିଛି।
ଶ୍ରୀ ପ୍ରଧାନଙ୍କ ଦ୍ବାରା ଦାଖଲ କରାଯାଇଥିବା ସମ୍ପତ୍ତି ତାଲିକାରେ ତାଙ୍କ ପତ୍ନୀ ମୃଦୁଳା ପ୍ରଧାନଙ୍କ ନାଁରେ ୩ କୋଟି ୧୫ ଲକ୍ଷ ଟଙ୍କାରୁ ଅଧିକ ସ୍ଥାବର ଓ ଅସ୍ଥାବର ସଂପତ୍ତି ରହିଛି। ତେବେ ୨୨ ଲକ୍ଷ ୪୧ ହଜାର ଟଙ୍କାର ଲାୟବିଲିଟିକୁ ବାଦ ଦେଲେ ମୃଦୁଳାଙ୍କ ସମୁଦାୟ ସଂପତ୍ତି ମୂଲ୍ୟ ୨ କୋଟି ୯୨ ଲକ୍ଷ ଟଙ୍କାରୁ ଅଧିକ ରହିଛି। ତାଙ୍କ ଝିଅ ନୈମିଷାଙ୍କ ପାଖରେ ୧୬ ଲକ୍ଷ ୯୪ ହଜାରର ଜୀବନ ବୀମା ଓ ବ୍ୟାଙ୍କ ଡିପୋଜିଟ୍ ଥିବା ବେଳେ ପୁଅ ନିଶାନ୍ତଙ୍କ ପାଖରେ ଜୀବନ ବୀମା ଓ ବ୍ୟାଙ୍କ ଡିପୋଜିଟ ବାବଦରେ ମୋଟ ୩ ଲକ୍ଷ ୧୬ ହଜାର ଟଙ୍କା ରହିଥିବା ଶ୍ରୀ ପ୍ରଧାନ ସତ୍ୟପାଠରେ ଦର୍ଶାଇଛନ୍ତି।