ଏମିତି ଏକ ଦେଶ ଯେଉଁଠି ବର୍ଷକ ୧୩ ମାସ, ଏବେ ଚାଲିଛି ୨୦୧୩ ମସିହା
ନୂଆଦିଲ୍ଲୀ: ଆରମ୍ଭ ହୋଇଯାଇଛି ୨୦୨୦ | ନୂଆବର୍ଷ ପାଳନ ପାଇଁ ଏବେ ବି ଲୋକଙ୍କ ମନରୁ ଉତ୍ସାହ କମିନାହିଁ | ଭାରତ ସହ ସାରା ବିଶ୍ୱରେ ୨୦୨୦ ନୂଆବର୍ଷ ପାଳନ କରାଯାଇଛି | କିନ୍ତୁ ଏବେ ବି ଏମିତି ଏକ ଦେଶ ଅଛି ଯାହାର ସମୟ ଆମଠାରୁ ୭ ବର୍ଷ ୩ ମାସ ପଛରେ ଚାଲିଛି | ଏବେ ଏହି ଦେଶରେ ୨୦୧୩ ମସିହା ଚାଲିଛି | କେବଳ ଏତିକି ନୁହେଁ, ଏଠାରେ ବର୍ଷକୁ ୧୨ ନୁହେଁ ବରଂ ୧୩ ମାସ ହୋଇଥାଏ | ଜାଣନ୍ତୁ ଏହି ଦେଶ ବାବଦରେ କିଛି ରୋଚକ କଥା।
Sambad is now on WhatsApp
Join and get latest news updates delivered to you via WhatsApp
ଏହି ଦେଶର ନାମ ହେଉଛି ଇଥିଓପିଆ, ଯାହାର ରାଜଧାନୀ ଆଦିଶ ଅବାବା | ଇଥିଓପିଆ ଆଫ୍ରିକାର ସବୁଠାରୁ ପୁରାତନ ସ୍ୱାଧୀନ ଦେଶ | ଇଥିଓପିଆର ଜନସଂଖ୍ୟା ୧୧ କୋଟି ୪୦ ଲକ୍ଷ ହୋଇଥିବା ବେଳେ ଏହା ପୂର୍ବ ଆଫ୍ରିକାରେ ଅବସ୍ଥିତ | ନାଇଜେରିଆ ପରେ ଆଫ୍ରିକା ମହାଦେଶର ସବୁଠାରୁ ଅଧିକ ଲୋକ ଏହି ଦେଶରେ ବସବାସ କରନ୍ତି।
ଏହି ଦେଶର ପୂର୍ବରେ ସୋମାଲିଆ, ଦକ୍ଷିଣରେ କେନିଆ ଓ ପଶ୍ଚିମରେ ସୁଦାନ ରହିଛି | ଦୁନିଆରେ ପ୍ରଥମେ ଜୁଲିଆନ କ୍ୟାଲେଣ୍ଡରର ବ୍ୟବହାର କରାଯାଉଥିଲା | ୧୫୮୨ ମସିହାରେ ଗ୍ରେଗୋରିଆନ କ୍ୟାଲେଣ୍ଡରର ପ୍ରଚଳନ ଆରମ୍ଭ ହୋଇଥିଲା | ପ୍ରାୟ ସମସ୍ତ ଦେଶ ଏହି କ୍ୟାଲେଣ୍ଡରକୁ ଆପଣେଇଥିଲେ | କିନ୍ତୁ ଇଥିଓପିଆ ଗ୍ରେଗୋରିଆନ କ୍ୟାଲେଣ୍ଡରକୁ ବିରୋଧ କରିଥିଲା | ଇଥିଓପିଆ ଇଥିଓପିଆନ କ୍ୟାଲେଣ୍ଡର ହିଁ ବ୍ୟବହାର କରିଥାଏ | ଇଥିଓପିଆନ କ୍ୟାଲେଣ୍ଡରରେ ବର୍ଷକ ୧୩ ମାସ ହୋଇଥାଏ | ସେଠାରେ ନୂଆ ବର୍ଷ ୧୦ କିମ୍ବା ୧୧ ସେପ୍ଟେମ୍ବରରେ ହିଁ ଆରମ୍ଭ ହୋଇଥାଏ | ୧୨ ମାସରେ ୩୦ ଦିନ ଥିବାବେଳେ ଶେଷ ମାସ କେବଳ ପାଞ୍ଚ ବା ୬ ଦିନ ରହିଥାଏ |