କାମଦେଲା ଧର୍ମେନ୍ଦ୍ରଙ୍କ ରଣନୀତି: ହରିୟାଣା ବିଧାନସଭା ନିର୍ବାଚନରେ ବିଜେପିର ବିଜୟ

ନୂଆଦିଲ୍ଲୀ:  ଆଜି ଘୋଷିତ ହରିୟାଣା ବିଧାନସଭା ନିର୍ବାଚନ ଫଳଫଳାରୁ ବିଜେପି ଲଗାତାର ତୃତୀୟ ଥର ପାଇଁ ରାଜ୍ୟରେ ସରକାର ଗଢ଼ିବାକୁ ଯାଉଛି। ଏଥର ହରିୟାଣାରେ କଂଗ୍ରେସର ଏକତରଫା ବି‌ଜୟ ନେଇ ଯେଉଁ ପ୍ରାକ୍‌  ଆକଳନ ଓ ସର୍ଭେ କରାଯାଇଥିଲା ତାହା ଭୁଲ ପ୍ରମାଣିତ ହୋଇଛି। ଚଳିତ ହରିୟାଣା ବିଧାନସଭା ନିର୍ବାଚନ ପାଇଁ ବିଜେପି ପକ୍ଷରୁ ସ୍ବତନ୍ତ୍ର ରଣନୀତି ପ୍ରସ୍ତୁତ କରିଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ସ୍ବରାଷ୍ଟ୍ର ବ୍ୟାପାର ମନ୍ତ୍ରୀ ଅମିତ ଶାହ ଓ ବିଜେପିର ଜାତୀୟ ସଭାପତି ଜେପି ନଡ୍ଡାଙ୍କ ଦ୍ବାରା ମାରଥନ୍‌ ନିର୍ବାଚନ ପ୍ରଚାର କରାଯାଇଥିଲା। ତେବେ ପୂର୍ବରୁ ବିଜେପିର ଅନେକ ବିଜୟରେ ମହତ୍ତ୍ବପୂର୍ଣ୍ଣ ଭୂମିକା ନିର୍ବାହ କରିଥିବା ଦଳର ଅନ୍ୟତମ ପ୍ରମୁଖ ରଣନୀତିକାର ତଥା କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଭୂମିକା ବେଶ ଚର୍ଚ୍ଚାରେ ରହିଛି। ଧର୍ମେନ୍ଦ୍ରଙ୍କ ସାଙ୍ଗଠନିକ ଦକ୍ଷତା ଉପରେ ଆସ୍ଥା ପ୍ରକଟ କରି ବିଜେପିର ଶୀର୍ଷ କେନ୍ଦ୍ରୀୟ ନେତୃତ୍ବ ଜୁନରେ ତାଙ୍କୁ ହରିୟାଣା ନିର୍ବାଚନ ପ୍ରଭାରୀ ଦାୟିତ୍ବ ନ୍ୟସ୍ତ କରିଥିଲେ। ବିଭିନ୍ନ  କାରଣରୁ ହରିୟାଣା ନିର୍ବାଚନ ବିଜେପି ପାଇଁ  ଆହ୍ବାନପୂର୍ଣ୍ଣ ହୋଇଥିବାବେଳେ ଧର୍ମେନ୍ଦ୍ର ନିର୍ବାଚନ ଜିଣିବାର ରଣନୀତି ପ୍ରସ୍ତୁତ କରିଥିଲେ।

ଓଡ଼ିଶାରେ ବିଜେପି ନିର୍ବାଚନ ଜିତିବାର ରଣନୀତି ଧର୍ମେନ୍ଦ୍ର ହରିୟ‌ାଣାରେ ପ୍ରୟୋଗ କରିଥିଲେ। ଦଳର ଅନ୍ୟତମ ଷ୍ଟାର୍‌ ପ୍ରଚାରକ ଭାବେ ଧର୍ମେନ୍ଦ୍ର ପ୍ରଚାର ଅଭିଯାନରେ ମଧ୍ୟ ବେଶ ସକ୍ରିୟ ଥିଲେ। ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଲା, ପ୍ରଭାରୀ ଦାୟିତ୍ବରେ ଅବତୀର୍ଣ୍ଣ ହେବା ପରଠୁ ନିର୍ବାଚନ ଶେଷ ହେବା ପର୍ଯ୍ୟନ୍ତ ଦଳ ତୃତୀୟ ଥର ହରିୟାଣାରେ ସରକାର ଗଢ଼ିବ ବୋଲି ସେ ତାଙ୍କର ଆତ୍ମବିଶ୍ବାସ ଉପରେ କାଏମ ରହିଥିଲେ। ନିର୍ବାଚନ ରଣନୀତି ପ୍ରସ୍ତୁତ କରିବା, ଦଳର ନିର୍ବାଚନୀ ଇସ୍ତାହାର ଉପରେ ଗୁରୁତ୍ବ ଦେବା, ଦୈନନ୍ଦିନ ନିର୍ବାଚନ ପ୍ରଚାରକୁ ତଦାରଖ କରିବା ଧର୍ମେନ୍ଦ୍ରଙ୍କ ଚଳିତ ନିର୍ବାଚନରେ ସ୍ବତନ୍ତ୍ରତା ରହିଥିଲା। କେବଳ ସେତିକି ନୁହେଁ, ଟିକଟ ବଣ୍ଟନ ବ୍ୟାପାରରେ ମଧ୍ୟ ଧର୍ମେନ୍ଦ୍ର ଏବଂ ତାଙ୍କ ଟିମ୍‌ ପରିପକ୍ବତା ପ୍ରଦର୍ଶନ କରିଥିଲେ। ଦଳର ୧୦ବର୍ଷର ଶାସନରେ ସରକାର ବି‌ରୋଧୀ ଲହରକୁ ଦୃଷ୍ଟିରେ ରଖି ଅନେକ ବରିଷ୍ଠ ନେତାମାନଙ୍କୁ ନିର୍ବାଚନ ଲଢ଼ିବା ପାଇଁ ଟିକଟ ମଧ୍ୟ ଦିଆଯାଇନଥିଲା। 

ନିର୍ବାଚନ ପ୍ରଚାର ଅଭିଯାନରେ ବରି‌ଷ୍ଠ ନେତା ଅନୀଲ ବିଜ ମୁଖ୍ୟମନ୍ତ୍ରୀ ପଦର ଦାବିଦାର ହେବେ ବୋଲି ଦେଇଥିବା ବୟାନକୁ  ଧର୍ମେନ୍ଦ୍ର ଖାରଜ କରିଦେଇଥିଲେ। ନିର୍ବାଚନ ପରିଚାଳନା ରଣନୀତିରେ ଧର୍ମେନ୍ଦ୍ରଙ୍କ ସଫଳତାର ଗ୍ରାଫ୍‌ ବିଭିନ୍ନ ରାଜ୍ୟରେ ବେଶ ଉତ୍ସାହଜନକ ରହିଥିବାବେଳେ ୨୦୨୩ କର୍ଣ୍ଣାଟକ ବିଧାନସଭା ନିର୍ବାଚନରେ ପ୍ରଭାରୀ ଭାବେ ଧର୍ମେନ୍ଦ୍ରଙ୍କ ରଣନୀତି କାମ ଦେଇନଥିଲା।