ନିପା ରୋଗୀଙ୍କ ଚିକିତ୍ସା କରୁ କରୁ ପ୍ରାଣ ହରାଇଲେ ନର୍ସ, ସମୟ ନ ଥିବାରୁ ସ୍ୱାମୀଙ୍କୁ ଦୁଃଖଭରା ଚିଠି ଲେଖି ଜଣାଇଲେ ଶେଷ ଇଚ୍ଛା
ଥିରୁବନନ୍ତପୁରମ୍ : କେରଳରେ ଏବେ ନିପା ଭୂତାଣୁ ସମସ୍ତଙ୍କ ମନରେ ଆତଙ୍କ ଖେଳାଇ ଦେଇଛି । ଏହି ଭୂତାଣୁ ପାଇଁ ଅନେକ ଲୋକ ପ୍ରାଣ ହରାଉଥିବା ବେଳେ ଏବେ ଜଣେ ନର୍ସ ନିପା ରୋଗୀଙ୍କ ଚିକିତ୍ସା କରୁ କରୁ ପ୍ରାଣ ହରାଇଛନ୍ତି । ସୋମବାର ଏହି ଘଟଣା ଘଟିଥିବା ବେଳେ ନର୍ସ ଲିନି ପୁଥୁସେରୀ ନିଜ ପରିବାର ସହ ଶେଷ ସମୟରେ କଥା ହେବା ପାଇଁ ମଧ୍ୟ ସମୟ ପାଇ ନ ଥିଲେ । ନିପା ଭୂତାଣୁର ଶିକାର ହୋଇ ସେ ଆଉ ବଞ୍ଚିବେନି ବୋଲି ଜାଣିବା ପରେ ବିଳମ୍ବ ନ କରି ଲିନି ତାଙ୍କ ସ୍ୱାମୀଙ୍କୁ ଚିଠି ଲେଖିଥିଲେ । ଯେଉଁ ଚିଠି ପଢ଼ିଲେ ଆଖିକୁ ଲୁହ ଚାଲିଆସିବ।
Sambad is now on WhatsApp
Join and get latest news updates delivered to you via WhatsApp
ଏହି ଚିଠିରେ ସେ ଲେଖିଛନ୍ତି, “ମୋର ଏବେ ଯିବା ସମୟ ଆସି ଗଲାଣି । ମୋତେ ଲାଗୁନି ମୁଁ ତୁମକୁ ଆଉ ଦେଖି ପାରିବି । ମୋତେ କ୍ଷମା କରିଦେବ ଏମିତି ହଠାତ୍ ଚାଲି ଯାଉଛି । ମୋ ପରେ ପରେ ଆମ ପିଲାମାନଙ୍କ ଧ୍ୟାନ ରଖିବ।” ଲିନିଙ୍କ ବିୟୋଗ ପରେ ତାଙ୍କ ପରିବାରକୁ ଶକ୍ତ ଝଟ୍କା ଲାଗିଥିବା ବେଳେ ଏ ନେଇ ଦୁଃଖ ପ୍ରକାଶ କରିଛନ୍ତି କେରଳର ମୁଖ୍ୟମନ୍ତ୍ରୀ ପି. ବିଜୟନ୍ନ ।
ନିଜ ଫେସ୍ବୁକ୍ ପେଜ୍ରେ ସେ ଲେଖିଛନ୍ତି, “ରୋଗୀମାନଙ୍କ ଦେଖାଶୁଣା କରି ଲିନି ନିଜ ଜୀବନ ହରାଇଛନ୍ତି । ଲିନିଙ୍କ ବିୟୋଗ ଖବର ଶୁଣି ମୁଁ ଦୁଃଖିତ । ଲିନି ଯାହା କରିଛନ୍ତି ତାହା ଅତୁଳନୀୟ । କେରଳର ବାସିନ୍ଦା ହିସାବରେ ଆମେ ସମସ୍ତେ ତାଙ୍କ ପରିବାର ଏବଂ ବନ୍ଧୁ ପରିଜନମାନଙ୍କ ଦୁଃଖକୁ ବାଣ୍ଟିବା ପାଇଁ ଚେଷ୍ଟା କରିବା ଦରକାର।” । ଅନ୍ୟ ପକ୍ଷରେ ଲିନିଙ୍କ ମୃତ୍ୟୁ ପରେ ଯେମିତି ଭୂତାଣୁ ଅଧିକ ନ ବ୍ୟାପେ ସେଥିପାଇଁ ତାଙ୍କୁ ତୁରନ୍ତ ସମାଧି ଦିଆଯାଇଥିଲା ବୋଲି ଜଣାପଡ଼ିଛି ।